មិត្តអន្តរជាតិចាប់អារម្មណ៍យ៉ាងខ្លាំងចំពោះស្តង់តាំងពិព័រណ៍របស់ក្រសួងការពារប្រទេសវៀតណាម

ដោយវាយតម្លៃខ្ពស់ចំពោះលទ្ធភាពរបស់ឧស្សាហកម្មការពារជាតិវៀតណាម លោកឧត្តមសេនីយ៍ត្រី លាង សុវណ្ណារ៉ា អនុព័ន្ធយោធាកម្ពុជាប្រចាំវៀតណាមបានសម្តែងការចាប់អារម្មណ៍យ៉ាងខ្លាំងចំពោះការរៀបចំ ក៏ដូចជាគុណភាពនៃផលិតផលដែលបាន​ដាក់​​តាំងពិពណ៌។ លោកឧត្តមសេនីយ៍ត្រី លាង សុវណ្ណារ៉ា ឲ្យដឹងថា៖ “ខ្ញុំបានចូលរួមការតាំងពិព័រណ៌ចំនួនពីរនៅ​វៀតណាមនាពេលថ្មីៗនេះ គឺពិព័រណ៍ការពារជាតិអន្តរជាតិវៀតណាមឆ្នាំ ២០២៤ និងពិព័រណ៍សមិទ្ធិផលជាតិ។ ទាំងនេះគឺជាការតាំងពិព័រណ៍មានទំហំធំ ជាមួយនឹងឧបករណ៍ អាវុធរាប់ពាន់មុខ និងបច្ចេកវិទ្យាថ្មីៗក្នុងវិស័យជាច្រើន។ អ្វីដែលធ្វើឱ្យខ្ញុំចាប់អារម្មណ៍បំផុតនៅពេលទៅទស្សនាការតាំងពិព័រណ៍គឺការរៀបចំ និងបរិយាកាសតាំងពិព័រណ៍ធំទូលាយដោយអាវុធ បច្ចេកវិទ្យាទំនើប​ជាច្រើន”។

លោកឧត្តមសេនីយ៍ត្រី លាង សុវណ្ណារ៉ា អនុព័ន្ធយោធាកម្ពុជាប្រចាំវៀតណាមទស្សនាស្តង់តាំងពិព័រណ៍របស់ក្រសួងការពារប្រទេសវៀតណាម

លោកអនុព័ន្ធយោធាកម្ពុជា បានលើកឡើងថា ប្រទេសវៀតណាមមានការរីកចម្រើនយ៉ាងឆាប់រហ័សក្នុងឧស្សាហកម្មការពារជាតិ។ ក្នុងរយៈពេល ៨០ ឆ្នាំ ចាប់តាំងពីទទួលបានឯករាជ្យរហូតដល់សព្វថ្ងៃនេះ អាចឃើញច្បាស់ពីការអភិវឌ្ឍន៍គួរឱ្យកត់សម្គាល់លើអាវុធ  បរិក្ខារ និងបច្ចេកទេសយោធា ក៏ដូចជាការបច្ចេកវិទ្យាផលិតផលិត​ផលការពារជាតិរបស់វៀតណាម។

បើតាមលោកឧត្តមសេនីយ៍ត្រី លាង សុវណ្ណារ៉ា អ្វីដែលតាំងបង្ហាញក្នុងពិព័រណ៍នេះមិនត្រឹមតែរួមចំណែកលើកតម្កើងប្រវត្តិសាស្ត្រដ៏ត្រចេះត្រចង់របស់កងទ័ពប្រជាជនវៀតណាមប៉ុណ្ណោះទេ ថែមទាំងបញ្ជាក់ពីកិត្យានុភាពកាន់តែកើនឡើងរបស់វៀតណាមលើឆាកអន្តរជាតិទៀតផង។

សម្រាប់លោកវរសេនីយ៍ឯក S. Muthukrishnan អនុព័ន្ធយោធាឥណ្ឌាប្រចាំវៀតណាមបានឲ្យដឹងថា ស្តង់តាំងពិព័រណ៌របស់ក្រសួងការពារប្រទេសវៀតណាម គឺជាស្តង់មួយក្នុងចំណោមស្តង់តាំងពិព័រណ៌ដែលបានបន្សល់ទុកនូវចំណាប់អារម្មណ៍យ៉ាងជ្រាលជ្រៅចំពោះគាត់នៅឯពិព័រណ៍នេះ។ លោកក៏បានដឹងដែរថា នៅក្នុងពិព័រណ៍នេះ សម្ព័ន្ធក្រុមហ៊ុនឧស្សាហកម្ម-ទូរគមនាគមន៍យោធា (Viettel) បានតាំងបង្ហាញផលិតផលបច្ចេកវិទ្យាស៊ីវិល និងយោធាចំនួន ៥០។ អនុព័ន្ធយោធាឥណ្ឌាបានបន្ថែមថា ផលិតផលរបស់ Viettel បានប្រើប្រាស់បច្ចេកវិទ្យាថ្មីៗនៃពិភពលោក។

លោកវរសេនីយ៍ឯក S. Muthukrishnan ឲ្យដឹងថា “ការតាំងពិព័រណ៍មានទំហំធំ និងមានការចាប់អារម្មណ៍យ៉ាងខ្លាំង ផលិតផលនិងបច្ចេកវិទ្យាដែលដាក់តាំងបង្ហាញដូចជា យន្តហោះគ្មានមនុស្សបើក ឆ្កែយន្តជាដើម បានបង្ហាញថា វៀតណាមពិតជាឲ្យតម្លៃដល់ការអភិវឌ្ឍន៍ឧស្សាហកម្មការពារជាតិ។ ខ្ញុំគិតថា វៀតណាម និងឥណ្ឌាមានសក្ដានុពលច្រើនក្នុងការបង្កើនកិច្ចសហប្រតិបត្តិការលើវិស័យនេះ”។

យោងតាមលោកវរសេនីយ៍ឯក S. Muthukrishnan ពិព័រណ៍សមិទ្ធិផលជាតិគឺជាឱកាសដ៏ល្អមួយដើម្បីស្វែងយល់ និងផ្លាស់ប្តូរ និងជំរុញកិច្ចសហប្រតិបត្តិការក្នុងវិស័យឧស្សាហកម្មការពារជាតិ។ បច្ចុប្បន្ន វៀតណាមនិងឥណ្ឌាបានបង្កើតទំនាក់ទំនងសហប្រតិបត្តិការការពារជាតិ និងសន្តិសុខលើវិស័យជាច្រើន ក្នុងនោះ កិច្ចសហប្រតិបត្តិការរវាងអង្គភាព (កងទ័ពជើងគោក ជើងទឹក ទ័ពអាកាស កងឆ្មាំសមុទ្រ)។    នាពេលខាងមុខ វៀតណាមនិងឥណ្ឌាអាចសិក្សាស្រាវជ្រាវដើម្បីពង្រីកកិច្ចសហប្រតិបត្តិការលើវិស័យបច្ចេកវិទ្យាមីស៊ីល បច្ចេកវិទ្យាកាំភ្លើងធំរយៈចម្ងាយឆ្ងាយ និងដំឡើងនាវា។ លោកវរសេនីយ៍ឯក S. Muthukrishnan បានបញ្ជាក់ថា "ខ្ញុំគិតថាភាគីទាំងពីរមានសក្តានុពលដ៏ធំធេងនៅក្នុងវិស័យសន្តិសុខដែនសមុទ្រ គឺជាវិស័យមួយដែលដើរតួនាទីយ៉ាងសំខាន់ក្នុងបរិបទបច្ចុប្បន្ន"។

សម្រាប់ភ្ញៀវអន្តរជាតិជាច្រើន ការឃើញឧបករណ៍និងសព្វាវុធទំនើបៗរបស់វៀតណាមគឺជាបទពិសោធន៍ដែលមិនអាចបំភ្លេចបានទេ។ លោក Hwang Sungkeun មកពីប្រទេសកូរ៉េខាងត្បូង បច្ចុប្បន្នជាគ្រូបង្រៀនភាសាកូរ៉េខាងត្បូងនៅទីក្រុងហាណូយ បានឲ្យដឹងថា តាមរយៈសារព័ត៌មាន គាត់បានដឹងពីការតាំងពិព័រណ៍សមិទ្ធិផលជាតិ ហើយបានទៅទស្សនាជាមួយមិត្ដភក្ដិនៅថ្ងៃដំបូងនៃការបើកព្រឹត្តិការណ៍នេះ។ បើទោះជាបានទៅទស្សនាការតាំងពិពណ៌ជាច្រើននៅប្រទេសវៀតណាមក៏ដោយ ប៉ុន្ដែយោងតាមលោក Hwang នេះគឺជាការតាំងពិព័រណ៍មានទំហំធំបំផុត។ លោកមានការចាប់អារម្មណ៍យ៉ាងខ្លាំងចំពោះការតាំងបង្ហាញសព្វាវុធ ឧបករណ៍បច្ចេកទេស និងផលិតផលឧស្សាហកម្មការពារជាតិរបស់វៀតណាម។ លោកបន្ថែមថា ការតាំងពិព័រណ៌នេះបានជួយឲ្យភ្ញៀវបរទេសដូចជាលោកយល់កាន់តែច្បាស់អំពីលទ្ធភាពរបស់កងកម្លាំងប្រដាប់អាវុធវៀតណាម៕

បកប្រែដោយ Pham Diep