អ្នកជំនាញ IMF៖ វៀតណាមជាគោលដៅដ៏ទាក់ទាញសម្រាប់វិនិយោគិនបរទេស
កប.អនឡាញ - លោក Paulo Medas ប្រធានគណៈប្រតិភូពិគ្រោះយោបល់ និងត្រួតពិនិត្យម៉ាក្រូសេដ្ឋកិច្ចវៀតណាមរបស់ IMF បានចាត់ទុកថា វៀតណាមនៅតែជាគោលដៅដ៏ទាក់ទាញសម្រាប់ការវិនិយោគផ្ទាល់ពីបរទេស FDI ខណៈដែលសេដ្ឋកិច្ចពិភពលោកមានភាពជ្រួលច្របល់ និងអស្ថិរភាពភូមិសាស្ត្រនយោបាយ កំពុងកើនឡើង។
ក្នុងក្របខ័ណ្ឌនៃសន្និសីទនិទាឃរដូវប្រចាំឆ្នាំរបស់មូលនិធិរូបិយវត្ថុអន្តរជាតិ (IMF) និងធនាគារពិភពលោក (WB) ដែលប្រព្រឹត្តទៅនៅទីក្រុង Washington D.C (សហរដ្ឋអាមេរិក) លោក Paulo Medas ប្រធានគណៈប្រតិភូពិគ្រោះយោបល់ និងត្រួតពិនិត្យសេដ្ឋកិច្ចម៉ាក្រូវៀតណាមរបស់ IMF បានផ្តល់បទសំភាសន៍ជាមួយអ្នកយកព័ត៌មានវៀតណាម។
យោងតាមលោក Paulo Medas វៀតណាមនៅតែជាគោលដៅដ៏ទាក់ទាញសម្រាប់ការវិនិយោគផ្ទាល់ពីបរទេស (FDI) ស្របពេលសេដ្ឋកិច្ចពិភពលោកស្ថិតក្នុងភាពជ្រួលច្របល់ និងអស្ថិរភាពភូមិសាស្ត្រនយោបាយ កំពុងកើនឡើង។
លោក Paulo Medas បានបញ្ជាក់ថា ទោះបីជាសេដ្ឋកិច្ចពិភពលោកមានការលំបាកក៏ដោយ ក៏វៀតណាមនៅតែកត់ត្រាអត្រាកំណើន ៥.៦៦% នៅក្នុងត្រីមាសទីមួយនៃឆ្នាំ២០២៤។ ការកើនឡើងនៃការនាំចេញទំនិញជំរុញសន្ទុះកំណើនទាំងមូល។
IMF បានព្យាករណ៍ថា វៀតណាមអាចសម្រេចបាននូវអត្រាកំណើនជិត ៦% នៅឆ្នាំ២០២៤ ដោយសារការងើបឡើងវិញនៃតម្រូវការក្នុងស្រុក និងគោលនយោបាយសារពើពន្ធគាំទ្ររបស់រដ្ឋាភិបាល។
ទោះជាយ៉ាងណាក៏ដោយ IMF ក៏ផ្តល់អនុសាសន៍ថា វៀតណាមចាំបាច់ត្រូវមានគោលនយោបាយសារពើពន្ធដែលអាចបត់បែនបាន ដើម្បីទប់ទល់នឹងហានិភ័យ និងធានាបាននូវកំណើនប្រកបដោយចីរភាព។
ក្នុងបរិបទនៃការកើនឡើងអតិផរណាដោយសារភាពជ្រួលច្របល់ជាសកលនោះ IMF ជឿជាក់ថា វៀតណាមប្រហែលជាត្រូវដំឡើងអត្រាការប្រាក់ដើម្បីទប់ស្កាត់សម្ពាធតម្លៃ។ ទោះជាយ៉ាងណាក៏ដោយ ការកែសម្រួលគោលនយោបាយរូបិយវត្ថុចាំបាច់ត្រូវធ្វើដោយប្រុងប្រយ័ត្ន ដើម្បីជៀសវាងផលប៉ះពាល់អវិជ្ជមានលើកំណើន។
លោក Paulo Medas បានវាយតម្លៃថា ក្នុងបរិបទនៃការផ្លាស់ប្តូរខ្សែសង្វាក់ផ្គត់ផ្គង់ទៅកាន់តំបន់អាស៊ី វៀតណាមបន្តជាគោលដៅដ៏ទាក់ទាញមួយ ដែលទាក់ទាញ FDI យ៉ាងច្រើន ដោយសារបរិយាកាសវិនិយោគមានស្ថិរភាព កំណើនសេដ្ឋកិច្ចខ្ពស់ ទីផ្សារក្នុងស្រុកដ៏ធំ និងធនធានមនុស្សវ័យក្មេង។ ដើម្បីរក្សាភាពទាក់ទាញរបស់ខ្លួន វៀតណាមត្រូវបន្តកែលម្អបរិយាកាសធុរកិច្ច កាត់បន្ថយនីតិវិធីរដ្ឋបាល អភិវឌ្ឍន៍ហេដ្ឋារចនាសម្ព័ន្ធ ជាពិសេសថាមពលបៃតង និងជំរុញនវានុវត្តន៍៕
បកប្រែដោយ Duy Hoan