លោក To Lam អគ្គលេខាបក្ស អញ្ជើញទៅសួរសុខទុក្ខ និងជូនពរឆ្នាំថ្មីប្រពៃណីជាតិដល់កម្មកររុករកធ្យូងថ្ម

អញ្ជើញទៅសួរសុខទុក្ខ និងលើកទឹកចិត្តដល់កម្មាភិបាល និងកម្មករនៃក្រុមហ៊ុនភាគហ៊ុនធ្យូងថ្ម Deo Nai-Coc Sau (សម្ព័ន្ធក្រុមហ៊ុនឧស្សាហកម្មធ្យូងថ្ម និងរ៉ែវៀតណាម) នៅខេត្ត Quang Ninh លោកTo Lam អគ្គលេខាបក្ស  បានសំណេះសំណាលនិងប្រគល់អំណោយដល់កម្មករនៅទីនេះ។

លោក To Lam អគ្គលេខាបក្ស  បានឲ្យដឹងថា បក្សកុម្មុយនិស្តវៀតណាមគឺជាបក្សរបស់វណ្ណៈកម្មករដែលតំណាងឲ្យផលប្រយោជន៍របស់វណ្ណៈកម្មករ ពលករ និងប្រជាជាតិទាំងមូល។ កម្លាំងរបស់បក្សផ្ដើមចេញពីទំនាក់ទំនងជិតស្និទ្ធជាមួយវណ្ណៈកម្មករ និងប្រជាជនកម្មករ។

លោក To Lam អគ្គលេខាបក្ស  និងលោក Pham Minh Chinh នាយករដ្ឋមន្ត្រី  ប្រគល់អំណោយដល់តំណាងអង្គភាព និងកម្មករក្នុងឧស្សាហកម្មធ្យូងថ្ម (រូបថត៖ vnanet.vn)

លោក To Lam អគ្គលេខាបក្ស បានស្នើឲ្យវណ្ណៈកម្មករ និងឧស្សាហកម្មធ្យូងថ្ម និងរ៉ែ គួរតែបន្តផ្លាស់ថ្មីនូវការផលិត និងប្រើប្រាស់បច្ចេកវិទ្យាស្វ័យប្រវត្តិកម្ម វិទ្យាសាស្ត្រ និងបច្ចេកវិទ្យា និងការធ្វើបរិវត្ដកម្មឌីជីថលក្នុងការគ្រប់គ្រងរ៉ែ។ ព្រមទាំងបង្កើនប្រសិទ្ធភាពនូវការផលិត និងប្រាក់ចំណូល ក៏ដូចជាកែលំអជីវភាពរស់នៅរបស់កម្មករ ទន្ទឹមនឹងប្រាក់ចំណូល គួរតែយកចិត្តទុកដាក់ដល់លក្ខខណ្ឌរស់នៅ លំនៅដ្ឋាន ការថែទាំសុខភាព ការអប់រំ និងវប្បធម៌ដល់កម្មករ និងក្រុមគ្រួសាររបស់ពួកគេ។ នេះជាការទទួលខុសត្រូវរួមរបស់សហគ្រាស សហជីព និងអាជ្ញាធរមូលដ្ឋាន។

ក្នុងបរិបទដែលបច្ចេកវិទ្យាដែលមានការផ្លាស់ប្តូរយ៉ាងឆាប់រហ័ស កម្មករម្នាក់ៗត្រូវទទួលបានឱកាសសម្រាប់ការរៀនសូត្រ ការបណ្តុះបណ្តាល បង្កើនជំនាញ និងប្រើប្រាស់ឧបករណ៍ និងបច្ចេកវិទ្យាថ្មីៗយ៉ាងស្ទាត់ជំនាញ។ ការកសាងកម្លាំងពលកម្មជំនាញ និងការគោរពវិន័យគឺជាកម្លាំងចលករសម្រាប់សម្រេចគោលដៅឧស្សាហូបនីយកម្ម និងទំនើបកម្មប្រទេស។

លោក To Lam អគ្គលេខាបក្ស បានបញ្ជាក់ថា បក្សមានក្ដីទុកចិត្ដទៅលើវណ្ណៈកម្មករនិយាយរួម និងកម្មកររុករកធ្យូងថ្មនៃខេត្ត Quang Ninh និយាយដោយឡែក។ ព្រមទាំងជឿជាក់ថា កម្មកររុករកធ្យូងថ្មនឹងបន្តរក្សាស្មារតីនៃ "គោរពវិន័យ និងឯកភាពគ្នា" ហើយប្រែប្រពៃណីដ៏រុងរឿងទៅជាសកម្មភាពជាក់ស្តែងក្នុងការផលិត និងរក្សាសុវត្ថិភាព លើកកម្ពស់ថ្វៃដៃនិងបច្ចេកទេស ដោយហេតុនេះ រួមចំណែកកាន់តែខ្លាំងឡើងចំពោះបុព្វហេតុកសាង និងការពារមាតុភូមិ៕

ក្នុងឱកាសត្រៀមទទួលអំណរឆ្នាំថ្មីប្រពៃណី លោក To Lam អគ្គលេខាបក្ស បានជូនពរដល់កម្មករនិងក្រុមគ្រួសាររបស់ពួកគេឲ្យមានសុខភាពល្អ សុវត្ថិភាព និងសុភមង្គល។

ក្នុងឱកាសនេះ លោក To Lam អគ្គលេខាបក្ស  និងលោក Pham Minh Chinh នាយករដ្ឋមន្ត្រី   បានប្រគល់អំណោយដល់តំណាងអង្គភាព និងកម្មករក្នុងឧស្សាហកម្មធ្យូងថ្ម៕

បកប្រែដោយ Pham Diep