គណៈកម្មការជំនាញខេត្ត Gia Lai ជួបពិភាក្សាការងារជាមួយ ៣ ខេត្តភាគឦសាននៃប្រទេសកម្ពុជា
កប.អនឡាញ - នាថ្ងៃទី ២៤ និងថ្ងៃទី ២៥ ខែមេសា ក្រុមបេសកកម្មដឹកនាំដោយលោកស្រី Nguyen Thi Thanh Lich អនុប្រធានគណៈកម្មាធិការប្រជាជនខេត្ត ប្រធានគណៈកម្មការជំនាញខេត្ត Gia Lai បានជួបពិភាក្សាជាមួយគណៈកម្មការជំនាញនៃខេត្តរតនគិរី ខេត្តស្ទឹងត្រែង ខេត្តព្រះវិហារ។
កិច្ចពិភាក្សានេះត្រូវបានរៀបចំក្នុងបំណងឯកភាពលើផែនការរៀបចំពិធីបង្សុកូល និងពិធីប្រគល់អដ្ឋិធាតុកងទ័ពស្ម័គ្រចិត្ត អ្នកជំនាញការវៀតណាម ដែលពលីជីវិតក្នុងសម័យសង្គ្រាមនៅកម្ពុជា ដែលស្វែងរក និងប្រមូលផ្តុំក្នុងរដូវប្រាំងឆ្នាំ២០២៣-២០២៤ ដោយក្រុម K៥២ (បញ្ជាការដ្ឋានយោធាខេត្ត Gia Lai)។
|
|
ទិដ្ឋភាពនៃកិច្ចពិភាក្សា (រូបថត៖ baogialai.com.vn) |
ថ្លែងមតិក្នុងកិច្ចពិភាក្សានេះ លោកស្រី Nguyen Thi Thanh Lich បានថ្លែងថា ក្នុងប៉ុន្មានឆ្នាំកន្លងមកនេះ អាជ្ញាធរខេត្ត គណៈកម្មការជំនាញ កងកម្លាំងប្រដាប់អាវុធ និងប្រជាជននៃខេត្តរតនគិរី ខេត្តស្ទឹងត្រែង និងខេត្តព្រះវិហារ បានជួយគាំទ្រក្រុម K៥២ បំពេញភារកិច្ច។ ចាប់ពីឆ្នាំ ២០០១ ដល់បច្ចុប្បន្ន ក្រុមបានស្វែងរក ប្រមូល និងធ្វើមាតុភូមិនិវត្តន៍អដ្ឋិធាតុយុទ្ធជនពលីចំនួន ១,៤៨៩ អដ្ឋិធាតុ។ ក្នុងរដូវប្រាំងឆ្នាំ ២០២៣-២០២៤ ក្រុមបានស្វែងរក និងប្រមូលអដ្ឋិធាតុនៃយុទ្ធជនពលីចំនួន ២១ អដ្ឋិធាតុ។
លោកស្រី Nguyen Thi Thanh Lich មានបំណងចង់បន្តទទួលបានជំនួយពីអាជ្ញាធរ គណៈកម្មការជំនាញ កងកម្លាំងប្រដាប់អាវុធ និងប្រជាពលរដ្ឋខេត្តរតនគិរី ខេត្តស្ទឹងត្រែង និងខេត្តព្រះវិហារ ដើម្បីការស្រាវជ្រាវ និងប្រមូលផ្តុំអដ្ឋិធាតុកងទ័ពស្ម័គ្រចិត្តវៀតណាម និងអ្នកជំនាញការដែលពលីជីវិតក្នុងសម័យសង្គ្រាមនៅកម្ពុជា ទទួលបានលទ្ធផលល្អប្រសើរ។
ក្នុងឱកាសនេះ គណៈកម្មការជំនាញខេត្ត Gia Lai បានប្រគល់ថវិកាឧបត្ថម្ភដល់ខេត្តរតនគិរី ខេត្តស្ទឹងត្រែង និងខេត្តព្រះវិហារ (ខេត្តនីមួយៗទទួលបានថវិកា ១,០០០ ដុល្លារ) ដើម្បីរៀបចំពិធីនានា៕
បកប្រែដោយ Thanh Cong