គណៈប្រតិភូក្រសួងមហាផ្ទៃនៃព្រះរាជាណាចក្រកម្ពុជាអញ្ជើញមកបំពេញទស្សនកិច្ចការងារនៅកាសែតនគរបាលប្រជាជន

តាងនាមកាសែតនគរបាលប្រជាជន លោកឧត្តមសេនីយ៍ត្រី Pham Khai អគ្គនិពន្ធនាយក មានសេចក្តីសោមនស្សរីករាយដែលត្រូវបានថ្នាក់ដឹកនាំក្រសួងនគរបាលចាត់តាំងឱ្យទទួលស្វាគមន៍ និងផ្លាស់ប្តូរបទពិសោធន៍ជាមួយគណៈប្រតិភូក្រសួងមហាផ្ទៃ នៃព្រះរាជាណាចក្រកម្ពុជា លើការងារសារព័ត៌មាននៅទីស្នាក់ការកាសែតនគរបាលប្រជាជន។

ទិដ្ឋភាពនៃជំនួប (រូបថត៖ cand.com.vn)

ជម្រាបជូនអំពីលក្ខណៈសំខាន់ៗរបស់កាសែតនគរបាលប្រជាជន លោកអគ្គនិពន្ធនាយកបានឲ្យដឹងថា កាសែតនគរបាលប្រជាជន គឺជាកាសែតដ៏សំខាន់មួយនៅក្នុងប្រព័ន្ធសារព័ត៌មានបដិវត្តន៍វៀតណាម ដែលទទួលបានការវាយតម្លៃខ្ពស់ពីថ្នាក់ដឹកនាំបក្ស រដ្ឋ និងក្រសួងនគរបាលវៀតណាម ព្រមទាំងត្រូវកំណត់ថាជាទីភ្នាក់ងារសារព័ត៌មានសំខាន់ទាំង ៦ របស់ប្រទេស។

លោកឧត្តមសេនីយ៍ត្រី Pham Khai ថ្លែងក្នុង​ជំនួប (រូបថត៖ cand.com.vn)

កាសែតនគរបាលប្រជាជនមានប្រភេទជាច្រើន ដែលក្នុងនោះ កាសែតក្រដាសប្រចាំថ្ងៃផ្តោតសំខាន់លើការផ្សព្វផ្សាយសកម្មភាពរបស់ថ្នាក់ដឹកនាំបក្ស រដ្ឋ និងក្រសួងនគរបាលវៀតណាម ចំណែក​កាសែតអេឡិចត្រូនិកនគរបាលប្រជាជន​ធ្វើបច្ចុប្បន្នភាពព័ត៌មានដើម្បីបំពេញតម្រូវការរបស់មិត្តអ្នកអាន។ បើតាមលោកអគ្គនិពន្ធនាយក កាសែតនគរបាលប្រជាជនឧត្តមភាពក្នុងការផ្សព្វផ្សាយព័ត៌មានអំពីសន្តិសុខ និងសណ្តាប់ធ្នាប់នៅវៀតណាម ដែល​នេះគឺជាវិស័យមួយទទួលបានការចាប់អារម្មណ៍យ៉ាងខ្លាំងពីប្រជាជនទាំងមូល។

លោកនាយឧត្តមសេនីយ៍ ប៉ោ ភក្តិ (រូបថត៖ cand.com.vn)

ថ្លែងក្នុងជំនួបនេះ តាងនាមគណៈប្រតិភូ លោកនាយឧត្តមសេនីយ៍ ប៉ោ ភក្តិ រដ្ឋលេខាធិការក្រសួងមហាផ្ទៃ បានសម្តែងនូវសេចក្តីសោមនស្សរីករាយ ដែលបានមកទស្សនា សិក្សា និងធ្វើការជាមួយកាសែតនគរបាលប្រជាជន ហើយទទួលបានការស្វាគមន៍យ៉ាងរាក់ទាក់ពីសំណាក់ថ្នាក់ដឹកនាំ កម្មាភិបាល យុទ្ធជន និងអ្នកសារព័ត៌មាន។

លោកនាយឧត្តមសេនីយ៍ ប៉ោ ភក្តិ ឲ្យ​ដឹង​ថា តាមរយៈជំនួបធ្វើការនេះ គណៈប្រតិភូក្រសួងមហាផ្ទៃ នៃព្រះរាជាណាចក្រកម្ពុជា អាចស្វែងយល់អំពីបទពិសោធន៍នៃការអនុវត្តបច្ចេកវិទ្យាឌីជីថលទៅក្នុងការងារផ្សព្វផ្សាយព័ត៌មានរបស់ក្រសួងនគរបាលវៀតណាមដើម្បីយកវាជាមូលដ្ឋានសម្រាប់អនុវត្តនៅក្រសួងមហាផ្ទៃនៃព្រះរាជាណាចក្រកម្ពុជា។

លោកឧត្តមសេនីយ៍ឯក ហោ សំអាត ថ្លែងក្នុងជំនួប (រូបថត៖ cand.com.vn)

ក្នុងក្របខណ្ឌនៃកិច្ចប្រជុំនេះ លោកឧត្តមសេនីយ៍ឯក ហោ សំអាត អគ្គនាយកនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ នៃព្រះរាជាណាចក្រកម្ពុជា បានជម្រាបជូនអំពីលក្ខណៈសំខាន់ៗនៃរចនាសម្ព័ន្ធ ការរៀបចំ និងប្រតិបត្តិការរបស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ។

គណៈប្រតិភូក្រសួងមហាផ្ទៃនៃព្រះរាជាណាចក្រកម្ពុជា និងថ្នាក់ដឹកនាំកាសែតនគរបាលប្រជាជន​ថតរូបអនុស្សាវរីយ៍ (រូបថត៖ cand.com.vn)

លោកនាយឧត្តមសេនីយ៍ ប៉ោ ភក្តិ និងលោកឧត្តមសេនីយ៍ឯក ហោ សំអាត បានសម្តែងការឯកភាពខ្ពស់ចំពោះទស្សនៈរបស់កាសែតនគរបាលប្រជាជនដែលថាសារព័ត៌មានរបស់កងកម្លាំងនគរបាលត្រូវធានាភាពត្រឹមត្រូវខ្ពស់ ផ្សព្វផ្សាយព័ត៌មានត្រូវ​មានការទទួលខុសត្រូវខ្ពស់។ ក្នុងជំនួបនេះផងដែរ ភាគីទាំងពីរបានផ្លាស់ប្តូរព័ត៌មាន និងបទពិសោធន៍ជាក់ស្តែងលើការអភិវឌ្ឍវិស័យសារព័ត៌មាននិយាយរួម និងសារព័ត៌មានអេឡិចត្រូនិកនិយាយដោយឡែក៕

បកប្រែដោយ Duy Hoan