លោកនាយឧត្តមសេនីយ៍ Phan Van Giang អញ្ជើញចុះត្រួតពិនិត្យអង្គភាពមួយចំនួននៅភាគខាងត្បូង

បន្ទាប់ពីអញ្ជើញចុះត្រួតពិនិត្យក្រុមហ៊ុនឧទ្ធម្ភាគចក្រភាគខាងត្បូង លោកនាយឧត្តមសេនីយ៍ Phan Van Giang បានកោតសរសើរចំពោះការខិតខំប្រឹងប្រែង និងសមិទ្ធផលដែលអង្គភាពសម្រចបាននាពេលកន្លងមក។  ក្រុមហ៊ុនឧទ្ធម្ភាគចក្រភាគខាងត្បូង បានលើកកំពស់មុខងាររបស់អង្គភាព រួមចំណែកលើកកំពស់កិត្យានុភាពរបស់អង្គទ័ពលេខ ១៨ ក្នុងតំបន់។

លោកនាយឧត្តមសេនីយ៍ Phan Van Giang អញ្ជើញចុះពិនិត្យទីតាំងបច្ចេកទេសរបស់ក្រុមហ៊ុនឧទ្ធម្ភាគចក្រភាគខាងត្បូង

លោករដ្ឋមន្ត្រីក្រសួងការពារប្រទេស ស្នើឱ្យអង្គទ័ពលេខ ១៨ ផ្តោតលើការបណ្តុះបណ្តាលសិក្ខាកាម ស្របតាមកម្មវិធីសិក្សា ធានាឱ្យមានការហ្វឹកហ្វឺនជាក់លាក់   និងមានកំណត់ហេតុហ្វឹកហាត់ហោះហើរ។ ទន្ទឹមនឹងនោះ អនុវត្តវិទ្យាសាស្ត្រនិងបច្ចេកវិទ្យា ក្នុងការងារបណ្ណាសារ ហើយនិងដំឡើងប្រព័ន្ធកាមេរ៉ានៅរោងបច្ចេកទេសដើម្បីតាមដានដំណើរការជួសជុល។

គួររំលឹកថា ក្នុងឱកាសអញ្ជើញចុះត្រួតពិនិត្យសណ្ឋាគារ Victory (នាយកដ្ឋានភស្តុភារ អគ្គសេនាធិការដ្ឋាននៃកងទ័ពប្រជាជន​វៀតណាម) នៅទីក្រុង Vung Tau លោកនាយឧត្តមសេនីយ៍ Phan Van Giang បានស្នើឱ្យសណ្ឋាគារត្រូវលើកកម្ពស់គុណភាពផលិតផល សេវាកម្ម សម្ភារៈបរិក្ខារ និងលើកកំពស់ជំនាញវិជ្ជាជីវៈរបស់ក្រុមសេវាកម្ម ហើយស្វាគមន៍យ៉ាងយកចិត្តទុកដាក់ចំពោះគណៈប្រតិភូមកពីកងទ័ព និងក្រៅកងទ័ព។

លោកនាយឧត្តមសេនីយ៍ Phan Van Giang ធ្វើការជាមួយថ្នាក់ដឹកនាំអង្គទ័ពលេខ១៨ និងក្រុមហ៊ុនឧទ្ធម្ភាគចក្រភាគខាងត្បូង

ក្នុងឱកាសនេះ លោកនាយឧត្តមសេនីយ៍ Phan Van Giang បានប្រគល់អំណោយ និងលើកទឹកចិត្តដល់កម្មាភិបាល និងបុគ្គលិកនៃក្រុមហ៊ុនឧទ្ធម្ភាគចក្រភាគខាងត្បូងនិងសណ្ឋាគារ Victory។

នាព្រឹកថ្ងៃដដែល នៅទីក្រុង Ba Ria-Vung Tau លោកនាយឧត្តមសេនីយ៍ Phan Van Giang និងគណៈប្រតិភូថ្នាក់ដឹកនាំបក្ស និងរដ្ឋបានអញ្ជើញដាក់កម្រងផ្កា និងអុជធូបគោរពវិញ្ញាណក្ខន្ធនៅរូបសំណាកវរជនពលី Vo Thi Sau និងចូលរួមពិធីសម្ពោធដាក់ឲ្យប្រើប្រាស់ជាផ្លូវការបណ្ដុំសំណង់សួន រូបសំណាក អាគារអនុស្សាវរីយ៍វីរជនពលី Vo Thi Sau។

បកប្រែដោយ Pham Diep