ជំរុញកាលានុវត្តភាពសហប្រតិបត្តិការរវាងវៀតណាម និង EU ក្នុងវិស័យវិនិយោគឌីជីថល

មានប្រសាសន៍ក្នុងសម័យប្រជុំពេញអង្គ លោក Julien Guerrier ឯកអគ្គរដ្ឋទូតសហភាពអឺរ៉ុប (EU) ប្រចាំនៅវៀតណាមបានសង្កត់ធ្ងន់ថា EU ប្តេជ្ញាពង្រឹងទំនាក់ទំនងទ្វេភាគីក្នុងវិស័យវិនិយោគពាណិជ្ជកម្ម អាជីវកម្មបច្ចេកវិទ្យាឌីជីថល និងការអភិវឌ្ឍបៃតង។ សហភាពអឺរ៉ុបមានបំណងជំរុញកិច្ចសហប្រតិបត្តិការជាមួយវៀតណាមក្នុងវិស័យវិនិយោគឌីជីថល ផ្ទេរបច្ចេកវិទ្យា និងបច្ចេកទេសឯកទេស ដើម្បីទាញយកសក្តានុពលដ៏ធំរវាងភាគីទាំងពីរ ក្នុងបំណងបម្រើដល់ការធ្វើបរិវត្តកម្មឌីជីថល និងការអភិវឌ្ឍប្រកបដោយចីរភាពរបស់វៀតណាម។

លោក Julien Guerrier ឯកអគ្គរដ្ឋទូតសហភាពអឺរ៉ុបប្រចាំនៅវៀតណាម ថ្លែងសុន្ទរកថាបើកវេទិកា (រូបថត៖ vnanet.vn)

វេទិកានេះនឹងជំរុញការតភ្ជាប់ និងកិច្ចសហប្រតិបត្តិការដែលមានផលប្រយោជន៍ទៅវិញទៅមករវាងសហគ្រាស EU ជាមួយអង្គភាព ក្រុមហ៊ុន និងសហគ្រាសវៀតណាមលើវិស័យពាក់ព័ន្ធ។ វេទិកានេះរួមមានសម័យការងារចំនួន ៦ ក្នុងគោលបំណងជំរុញកិច្ចសហប្រតិបត្តិការរវាងសហគ្រាស EU និងសហគ្រាសវៀតណាម ស្ថាប័នរដ្ឋវៀតណាម ចែករំលែកបទពិសោធន៍ និងបច្ចេកវិទ្យា ឧបត្ថម្ភផ្នែកហិរញ្ញវត្ថុនៅក្នុងការអភិវឌ្ឍ semiconductor ការតភ្ជាប់ទូរគមនាគមន៍ ហេដ្ឋារចនាសម្ព័ន្ធឌីជីថល បញ្ញាសិប្បនិម្មិត ឌីជីថលូបនីយកម្មសហគ្រាស... ដើម្បីរួមគ្នាកសាងប្រព័ន្ធកិច្ចសហប្រតិបត្តិការឌីជីថលបើកចំហ និងគួរឱ្យទុកចិត្ត ដោយផ្អែកលើការគោរពចំពោះអធិបតេយ្យភាពទិន្នន័យ និងការបង្កើតតម្លៃប្រកបដោយនិរន្តរភាព៕

បកប្រែដោយ Thuy Anh