ប្រធានរដ្ឋវៀតណាមប្រគល់សេចក្ដីសំរេចចិត្ត​ស្ដីពីការតំឡើងឋានន្តរសក្ដិនាយឧត្តមសេនីយ៍ដល់​លោក Phan Van Giang និងឧត្តមសេនីយ៍ឯកដល់​លោក Vu Hai San

អញ្ជើញចូលរួមពិធីមានវត្ដមានពីថ្នាក់ដឹកនាំបក្ស រដ្ឋ រួមទាំងតំណាងក្រសួង ស្ថាប័នមជ្ឈិមផងដែរ។

លោកប្រធានរដ្ឋ  Nguyen Xuan Phuc ប្រគល់សេចក្ដីសម្រេចចិត្ត​ និងផ្កាអបអរសាទលោកនាយឧត្ដមសេនីយ៍  Phan Van Giang

តាងនាមថ្នាក់ដឹកនាំបក្ស រដ្ឋ និងគណៈកម្មាធិការបក្សយោធាមជ្ឈិម លោកប្រធានរដ្ឋ Nguyen Xuan Phuc បានអបអរសាទរចំពោះលោកនាយឧត្តមសេនីយ៍ Phan Van Giang និងលោក​ឧត្តមសេនីយ៍ឯក Vu Hai San។  លោកប្រធានរដ្ឋ Nguyen Xuan Phuc បញ្ជាក់ថា នេះគឺជាក្ដីកិត្តិយស និងមោទនភាពដ៏ធំធេងរបស់កម្មាភិបាល និងយុទ្ធជននៃកងទ័ពទាំងមូលនិយាយរួម និងលោកនាយឧត្ដមសេនីយ៍ Phan Van Giang និងលោកឧត្ដមសេនីយ៍ Vu Hai San  និយាយដោយឡែក​។

លោកប្រធានរដ្ឋ Nguyen Xuan Phuc ប្រគល់សេចក្ដីសម្រេចចិត្ត​ និងផ្កាអបអរសាទរ​លោកឧត្តមសេនីយ៍ឯក Vu Hai San

លោកប្រធានរដ្ឋ Nguyen Xuan Phuc ថ្លែងនៅក្នុងពិធី

លោកប្រធានរដ្ឋ Nguyen Xuan Phuc បានអះអាងថា ការ​តំឡើងឋានន្តរសក្ដិដល់ថ្នាក់ដឹកនាំនៃក្រសួងការពារប្រទេសលើកនេះបន្ដបង្ហាញពីការយកចិត្តទុកដាក់ និងការជឿទុកចិត្តយ៉ាងជ្រាលជ្រៅរបស់បក្ស រដ្ឋ គណៈកម្មាធិការបក្សយោធាមជ្ឈិម និងក្រសួងការពារប្រទេសចំពោះលោកនាយឧត្ដមសេនីយ៍ Phan Van Giang និងលោកឧត្ដមសេនីយ៍ឯក Vu Hai San និងបញ្ជាក់ពីសាមគ្គីភាពនិងឯកភាពខ្ពស់របស់គណៈកម្មាធិការបក្សយោធាមជ្ឈិម និងថ្នាក់ដឹកនាំក្រសួងការពារប្រទេស       ហើយ​នេះជាការកត់សម្គាល់ និងការ​វាយតម្លៃខ្ពស់ចំពោះការរួមចំណែកដ៏ធំធេងរបស់លោកឧត្ដមសេនីយ៍ទាំងពីររូបក្នុងបុព្វហេតុកសាង ប្រយុទ្ធ និងរីកចម្រើនរបស់កងទ័ព។

លោកនាយឧត្តមសេនីយ៍ Phan Van Giang ថ្លែងក្នុងពិធី

លោកប្រធានរដ្ឋ Nguyen Xuan Phuc បានស្នើឲ្យបក្ខភាគកងទ័ព ក្រសួងការពារប្រទេស រួម​ទាំង​លោកនាយឧត្តមសេនីយ៍ Phan Van Giang   និងលោកឧត្តមសេនីយ៍ឯក Vu Hai San  បន្ដលើកកម្ពស់ស្មារតីសាមគ្គីភាព អនុវត្ដប្រកបដោយប្រសិទ្ធភាពនូវសេចក្តីសម្រេចចិត្តនៃមហាសន្និបាតបក្សលើកទី ១៣ និងសេចក្ដីសម្រេចចិត្ដនៃមហាសន្និបាតបក្ខភាគកងទ័ពលើកទី ១១ និងគោលនយោបាយរបស់បក្ស និងច្បាប់របស់រដ្ឋស្តីពីយោធាការពារជាតិ។ កងទ័ពទាំងមូលត្រូវ​ខិតខំប្រឹងប្រែងដើម្បីសំរេចបានគោលដៅកសាងកងទ័ពប្រជាជនវៀតណាមមានរបៀបរៀបរយ ចំណាន និងទំនើបជាបណ្ដើរៗ។

លោកប្រធានរដ្ឋ Nguyen Xuan Phuc និងថ្នាក់ដឹកនាំក្រសួងការពារប្រទេស​អបអរសាទរលោកនាយឧត្តមសេនីយ៍ Phan Van Giang និងលោក​ឧត្តមសេនីយ៍ឯក Vu Hai San

ថ្លែងក្នុងពិធី លោកនាយឧត្តមសេនីយ៍ Phan Van Giang បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំបក្ស រដ្ឋ គណៈកម្មាធិការបក្សយោធាមជ្ឈិម ក្រសួងការពារប្រទេស ក្រសួង ស្ថាប័ន មូលដ្ឋាន និងលោកប្រធានរដ្ឋផ្ទាល់។  លោកនាយឧត្តមសេនីយ៍ Phan Van Giang បានបញ្ជាក់ថានឹងលើកកម្ពស់ការទទួលខុសត្រូវក្នុងការកសាង និងពង្រឹងសាមគ្គីភាព និងឯកភាពផ្ទៃក្នុង  ហើយរួមជាមួយគណៈកម្មាធិការបក្សយោធាមជ្ឈិម ក្រសួងការពារប្រទេសអនុវត្ដប្រកបដោយប្រសិទ្ធភាពនូវសេចក្ដីសម្រេចចិត្ដនៃមហាសន្និបាតលើកទី ១៣ របស់បក្ស និងសេចក្ដីសម្រេចចិត្ដនៃមហា​​សន្និបាតបក្ខភាគកងទ័ពលើកទី ១១ និងគោលការណ៍ គោលនយោបាយរបស់បក្ស រដ្ឋស្ដីពីយោធា​ការពារជាតិ ព្រមទាំងស្រាវជ្រាវ ព្យាករណ៍ និងវាយតំលៃត្រឹមត្រូវនូវសភាពការណ៍ និងផ្ដល់យោបល់ជូនបក្ស និងរដ្ឋអំពីគោលការណ៍ឲ្យបានទាន់ពេលវេលា ​ត្រៀមខ្លួនជាស្រេច​ឆ្លើយតបប្រកបដោយប្រសិទ្ធភាពចំពោះបញ្ហាប្រឈមសន្តិសុខមិនមែនប្រពៃណី បន្តកសាងកងទ័ពប្រជាជនបដិវត្ដន៍មានរបៀបរៀបរយ ចំណាន និងទំនើបជាបណ្ដើរៗ និងបក្ខភាគកងទ័ពស្អាតស្អំ និងរឹងមាំ រួមទាំងធ្វើឲ្យបានល្អ​កិច្ចការបរទេសការពារជាតិ ឆ្លើយតបតម្រូវការ និងភារកិច្ចការពារប្រទេសជាតិ សក្តិសមនឹងការជឿទុកចិត្តរបស់បក្ស រដ្ឋ និងប្រជាជន”៕

បកប្រែដោយ​ Pham Diep