បច្ចេកវិជ្ជា “Make in Vietnam” បញ្ជាក់ពីតួនាទីរបស់វៀតណាមនៅលើផែនទីពិភពលោក

សមិទ្ធិផលក្នុងការធ្វើជាម្ចាស់បច្ចេកវិទ្យា

ពិព័រណ៍សមិទ្ធិផលជាតិ “៨០ឆ្នាំនៃដំណើរឯករាជ្យ-សេរីភាព-សុភមង្គល” កំពុងទាក់ទាញប្រជាពលរដ្ឋ និងភ្ញៀវទេសចរក្នុង និងក្រៅប្រទេសយ៉ាងច្រើនកុះករមកទស្សនា។ ស្ដង់តាំងពិព័រណ៍ដែលទាក់ទាញប្រជាជន ភាគច្រើនគឺការតាំងបង្ហាញផលិតផលបច្ចេកវិជ្ជាថ្មីៗរបស់ក្រសួង ស្ថាប័ន និងធុរកិច្ច ចាប់ពីមនុស្សយន្ត យន្តហោះគ្មានមនុស្សបើក ដល់ពិភពពិតនិម្មិត (Virtual Reality)…

បច្ចេកវិទ្យា UAV ត្រូវបានតាំងបង្ហាញនៅក្នុងពិព័រណ៍សមិទ្ធិផលជាតិ (រូបថត៖ baotintuc.vn)

នៅឯការតាំងពិព័រណ៌ ទស្សនិកជនជាច្រើនបានប្រមូលផ្តុំជុំវិញមនុស្សយន្តរបស់ VinMotion ដែលមានកម្ពស់ជិត ១.៧ ម៉ែត្រ អាចដើរ គ្រវីដៃ និយាយភាសាវៀតណាម ឬបច្ចេកវិទ្យាយន្តហោះគ្មានមនុស្សបើក Hera ដែលជាយន្តហោះដ្រូនអាចបត់បានឈានមុខគេលើពិភពលោក ដែលត្រូវបានស្រាវជ្រាវ រចនា និងផលិតដោយជនជាតិវៀតណាម ហើយកំពុងត្រូវបានប្រើប្រាស់នៅក្នុងវិស័យការពារជាតិ សន្តិសុខ និងកិច្ចការស៊ីវិល និងត្រូវបាននាំចេញទៅកាន់សហរដ្ឋអាមេរិកផងដែរ...

ទស្សនិកជនភាគច្រើនយល់ស្របថា ពិព័រណ៍នេះបង្ហាញពីលទ្ធផលនៃដំណើរអភិវឌ្ឍន៍ក្នុងរយៈពេលវែងរបស់វៀតណាម ពីប្រទេសកសិកម្មដែលមានការលំបាកជាច្រើន កំពុងខិតខំដើម្បីធ្វើជាម្ចាស់បច្ចេកវិទ្យា។

នៅក្នុងការធ្វើបរិវត្តកម្មឌីជីថលជាតិ កម្មវិធីកំណត់អត្តសញ្ញាណអេឡិចត្រូនិក VneID បានក្លាយជា "គន្លឹះឌីជីថល" សម្រាប់ប្រជាជន។ កម្មវិធីត្រូវបានក្រសួងនគរបាលអនុវត្តពីឆ្នាំ២០២២ ដោយមានសេវាកម្មសាធារណៈតាមអ៊ីនធឺណិតជាច្រើន៖ ការប្រកាសទីលំនៅបណ្តោះអាសន្ន ការទូទាត់វិក្កយបត្រ ការភ្ជាប់ជាមួយពន្ធ និងការធានារ៉ាប់រងសង្គម... កម្មវិធីនេះបានជួយសន្ទស្សន៍អភិវឌ្ឍន៍រដ្ឋាភិបាលអេឡិចត្រូនិកនៃប្រទេសវៀតណាមចំណាត់ថ្នាក់ទី៧១ នៅលើពិភពលោកនៅឆ្នាំ២០២៤។

ការកសាងម៉ាកយីហោ “Make in Vietnam”

លោក Huynh Thanh Dat អនុប្រធានគណៈឃោសនា និងចលនាមហាជនមជ្ឈិមបានឲ្យដឹងថា ចាប់តាំងពីអនុវត្តការផ្លាស់ប្ដូរថ្មីនៅឆ្នាំ ១៩៨៦ មក បក្សកុម្មុយនិស្តវៀតណាមតែងតែចាត់ទុកវិទ្យាសាស្ត្រ និងបច្ចេកវិទ្យាជាកត្តាមួយក្នុងចំណោមកត្តាសំខាន់ដើម្បីជំរុញការអភិវឌ្ឍ។ ចាប់ពីឆ្នាំ២០០០ ដល់បច្ចុប្បន្ន ប្រព័ន្ធច្បាប់ឯកទេសត្រូវបានកសាង៖ ច្បាប់ស្តីពីវិទ្យាសាស្ត្រ និងបច្ចេកវិទ្យា ច្បាប់ស្តីពីការផ្ទេរបច្ចេកវិទ្យា ច្បាប់ស្តីពីបច្ចេកវិទ្យាខ្ពស់...

សព្វាវុធជាមួយបច្ចេកវិជ្ជាថ្មីៗនៅទីតាំងតាំងពិព័រណ៍របស់ក្រសួងការពារប្រទេសនៅឯពិព័រណ៍សមិទ្ធិផលជាតិ (រូបថត៖ baotintuc.vn)

ដើម្បីលើកទឹកចិត្តធុរកិច្ច ក្រសួងវិទ្យាសាស្ត្រនិងបច្ចេកវិទ្យាវៀតណាមបានរៀបចំពានរង្វាន់ប្រចាំឆ្នាំ “ផលិតផលបច្ចេកវិទ្យាឌីជីថល Make in Viet Nam” ចាប់តាំងពីឆ្នាំ ២០២០។ លោក Nguyen Khac Lich ប្រធាននាយកដ្ឋានឧស្សាហកម្មបច្ចេកវិទ្យាព័ត៌មាន (ក្រសួងវិទ្យាសាស្ត្រ និងបច្ចេកវិទ្យា) បានឲ្យដឹងថា៖ ឆ្នាំ២០២៥ គឺជាឆ្នាំដែលពានរង្វាន់ត្រូវបានរៀបចំលើកទី៦ ហើយជាលើកទី១ ដែលប្រគល់រង្វាន់ដល់ផលិតផលបច្ចេកវិទ្យាឌីជីថលក្នុងបញ្ជីផលិតផលបច្ចេកវិទ្យាឌីជីថលល្អចំនួន១១ ដែលទើបអនុម័តដោយរដ្ឋាភិបាល។

ផលិតផលបច្ចេកវិជ្ជា "Make in Vietnam" កំពុងកសាងរូបភាពនៃប្រទេសវៀតណាមដែលមានភាពស្វាហាប់ ច្នៃប្រឌិត ត្រៀមខ្លួនរួចជាស្រេចសម្រាប់សមាហរណកម្ម។ កិច្ចសហការរវាងគោលនយោបាយ ធុរកិច្ច និងសហគមន៍វិទ្យាសាស្ត្របានបង្កើតឱកាស និងកម្លាំងថ្មីសម្រាប់ប្រទេសប្រែ វិទ្យាសាស្ត្រ និងបច្ចេកវិទ្យាក្លាយទៅជាមូលដ្ឋានគ្រឹះដ៏រឹងមាំសម្រាប់វៀតណាមឈានចូលយុគសម័យច្នៃប្រឌិត និងចំណេះដឹង៕

បកប្រែដោយ Thuy Anh