លោក Vuong Dinh Hue ប្រធានរដ្ឋសភាវៀតណាមជួបពិភាក្សាការងារជាមួយសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា

លោក Vuong Dinh Hue ប្រធានរដ្ឋសភាវៀតណាម ទទួលស្វាគមន៍សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា

នៅក្នុងកិច្ចពិភាក្សា ប្រធានរដ្ឋសភាទាំងពីរបានវាយតម្លៃថា ទំនាក់ទំនងសាមគ្គីភាព មិត្តភាព និងកិច្ចសហប្រតិបត្តិការទ្វេភាគីរវាង វៀតណាម និងកម្ពុជានាពេលកន្លងមក ត្រូវបានពង្រឹងនិងពង្រីកយ៉ាងខ្លាំងក្លានៅគ្រប់កម្រិត និងលើគ្រប់វិស័យ។ ទំនាក់ទំនងរវាងបក្សទាំងពីរនិងរដ្ឋទាំងពីរត្រូវបានពង្រឹងឥតឈប់ឈរ អភិវឌ្ឍន៍យ៉ាងស៊ីជម្រៅ និងសម្រេចបាននូវសមិទ្ធិផលសំខាន់ៗជាច្រើន ខ្លឹមសារនៃកិច្ចសហប្រតិបត្តិការបន្តត្រូវបានផ្លាស់ថ្មី និងមានប្រសិទ្ធភាព។

លោក Vuong Dinh Hue ប្រធានរដ្ឋសភាវៀតណាម និងសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា

កិច្ចសហប្រតិបត្តិការការពារជាតិ និងសន្តិសុខបន្តត្រូវបានជំរុញ និងកាន់តែជិតស្និទ្ធ និងមានប្រសិទ្ធភាព ហើយជាសសរស្តម្ភសំខាន់ក្នុងទំនាក់ទំនងរវាងប្រទេសទាំងពីរ រួមចំណែករក្សាស្ថិរភាពនយោបាយ និងសង្គម និងការអភិវឌ្ឍន៍នៃប្រទេសនីមួយៗ។ កិច្ចសហប្រតិបត្តិការសេដ្ឋកិច្ច វប្បធម៌ សង្គម និងវិទ្យាសាស្ត្រនិងបច្ចេកទេសមានការអភិវឌ្ឍយ៉ាងវិជ្ជមាន ទំហំពាណិជ្ជកម្មទ្វេភាគីបានឈានដល់ ១០ ពាន់លានដុល្លារក្នុងឆ្នាំ ២០២២។

លោក Vuong Dinh Hue បានសង្កត់ធ្ងន់ថា បក្ស រដ្ឋ និងប្រជាជនវៀតណាមតែងតែគាំទ្រយ៉ាងខ្លាំងចំពោះកម្ពុជាបន្តទទួលបានសមិទ្ធិផលថ្មីៗ និងធំធេងថែមទៀតក្នុងការអភិវឌ្ឍប្រទេសជាតិ សម្រេចបាននូវជ័យជំនះលើកម្មវិធីនយោបាយរបស់គណបក្សប្រជាជនកម្ពុជា (CPP) ដំណាក់កាល ២០២៣-២០២៨។ យុទ្ធសាស្ត្របញ្ចកោណដំណាក់កាលទី ១ ដើម្បីកម្ពុជានឹងក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ខាងមុខ និងចំណូលខ្ពស់នៅឆ្នាំ២០៥០។

លោក Vuong Dinh Hue ប្រធានរដ្ឋសភាវៀតណាម នៅកិច្ចពិភាក្សា

ប្រធានរដ្ឋសភានៃព្រះរាជាណាចក្រកម្ពុជាបានវាយតម្លៃថា ជោគជ័យរបស់ប្រទេសនីមួយៗនាពេលបច្ចុប្បន្ននេះ គឺមានការចូលរួមចំណែកពីកិច្ចសហប្រតិបត្តិការជិតស្និទ្ធរវាងប្រទេសទាំងពីរ។ គ្រប់ជំនាន់ថ្នាក់ដឹកនាំជាន់ខ្ពស់នៃប្រទេសទាំងពីរគួរតែបន្តរក្សាប្រពៃណី កិច្ចសហប្រតិបត្តិការមិត្តភាព និងការជឿទុកចិត្តគ្នា  ដើម្បីសម្រេចបាននូវគោលដៅរួម  អនុវត្តបាវចនា “អ្នកជិតខាងល្អ មិត្តភាពជាប្រពៃណី” កិច្ចសហប្រតិបត្តិការគ្រប់ជ្រុងជ្រោយ និងនិរន្តរភាពយូរអង្វែង"។ វៀតណាមតែងតែជាមិត្តល្អ និងគួរឱ្យទុកចិត្តរបស់កម្ពុជា។ ក្នុងគ្រាលំបាកបំផុត ទោះបីជាស្ថានភាពពិភពលោកមានការវិវឌ្ឍន៍ក៏គណបក្សទាំងពីរ រដ្ឋទាំងពីរនៅតែប្រកៀកស្មាគ្នាជានិច្ច។

ក្នុងឱកាសនេះ លោក Vuong Dinh Hue បានថ្លែងអំណរគុណ និងស្នើភាគីកម្ពុជាបន្តសហការ និងគាំទ្រដល់ការរុករក  ជីកគាស់ និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងអ្នកជំនាញវៀតណាមដែលពលីជីវិតកាលពីសម័យសង្គ្រាមនៅកម្ពុជា; សហការគ្នាក្នុងការកែលម្អសោភ័ណ្ឌភាព គ្រប់គ្រងស្ដូបមិត្តភាពកម្ពុជា-វៀតណាមនៅកម្ពុជា។

ប្រធានរដ្ឋសភានៃព្រះរាជាណាចក្រកម្ពុជានៅកិច្ចពិភាក្សា

ប្រធានរដ្ឋសភាទាំងពីរបានសម្តែងនូវបំណងចង់ឱ្យប្រទេសទាំងពីរជំរុញកិច្ចសហប្រតិបត្តិការលើវិស័យអប់រំ បណ្តុះបណ្តាល និងការជួបប្រាស្រ័យរវាងប្រជាជននិងប្រជាជន គមនាគមន៍ ទេសចរណ៍ សហការល្អក្នុងការគ្រប់គ្រងព្រំដែន ធានាសន្តិសុខ សុវត្ថិភាពនិងប្រឆាំងបទល្មើស បន្តពន្លឿនដំណើរការបោះបង្គោលព្រំដែនដែលនៅសេសសល់ ១៦% និងពង្រឹងការពិគ្រោះយោបល់ និងគាំទ្រជំហរគ្នាទៅវិញទៅមកនៅក្នុងវេទិកាអន្តរជាតិពហុភាគី...។

ទាក់ទិននឹងកិច្ចសហប្រតិបត្តិការសភា ប្រធានរដ្ឋសភាទាំងពីរបានឯកភាពថា ភាគីទាំងពីរនឹងបន្តកិច្ចសហប្រតិបត្តិការយ៉ាងជិតស្និទ្ធក្នុងការកសាង និងធ្វើឲ្យប្រសើរនូវប្រព័ន្ធច្បាប់ដើម្បីរក្សាស្ថិរភាពនយោបាយ និងធានាការពារជាតិ សន្តិសុខ អភិវឌ្ឍន៍សេដ្ឋកិច្ចសង្គម និងលើកកំពស់កិត្យានុភាពអន្តរជាតិនៃប្រទេសនីមួយៗ ក៏ដូចជារក្សានិងពូនជ្រំទំនាក់ទំនងវៀតណាមនិងកម្ពុជាឲ្យកាន់តែរីកចម្រើន។

ទិដ្ឋភាពនៃកិច្ចពិភាក្សា

ភាគីទាំងពីរបានឯកភាពថានឹងរក្សាជំនួបជាន់ខ្ពស់និងគ្រប់លំដាប់ថ្នាក់ និងរវាងបណ្ដាគណៈកម្មាធិការរបស់រដ្ឋសភា ក្រុមសមាជិក​សភាវ័យក្មេង ក្រុមសមាជិកសភាស្ត្រី  និងក្រុមសមាជិកសភាមិត្តភាពនៃប្រទេសទាំងពីរដើម្បីផ្លាស់ប្តូរបទពិសោធន៍ក្នុងវិស័យនីតិបញ្ញត្តិ ត្រួតពិនិត្យនិងសម្រេចចិត្តលើរាល់បញ្ហាសំខាន់ៗរបស់ប្រទេស។ លើកកំពស់តួនាទីរបស់ស្ថាប័ននីតិបញ្ញត្តិនៃប្រទេសទាំងពីរក្នុងការលើកកម្ពស់ទំនាក់ទំនងទ្វេភាគី។ ត្រួតពិនិត្យក្រសួង ស្ថាប័ន មូលដ្ឋាន និងអាជីវកម្មដើម្បីអនុវត្តប្រកបដោយប្រសិទ្ធភាពនូវសន្ធិសញ្ញា កិច្ចព្រមព្រៀងដែលបានចុះហត្ថលេខា ព្រមទាំងបង្កើនការផ្លាស់ប្តូរព័ត៌មាន និងចែករំលែកបទពិសោធន៍ក្នុងការរៀបចំរាល់សកម្មភាពរបស់រដ្ឋសភាប្រកបដោយប្រសិទ្ធភាព៕

បកប្រែដោយ Thanh Cong