លោកនាយឧត្តមសេនីយ៍ Phan Van Giang ទទួលជួបរដ្ឋមន្ត្រីក្រសួងស្ថានការណ៍គ្រាអាសន្នសហព័ន្ធរុស្ស៊ី

លោករដ្ឋមន្ត្រី Phan Van Giang បានអះអាងថា នាពេលថ្មីៗនេះ កិច្ចសហប្រតិបត្តិការការពារជាតិទ្វេភាគីត្រូវបានអនុវត្ដប្រកបដោយប្រសិទ្ធភាព ហើយដើរតួនាទីជាសសរស្តម្ភមួយក្នុងទំនាក់ទំនងនៃប្រទេសទាំងពីរ។ ភាគីទាំងពីររក្សាប្រកបដោយប្រសិទ្ធភាពនូវយន្តការសហប្រតិបត្តិការដូចជា៖ គណៈកម្មាធិការសម្របសម្រួលអន្តររដ្ឋាភិបាលស្តីពីមជ្ឈមណ្ឌលត្រូពិចវៀត​ណាម-រុស្ស៊ី និងការសន្ទនាយុទ្ធសាស្ត្រការពារជាតិថ្នាក់អនុរដ្ឋមន្ត្រី ព្រមទាំងសម្រេចបានលទ្ធផលគួរឱ្យកត់សម្គាល់ក្នុងវិស័យ៖ ការបណ្តុះបណ្តាល កិច្ចសហប្រតិបត្តិការរវាងអង្គភាពកងទ័ព  ពេទ្យយោធា ប្រវត្តិសាស្ត្រយោធា ប្រព័ន្ធផ្សព្វផ្សាយនិងសារព័ត៌មានយោធា ...។

លោករដ្ឋមន្ត្រី Phan Van Giang និងលោក Kurenkov Aleksandr Vyacheslavovich​ រដ្ឋមន្ត្រីស្ថានការណ៍គ្រាអាសន្នសហព័ន្ធរុស្ស៊ី

លោករដ្ឋមន្ត្រី Phan Van Giang បានវាយតំលៃខ្ពស់ចំពោះតួនាទីរបស់ក្រសួងស្ថានការណ៍គ្រាអាសន្នសហព័ន្ធរុស្ស៊ី ព្រមទាំងវាយតម្លៃខ្ពស់ចំពោះខ្លឹមសារកិច្ចសហប្រតិបត្តិការដែលបានអនុវត្តដោយក្រសួងស្ថានការណ៍គ្រាអាសន្នសហព័ន្ធរុស្ស៊ី និងគណៈកម្មាធិការជាតិឆ្លើយតបនឹងឧប្បត្តិហេតុ និងគ្រោះមហន្តរាយ និងស្វែងរកនិងជួយ​សង្គ្រោះវៀត​ណាមដោយឈរលើមូលដ្ឋាន​នៃខ្លឹមសារដែលបានចុះហត្ថលេខា និងសម្រេចបាននូវលទ្ធផលលេចធ្លោ ដូចជាការផ្លាស់ប្តូរគណៈប្រតិភូ ការផ្លាស់ប្តូរបទពិសោធន៍ជំនាញ និងការបណ្តុះបណ្តាល...។

លោករដ្ឋមន្ត្រី Phan Van Giang បានសម្តែងក្តីសង្ឃឹមថា នាពេលខាងមុខ លោករដ្ឋមន្ត្រី Kurenkov Aleksandr Vyacheslavovich នឹងបន្តយកចិត្តទុកដាក់ និងដឹកនាំស្ថាប័នពាក់ព័ន្ធនៃក្រសួងស្ថានការណ៍គ្រាអាសន្នសហព័ន្ធរុស្ស៊ី ដើម្បីពង្រឹងកិច្ចសហប្រតិបត្តិការជាមួយនាយកដ្ឋានជួយសង្គ្រោះ គ្រោះមហន្ដរាយ និងអគ្គសេនាធិការដ្ឋាននៃកងទ័ពប្រជាជនវៀត​ណាម និងការិយាល័យគណៈកម្មាធិការជាតិឆ្លើយតបឧប្បត្តិហេតុ និងគ្រោះមហន្តរាយ និងស្វែងរក និងជួយសង្គ្រោះវៀតណាម ដែលក្នុងនោះផ្តោតលើវិស័យដូចជា ផ្លាស់ប្តូរគណៈប្រតិភូគ្រប់លំដាប់ថ្នាក់ ការបណ្តុះបណ្តាល ការផ្លាស់ប្តូរជំនាញ ...។

លោករដ្ឋមន្ត្រី Phan Van Giang ប្រគល់វត្ថុអនុស្សាវរីយ៍ជូនលោក Kurenkov Aleksandr Vyacheslavovich រដ្ឋមន្ត្រីក្រសួងស្ថានការណ៍គ្រាអាសន្នសហព័ន្ធរុស្ស៊ី

លោករដ្ឋមន្រ្តី Kurenkov Aleksandr Vyacheslavovich បានចែករំលែកអំពីមុខងារនិងភារកិច្ចរបស់ក្រសួងស្ថានភាពគ្រាអាសន្នសហព័ន្ធរុស្ស៊ី។ លោកសង្កត់ធ្ងន់លើកិច្ចសហប្រតិបត្តិការអន្តរជាតិជាវិស័យសំខាន់មួយនៃទីភ្នាក់ងារនេះ។ លោករដ្ឋមន្ត្រី Kurenkov Aleksandr Vyacheslavovich បានអះអាងថា សហព័ន្ធរុស្ស៊ី ត្រៀមខ្លួនចែករំលែកបទពិសោធន៍ជំនាញ ហើយមានបំណងចង់រៀនសូត្រពីបទពិសោធន៍របស់វៀតណាមក្នុងការឆ្លើយតបគ្រោះមហន្តរាយធម្មជាតិ។ លោករដ្ឋមន្ត្រី Kurenkov Aleksandr Vyacheslavovich ក៏មានបំណងចង់បន្តកិច្ចសហប្រតិបត្តិការនាពេលខាងមុខ រួមចំណែកក្នុងការកសាង​ទំនាក់ទំនងមិត្តភាពជាប្រពៃណីរវាងប្រទេសទាំងពីរឲ្យកាន់តែរីកចម្រើន និងនិរន្តរភាព៕

បកប្រែដោយ Pham Diep