សារ និងការប្តេជ្ញាចិត្តដែលបានផ្ញើចេញពីទីក្រុងហាណូយ

បញ្ជាក់ពីតម្លៃនៃកិច្ចសហប្រតិបត្តិការពហុភាគី

ថ្លែងនៅក្នុងវគ្គបិទ លោកនាយឧត្តមសេនីយ៍ Luong Tam Quang រដ្ឋមន្ត្រីក្រសួងនគរបាលវៀតណាម បានមានប្រសាសន៍ថា ក្នុងរយៈពេលពីរថ្ងៃនៃពិធីចុះហត្ថលេខានេះ ប្រទេសចំនួន ៧២ បានចុះហត្ថលេខាជាផ្លូវការលើអនុសញ្ញានេះ។ ក្នុងក្របខ័ណ្ឌនៃសន្និសីទកម្រិតខ្ពស់ ជាមួយនឹងវគ្គពិភាក្សា និងរាល់សកម្មភាពមិនផ្លូវការបន្ថែមទៀត ប្រទេសនានាក៏បានផ្តួចផ្តើមគំនិត និងការប្តេជ្ញាចិត្តជាច្រើនដើម្បីអនុវត្តអនុសញ្ញាហាណូយប្រកបដោយប្រសិទ្ធភាព ដោយមានគោលបំណងបង្កើតការផ្លាស់ប្តូរយ៉ាងខ្លាំងនៅក្នុងសកម្មភាពនៃការបង្ការ និងប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិត។

យោងតាមលោកនាយឧត្តមសេនីយ៍ Luong Tam Quang ព្រឹត្តិការណ៍នេះសម្រេចបានលទ្ធផលឯកភាពគ្នាចំនួន ៣ ជាពិសេសអនុសញ្ញាហាណូយ ត្រូវបានអនុម័តដោយការឯកភាពគ្នា ហើយភាពជោគជ័យនៃពិធីចុះហត្ថលេខាបានបញ្ជាក់ជាថ្មីនូវតួនាទីស្នូលរបស់អង្គការសហប្រជាជាតិ ក៏ដូចជាតួនាទីនៃការពង្រឹងកិច្ចសហប្រតិបត្តិការអន្តរជាតិ ដើម្បីដោះស្រាយបញ្ហាប្រឈមជាសកល។ នេះក៏បង្ហាញពីទំនុកចិត្ត និងការជឿជាក់របស់អង្គការសហប្រជាជាតិ និងសហគមន៍អន្តរជាតិចំពោះតួនាទី កិត្យានុភាព សមត្ថភាព និងការទទួលខុសត្រូវរបស់វៀតណាមជាទូទៅ និងក្រសួងនគរបាលវៀតណាមជាពិសេសក្នុងការដោះស្រាយបញ្ហាសកល ជាពិសេសការការពារសន្តិសុខតាមអ៊ីនធឺណិត សម្រាប់លំហអ៊ីនធឺណិតដែលមានសុវត្ថិភាព មនុស្សធម៌ និងប្រកបដោយចីរភាព។ លើសពីនេះ អនុសញ្ញានេះក៏បញ្ជាក់ពីតម្លៃនៃកិច្ចសហប្រតិបត្តិការពហុភាគី ការសន្ទនាស្មើភាពគ្នា និងការគោរពអធិបតេយ្យភាពជាតិ ដើម្បីធានាថាលំហអ៊ីនធឺណិតពិតជាក្លាយជាបរិយាកាសដែលបម្រើសន្តិភាព យុត្តិធម៌ និងការអភិវឌ្ឍប្រកបដោយចីរភាព បើកឱកាសថ្មីៗសម្រាប់កិច្ចសហប្រតិបត្តិការកាន់តែប្រសើរឡើង ពង្រឹងទំនុកចិត្ត និងលើកកម្ពស់វឌ្ឍនភាពរួមរបស់មនុស្សជាតិ។ លោកនាយឧត្តមសេនីយ៍ Luong Tam Quang បានបញ្ជាក់ថា វៀតណាមប្តេជ្ញាអនុវត្តកាតព្វកិច្ចដែលមានចែងក្នុងអនុសញ្ញានេះយ៉ាងពេញលេញ ធ្ងន់ធ្ងរ និងមានទំនួលខុសត្រូវ បង្កើនកិច្ចសហប្រតិបត្តិការទ្វេភាគី និងពហុភាគី សម្របសម្រួលសកម្មភាពជាមួយប្រទេសជាសមាជិកក្នុងការទប់ស្កាត់ និងប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិត និងអំពាវនាវដល់រាល់ប្រទេស អង្គការ និងអាជីវកម្មនានាឱ្យពង្រឹងកិច្ចសហប្រតិបត្តិការដើម្បីអនុវត្តអនុសញ្ញានេះប្រកបដោយប្រសិទ្ធភាពតាមរយៈការចែករំលែកបទពិសោធន៍ បច្ចេកវិទ្យា និងធនធាន ជាពិសេសសម្រាប់ប្រទេសកំពុងអភិវឌ្ឍ។

ប្រតិភូអញ្ជើញថតរូបជាអនុស្សាវរីយ៍ក្នុងឱកាសអញ្ជើញចូលរួមពិធីចុះហត្ថលេខាអនុសញ្ញាហាណូយ

ការចាប់ផ្តើមធ្វើសកម្មភាព

នៅក្នុងក្របខ័ណ្ឌនៃពិធីចុះហត្ថលេខាអនុសញ្ញា បានប្រព្រឹត្តទៅសកម្មភាព និងកិច្ចពិភាក្សាជាបន្តបន្ទាប់ជាមួយនឹងប្រធានបទសំខាន់ៗ ដែលឆ្លុះបញ្ចាំងយ៉ាងច្បាស់អំពីស្ថានភាពបច្ចុប្បន្ននៃសន្តិសុខតាមអ៊ីនធឺណិតដូចជា៖ ការការពារពលរដ្ឋក្នុងយុគសម័យនៃការផ្លាស់ប្តូរឌីជីថល; កិច្ចសហប្រតិបត្តិការអន្តរជាតិក្នុងការទប់ស្កាត់ និងប្រយុទ្ធប្រឆាំងនឹងឧក្រិដ្ឋកម្មក្លែងបន្លំតាមអ៊ីនធឺណិត; តួនាទីរបស់វេទិកាអនឡាញក្នុងការការពារកុមារ និងក្មេងជំទង់ពីឧក្រិដ្ឋកម្មតាមអ៊ីនធឺណិត...

ប្រការនោះបង្ហាញថា សន្តិសុខតាមអ៊ីនធឺណិតពិតជាបញ្ហាដ៏ក្តៅគគុក និងមានឥទ្ធិពលយ៉ាងទូលំទូលាយលើវិស័យជាច្រើននៅក្នុងប្រទេសជាច្រើនជុំវិញពិភពលោក ហើយការបង្កើតអនុសញ្ញាហាណូយ បានបំពេញតាមការរំពឹងទុក និងតម្រូវការរបស់ប្រទេសនានា ជាពិសេសនៅពេលដែលឧក្រិដ្ឋកម្មតាមអ៊ីនធឺណិតកំពុងកើនឡើងគួរឱ្យព្រួយបារម្ភទាក់ទងនឹងទំហំ ល្បឿន និងវិសាលភាពនៃសកម្មភាពឧក្រិដ្ឋ។

រាល់បញ្ហាដែលបានលើកឡើងក្នុងពិធីចុះហត្ថលេខា និងសន្និសីទកម្រិតខ្ពស់នៃអនុសញ្ញាហាណូយ ក៏បង្ហាញផងដែរថា ប្រទេសជាច្រើនមានចំណាប់អារម្មណ៍យ៉ាងខ្លាំងក្នុងការដោះស្រាយបញ្ហាទាក់ទងនឹងឧក្រិដ្ឋកម្មតាមអ៊ីនធឺណិតទូទៅនាពេលបច្ចុប្បន្ន ដូចជាការក្លែងបន្លំ ការជំរិតទារប្រាក់ ការលាងលុយកខ្វក់ ការលួចទ្រព្យសម្បត្តិ និងទិន្នន័យ និងព័ត៌មានមានតម្លៃ ការរំលោភបំពានលើកុមារតាមអ៊ីនធឺណិតជាដើម។

ទោះជាយ៉ាងណាក៏ដោយ នាយក UNODC Brandolino បានមានប្រសាសន៍ថា បន្ទាប់ពីពិធីចុះហត្ថលេខានៅទីក្រុងហាណូយ ភារកិច្ចរបស់ប្រទេសនានាឥឡូវនេះគឺធ្វើការរួមគ្នាដើម្បីធ្វើឱ្យអនុសញ្ញានេះឱ្យចូលជាធរមាន និងអនុវត្តជាក់ស្តែង។ ចែករំលែកជាមួយអ្នកសារព័ត៌មាននៅខាងក្រៅពិធីចុះហត្ថលេខា ឯកអគ្គរដ្ឋទូតអង់គ្លេសប្រចាំប្រទេសវៀតណាម Iain Frew ក៏បានមានប្រសាសន៍ថា បច្ចេកវិទ្យានឹងបន្តអភិវឌ្ឍ ដូច្នេះវាចាំបាច់ក្នុងការធានាថា នៅក្នុងដំណើរការនៃការអនុវត្តអនុសញ្ញាហាណូយ ប្រទេសនានាមិនត្រឹមតែអនុវត្តអ្វីដែលបានព្រមព្រៀងគ្នាប៉ុណ្ណោះទេ ប៉ុន្តែត្រូវតែបន្តពង្រីកកិច្ចសហប្រតិបត្តិការជាមួយភាគីពាក់ព័ន្ធជាច្រើនដើម្បីពង្រឹងការប្តេជ្ញាចិត្តដែលមានចែងក្នុងអនុសញ្ញាទៀតផង។

ស្លាកស្នាមរបស់វៀតណាម

នៅក្នុងសន្និសីទសារព័ត៌មានអន្តរជាតិបន្ទាប់ពីវគ្គបិទបញ្ចប់ លោកឧត្តមសេនីយ៍ឯក Pham The Tung អនុរដ្ឋមន្ត្រីក្រសួងនគរបាលវៀតណាម បានមានប្រសាសន៍ថា ប្រធានគណៈប្រតិភូដែលចូលរួមក្នុងពិធីចុះហត្ថលេខាបានកោតសរសើរយ៉ាងខ្លាំងចំពោះទស្សនៈ ការប្តេជ្ញាចិត្ត និងការតាំងចិត្តរបស់វៀតណាម ក្នុងការលើកកម្ពស់នវានុវត្តន៍ ជាពិសេសនៅក្នុងវិស័យបច្ចេកវិទ្យាឌីជីថល និងសន្តិសុខតាមអ៊ីនធឺណិត។

លើសពីនេះ មិត្តភក្តិអន្តរជាតិក៏បានកោតសរសើរចំពោះការរៀបចំដ៏ហ្មត់ចត់ ប្រកបដោយវិជ្ជាជីវៈរបស់ប្រទេសម្ចាស់ផ្ទះផងដែរ។ ការរៀបចំពិធីចុះហត្ថលេខា និងកិច្ចប្រជុំកំពូលសន្និសីទហាណូយ ត្រូវបានចាត់ទុកថាជាគំរូមួយក្នុងការរៀបចំព្រឹត្តិការណ៍អន្តរជាតិនៅវៀតណាម។

ចំពោះលោក Nguyen Minh Vu អនុរដ្ឋមន្ត្រីប្រចាំការក្រសួងការបរទេសវៀតណាម បានសង្កត់ធ្ងន់ថា តាមរយៈការធ្វើជាម្ចាស់ផ្ទះនៃពិធីចុះហត្ថលេខាដោយជោគជ័យ ទីក្រុងហាណូយបានបញ្ជាក់ពីកិត្យានុភាពរបស់ខ្លួនជាទីក្រុងសម្រាប់សន្តិភាព និងក្លាយជានិមិត្តរូបនៃការទទួលខុសត្រូវ និងការប្តេជ្ញាចិត្តជាសកល។ ព្រឹត្តិការណ៍នេះក៏រួមចំណែកដល់ការបញ្ជាក់ពីកិត្តិនាមរបស់វៀតណាម និងបង្ហាញថា វៀតណាមមិនត្រឹមតែចូលរួមប៉ុណ្ណោះទេ ប៉ុន្តែថែមទាំងបានម្ចាស់ការណែនាំ និងបង្កើតវេទិកាពហុភាគីយ៉ាងសកម្មផងដែរ ជាពិសេសនៅក្នុងវិស័យអភិបាលកិច្ចឌីជីថល និងកិច្ចសហប្រតិបត្តិការបច្ចេកវិទ្យា៕

បកប្រែដោយ Minh Trung