លោកនាយឧត្តមសេនីយ៍ Phan Van Giang ទទួលជួបឯកអគ្គរដ្ឋទូតអាមេនីប្រចាំវៀតណាម

លោកនាយឧត្តមសេនីយ៍ Phan Van Giang ជឿជាក់យ៉ាងមុតមាំថា អាណត្តិរបស់លោកឯកអគ្គរដ្ឋទូត Suren Baghdasaryan នឹងទទួលបានជោគជ័យ ដែលរួមចំណែកដល់ការពង្រឹងបន្ថែមទៀតនូវទំនាក់ទំនងវៀតណាម-អាមេនី។

លោកនាយឧត្តមសេនីយ៍ Phan Van Giang ទទួលជួបឯកអគ្គរដ្ឋទូតអាមេនីប្រចាំវៀតណាម

លោកនាយឧត្តមសេនីយ៍ Phan Van Giang បានសង្កត់ធ្ងន់ថា វៀតណាម និងអាមេនី មានទំនាក់ទំនងមិត្តភាពជាប្រពៃណីដ៏ល្អ ចាប់តាំងពីពេលបង្កើតទំនាក់ទំនងការទូតក្នុងឆ្នាំ ១៩៩២។ លោកនាយឧត្តមសេនីយ៍ Phan Van Giang បានសម្តែងនូវសេចក្តីសោមនស្សរីករាយដែលឃើញថា ការអភិវឌ្ឍវិជ្ជមានយ៉ាងខ្លាំងនៃទំនាក់ទំនងរវាងប្រទេសទាំងពីរ ព្រមទាំងថ្លែងអំណរគុណយ៉ាងជ្រាលជ្រៅចំពោះប្រទេសអាមេនី (កាលពីមុនអាមេនីចំណុះសហភាពសូវៀត) ចំពោះការគាំទ្រ​ និងជួយវៀតណាមក្នុងការតស៊ូដើម្បីឯករាជ្យជាតិ និងបង្រួបបង្រួមជាតិ ជាពិសេសសម្រាប់ការបណ្តុះបណ្តាល​កម្មាភិបាលវិទ្យាសាស្ត្រនិងបច្ចេកទេសវៀតណាមរាប់ពាន់នាក់។

លោកនាយឧត្តមសេនីយ៍ Phan Van Giang ប្រគល់វត្ថុអនុស្សាវរីយ៍ជូនលោក Suren Baghdasaryan

លោកនាយឧត្តមសេនីយ៍ Phan Van Giang  បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការការពារជាតិវៀតណាម-អាមេនីក្នុងរយៈពេលកន្លងមកលើគ្រប់វិស័យដូចជា៖ ឧស្សាហកម្មការពារជាតិ ការបោសសម្អាតមីនមនុស្សធម៌។ល។

លោកនាយឧត្តមសេនីយ៍ Phan Van Giang បានស្នើថា នាពេលខាងមុខ ភាគីទាំងពីរសម្របសម្រួលអនុវត្តខ្លឹមសារសហប្រតិបត្តិការសំខាន់ៗមួយចំនួន ដូចជាបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ឧស្សាហកម្មការពារជាតិ និងកិច្ចសហប្រតិបត្តិការក្នុងការបណ្តុះបណ្តាល...

ក្នុងឱកាសនេះ លោកនាយឧត្តមសេនីយ៍ Phan Van Giang បានអញ្ជើញក្រសួងការពារជាតិអាមេនីឲ្យបញ្ជូនថ្នាក់ដឹកនាំនិងសហគ្រាសឧស្សាហកម្មការពារជាតិមកចូលរួម និងតាំងបង្ហាញផលិតផលនៅក្នុងពិព័រណ៍ការពារជាតិអន្តរជាតិវៀតណាមលើកទីបី ដែលគ្រោងនឹងធ្វើឡើងនៅខែធ្នូ ឆ្នាំ២០២៦។

លោកនាយឧត្តមសេនីយ៍ Phan Van Giang និងលោក Suren Baghdasaryan រួមទាំងប្រតិភូ

រីឯលោកឯកអគ្គរដ្ឋទូត Suren Baghdasaryan បានវាយតម្លៃខ្ពស់ចំពោះតួនាទីកាន់តែសំខាន់របស់វៀតណាមនៅលើឆាកអន្តរជាតិ។ លោកឯកអគ្គរដ្ឋទូត Suren Baghdasaryan បានសង្កត់ធ្ងន់ថា អាមេនីត្រៀមខ្លួនជាស្រេចដើម្បីលើកកម្ពស់កិច្ចសហប្រតិបត្តិការជាមួយវៀតណាមក្នុងវិស័យនានា រួមទាំងវិស័យការពារជាតិផងដែរ។ លោកឯកអគ្គរដ្ឋទូត Suren Baghdasaryan បានបញ្ជាក់ថា ក្នុងឋានៈរបស់ខ្លួន លោកនឹងខិតខំចូលរួមចំណែកក្នុងការលើកកម្ពស់ទំនាក់ទំនងអាមេនី-វៀតណាមនិយាយរួមនិងកិច្ចសហប្រតិបត្តិការការពារជាតិទ្វេភាគីនិយាយដោយឡែកឲ្យកាន់តែមានប្រសិទ្ធភាព​៕

បកប្រែដោយ Pham Diep