គណៈប្រតិភូនាយទាហាននៃកងយោធពលខេមរភូមិន្ទ អញ្ជើញមកបំពេញទស្សនកិច្ចការងារនៅកាសែតកងទ័ពប្រជាជនវៀតណាម

លោកវរសេនីយ៍ឯក Le Ngoc Long ថ្លែងមតិក្នុងជំនួបធ្វើការ

នៅក្នុងជំនួប លោកវរសេនីយ៍ឯក Le Ngoc Long អគ្គនិពន្ធនាយករងនៃកាសែតកងទ័ពប្រជាជនវៀតណាម បានសម្តែងនូវសេចក្តីរីករាយយ៉ាងខ្លាំងដោយបានទទួលស្វាគមន៍គណៈប្រតិភូនាយទាហាននៃកងយោធពលខេមរភូមិន្ទមកទស្សានា និងធ្វើការ។ លោកអគ្គនិពន្ធនាយករងបានជូនពរឱ្យគណៈប្រតិភូទទួលបានលទ្ធផលខ្ពស់ ស្រូបយកចំណេះដឹង និងបទពិសោធន៍ដ៏ល្អបានច្រើន ព្រមទាំងមានអនុស្សាវរីយ៍ល្អៗជាច្រើនក្នុងអំឡុងពេលចូលរួមវគ្គបំប៉នជំនាញខាងប្រវត្តិសាស្រ្តយោធានៅវៀតណាម។ លោកក៏បានអះអាងថា ដំណើរទស្សនកិច្ចរបស់គណៈប្រតិភូនាយទាហាននៃកងយោធពលខេមរភូមិន្ទ មកកាន់កាសែតកងទ័ពប្រជាជនវៀតណាមលើកនេះ ពិតជារួមចំណែកពូនជ្រំទំនាក់ទំនងសាមគ្គីភាព និងមិត្តភាពរវាងកងទ័ពនៃប្រទេសទាំងពីរ វៀតណាម-កម្ពុជា ឱ្យកាន់តែជិតស្និទ្ធ ស៊ីជម្រៅថែមទៀត។

ទិដ្ឋភាពនៃជំនួបធ្វើការរវាងគណៈប្រតិភូទាំងពីរ

ក្នុងឱកាសនេះ លោកវរសេនីយ៍ឯក Le Ngoc Long បានបង្ហាញណែនាំយ៉ាងសង្ខេបអំពីដំណើរការរហូតក្នុងរយៈពេលជាង ៧០ ឆ្នាំនៃការកសាង និងការអភិវឌ្ឍរបស់កាសែតកងទ័ពប្រជាជនតាំងពីត្រូវបានបង្កើតឡើងមកម៉្លេះ។ ដោយអនុវត្តយ៉ាងខ្ជាប់ខ្ជួននូវគោលនយោបាយការបរទេសបើកចំហររបស់បក្ស រដ្ឋ និងកងទ័ពវៀតណាម កាសែតកងទ័ពប្រជាជនតែងតែផ្សព្វផ្សាយអំពីស្ថានភាពក្នុងប្រទេស អំពីទឹកដីវៀតណាមដ៏ស្រស់ស្អាត ប្រជាជនវៀតណាមរាក់ទាក់រួសរាយ គោលនយោបាយដ៏ត្រឹមត្រូវ និងសមិទ្ធផលដ៏លេចធ្លោរបស់ប្រទេសជាតិ។ ក្រៅពីនោះកាសែតកងទ័ពក៏បានផ្សព្វផ្សាយយ៉ាងសកម្មអំពីស្ថានភាពពិភពលោក អំពីប្រទេសជិតខាង ហើយក៏ជំរុញយ៉ាងខ្លាំងទៅលើការផ្សព្វផ្សាយឃោសនាអំពីទំនាក់ទំនងសាមគ្គីភាព មិត្តភាពរវាងវៀតណាម និងកម្ពុជាផងដែរ។

លោកឧត្តមសេនីយ៍ទោ សាយ សក្ដិសុវុទ្ធី មានប្រសាសន៍ក្នុងជំនួបធ្វើការ

ជាការឆ្លើយតប លោកឧត្តមសេនីយ៍ទោ សាយ សក្ដិសុវុទ្ធី បានថ្លែងអំណរគុណយ៉ាងស្មោះស្ម័គ្រចំពោះកាសែតកងទ័ពប្រជាជន ដែលបានទទួលស្វាគមន៍គណៈប្រតិភូយ៉ាងកក់ក្តៅបំផុត។ លោកបានអះអាងថា ដំណើរទស្សនកិច្ចការងារលើកនេះនឹងរួមចំណែកក្នុងការចែករំលែក ការផ្លាស់ប្តូរបទពិសោធន៍ និងពង្រឹងទំនាក់ទំនងសាមគ្គីភាពរវាងកងទ័ពនៃប្រទេសទាំងពីរ។

លោកវរសេនីយ៍ឯក Le Ngoc Long ប្រគល់វត្ថុអនុស្សាវរីយ៍ជូនគណៈប្រតិភូនាយទាហាននៃកងយោធពលខេមរភូមិន្ទ

នាពេលខាងមុខ លោកឧត្តមសេនីយ៍ទោ សាយ សក្ដិសុវុទ្ធី បានសម្តែងបំណងចង់ឱ្យកាសែតកងទ័ពប្រជាជន និងវិទ្យាស្ថានប្រវត្តិសាស្ត្រយោធា ក្រសួង​ការ​ពារ​ជាតិកម្ពុជា នឹងពង្រឹងកិច្ចសហប្រតិបត្តិការ ចែករំលែកព័ត៌មាន និងបទពិសោធន៍ការងារ រួមចំណែកពូនជ្រំទំនាក់ទំនងមិត្តភាពជាប្រពៃណី និងសាមគ្គីភាពរវាងវៀតណាម និងកម្ពុជា៕

បកប្រែដោយ Huyen Trang