ការផ្តល់អនុម័តលើផែនការស្តីពីការរៀបចំក្បួនព្យុហយាត្រានាវាអន្តរជាតិ និងក្បូនព្យុហយាត្រាតាមដងផ្លូវ ឆ្នាំ២០២០
កប.អនឡាញ - នាព្រឹកថ្ងៃទី ៥ ខែមីនា នៅទីក្រុងហាណូយ អគ្គសេនាធិការដ្ឋានកងទ័ពប្រជាជនវៀតណាមបានបើកកិច្ចប្រជុំផ្តល់ការអនុម័តលើផែនការរបស់កងទ័ពជើងទឹកស្តីពីការរៀបចំក្បួនព្យុហយាត្រានាវាអន្តរជាតិ និងក្បួនព្យុហយាត្រាតាមដងផ្លូវនៅឆ្នាំ២០២០។
លោកឧត្តមសេនីយ៍ឯក Phan Van Giang ប្រធានអគ្គសេនាធិការ និងជាអនុរដ្ឋមន្រ្តីក្រសួងការពារប្រទេសវៀតណាមបានធ្វើជាអធិបតីក្នុងកិច្ចប្រជុំនេះ។
នៅក្នុងកិច្ចប្រជុំនេះ បន្ទាប់ពីបានស្តាប់លោកឧត្តមនាវីទោ Pham Hoai Nam មេបញ្ជាការកងទ័ពជើងទឹករាយការណ៍អំពីផែនការរៀបចំក្បួនព្យុហយាត្រានាវាអន្តរជាតិ ក្បួនព្យុហយាត្រាតាមដងផ្លូវ និងការរៀបចំព្រឹត្តិការណ៍កិច្ចការបរទេសការពារជាតិនានារបស់កងទ័ពជើងទឹក រួមទាំងមតិយោបល់របស់ប្រតិភូទាំងឡាយ លោកឧត្តមសេនីយ៍ឯក Phan Van Giang បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងទ័ពជើងទឹក និងស្ថាប័ន អង្គភាពពាក់ព័ន្ធនានាក្នុងការកសាងសេចក្តីព្រាងផែនការនេះ។ ដោយសង្កត់ធ្ងន់ថា នេះគឺជាសកម្មភាពកិច្ចការបរទេសការពារជាតិដ៏លេចធ្លោមួយក្នុងឆ្នាំវៀតណាមជាប្រធានអាស៊ាន លោកឧត្តមសេនីយ៍ឯក Phan Van Giang បានស្នើឱ្យកងទ័ពជើងទឹកបន្តសិក្សាស្រាវជ្រាវ និងស្រូបយកមតិយោបល់របស់ប្រតិភូទាំងឡាយដើម្បីបំពេញបន្ថែមលើផែនការធានាឱ្យការរៀបចំបណ្តាសកម្មភាពប្រកបដោយឧឡារិក សុវត្ថិភាព និងសន្សំសំចៃ។
|
|
ទិដ្ឋភាពនៃកិច្ចប្រជុំ (រូបថត៖ bienphong.com.vn) |
លោកឧត្តមសេនីយ៍ឯក Phan Van Giang ក៏បានកត់សម្គាល់ដែរថា បច្ចុប្បន្ននេះការរីករាលដាលនៃជំងឺ Covid-19 កំពុងកើតឡើងយ៉ាងស្មុគស្មាញ និងមិនអាចទាយទុកជាមុនបានដែលអាចជះឥទ្ធិពលដល់សមាសភាព និងកងកម្លាំងចូលរួមរបស់កងទ័ពជើងទឹកនៃបណ្តាប្រទេស ដូច្នេះកងទ័ពជើងទឹកចាំបាច់ត្រូវសម្របសម្រួល និងសហការយ៉ាងសកម្មជាមួយប្រទេសនានាដើម្បីឯកភាពលើសមាសភាព និងកងកម្លាំងដែលចូលរួម ព្រមទាំងសហការជាមួយស្ថាប័ន និងអង្គភាពពាក់ព័ន្ធនានាធានាអនាម័យ និងប្រយុទ្ធប្រឆាំងនឹងរោគរាតត្បាត អនុវត្តប្រកបដោយប្រសិទ្ធភាពនូវការងារធានាសុខភាពសម្រាប់ប្រតិភូចូលរួមទាំងក្នុង និងក្រៅប្រទេស។
យោងតាមសេចក្តីព្រាងផែនការរបស់បញ្ជាការដ្ឋានកងទ័ពជើងទឹក សកម្មភាពសំខាន់ៗរួមមាន៖ ការរៀបចំក្បួនព្យុហយាត្រានាវាអន្តរជាតិ និងក្បូនព្យុហយាត្រាតាមដងផ្លូវ សិក្ខាសាលាអន្តរជាតិ ការជួបសម្តែងការគួរសមជាមួយថ្នាក់ដឹកនាំនៃអគ្គសេនាធិការដ្ឋាន ការផ្លាស់ប្តូរវប្បធម៌ និងទៅទស្សនាកេរ្តិ៍តំណែលប្រវត្តិសាស្ត្រ...។ ព្រឹត្តិការណ៍ទាំងនេះគ្រោងថានឹងប្រព្រឹត្តទៅនៅដើមខែឧសភា ឆ្នាំ២០២០ នៅទីក្រុង Nha Trang (ខេត្ត Khanh Hoa ភាគកណ្តាលវៀតណាម) ដោយមានការចូលរួមពី ៣០ ប្រទេស ក្នុងនោះ ១៩ ប្រទេសនឹងបញ្ជូននាវាទៅចូលរួមពិធីក្បួនព្យុហយាត្រានាវាអន្តរជាតិ៕
បកប្រែដោយ Duy Hoan