*លោក Kim Jong Un អគ្គលេខាបក្សពលករកូរ៉េ និងជាប្រធានកិច្ចការរដ្ឋ នៃសាធារណរដ្ឋប្រជាធិបតេយ្យប្រជាមានិតកូរ៉េ (កូរ៉េខាងជើង) បានសង្កត់ធ្ងន់ថា ការបន្តកាន់តំណែងរបស់លោក To Lam អគ្គលេខាបក្ស បង្ហាញពីការជឿទុកចិត្តខ្ពស់របស់បក្ខជនទាំងអស់នៃបក្សកុម្មុយនិស្តវៀតណាម និងប្រជាជនវៀតណាមចំពោះលោក To Lam ផ្ទាល់ ជាអ្នកដែលតែងតែខិតខំដើម្បីអភិវឌ្ឍបក្សកុម្មុយនិស្ត និងបានខិតខំជាបន្តបន្ទាប់ដើម្បីកែលម្អជីវភាពរស់នៅរបស់ប្រជាជនវៀតណាម។

leftcenterrightdel
លោក To Lam អគ្គលេខាបក្ស តាងនាមគណៈកម្មធិការមជ្ឈិមបក្ស នីតិកាលលើកទី១៤ ថ្លែងសុន្ទរកថានៅក្នុងសម័យបិទមហាសន្និបាត លើកទី១៤ របស់បក្សកុម្មុយនិស្តវៀតណាម (រូបថត៖ vnanet.vn)

លោក Kim Jong Un អគ្គលេខាបក្ស បានសម្តែងទំនុកចិត្តថា គណៈកម្មាធិការមជ្ឈិមបក្សកុម្មុយនិស្តវៀតណាម នីតិកាលទី១៤  ក្រោមការដឹកនាំរបស់លោក To Lam អគ្គលេខាបក្ស នឹងអនុវត្តសេចក្តីសម្រេចចិត្តរបស់មហាសន្និបាត នីតិកាលទី១៤ ដោយជោគជ័យ។

ក្នុងឱកាសនេះ លោក Kim Jong Un អគ្គលេខាបក្ស បានជូនពរឲ្យចំណងមិត្តភាពជាប្រពៃណី និងកិច្ចសហប្រតិបត្តិការរវាងបក្សទាំងពីរ និងប្រទេសទាំងពីរ វៀតណាម និងកូរ៉េខាងជើង នឹងបន្តអភិវឌ្ឍជាក់ស្តែង​ និងមានប្រសិទ្ធភាពលើគ្រប់វិស័យ ស្របតាមស្មារតីនៃកិច្ចព្រមព្រៀងសហប្រតិបត្តិការដែលបានគូសបញ្ជាក់នៅក្នុងកិច្ចប្រជុំកំពូលវៀតណាម-កូរ៉េខាងជើង កាលពីខែតុលា ឆ្នាំ២០២៥។

*លោក Mahmoud Abbas ប្រធានាធិបតីប៉ាឡេស្ទីន ប្រធានគណៈកម្មាធិការប្រតិបត្តិនៃអង្គការរំដោះប៉ាឡេស្ទីន (PLO) បានសង្កត់ធ្ងន់ថា ការដែលលោក To Lam ត្រូវបានបោះឆ្នោតជ្រើសតាំងសាជាថ្មីជាអគ្គលេខានៃគណៈកម្មាធិការមជ្ឈិមបក្សកុម្មុយនិស្តវៀតណាម បាន​ឆ្លុះបញ្ចាំងពីការជឿទុកចិត្តយ៉ាងខ្លាំង និងការគោរពដ៏ខ្ពង់ខ្ពស់បំផុត ដែលគណៈដឹកនាំបក្ស និងប្រជាជនវៀតណាម ជូន​​ចំពោះសមត្ថភាពដឹកនាំ និងប្រាជ្ញានយោបាយរបស់លោក។

លោក Mahmoud Abbas ប្រធានាធិបតីរដ្ឋប៉ាឡេស្ទីន បានអបអរសាទរចំពោះភាពជោគជ័យដ៏ធំធេងនៃមហាសន្និបាត លើកទី១៤ របស់បក្សកុម្មុយនិស្តវៀតណាម ព្រមទាំងបញ្ជាក់ថា ការសម្រេចចិត្ត និងការតម្រង់ទិសនានា ដែលបានអនុម័តដោយមហាសន្និបាត នឹងបន្តជម្រុញវឌ្ឍនភាព ការអភិវឌ្ឍ និងវិបុលភាព ដែលសាធារណរដ្ឋសង្គមនិយមវៀតណាមសម្រេចបាន។

លោកប្រធានាធិបតីបានសម្តែងមោទនភាពចំពោះទំនាក់មិត្តភាពជាប្រវត្តិសាស្ត្រដែលភ្ជាប់ប្រជាជននិងប្រទេសទាំងពីរ ហើយសង្ឃឹមថា តាមរយៈការសម្របសម្រួលយ៉ាងជិតស្និទ្ធជាមួយលោក To Lam អគ្គលេខាបក្ស និងថ្នាក់ដឹកនាំថ្មីនៃបក្សកុម្មុយនិស្តវៀតណាម ភាគីទាំងពីរនឹងបន្តខិតខំពង្រឹងទំនាក់ទំនងមិត្តភាព និងកិច្ចសហប្រតិបត្តិការទ្វេភាគីក្នុងវិស័យជាច្រើន ដើម្បីផលប្រយោជន៍របស់ប្រជាជននៃប្រទេសទាំងពីរ និងដើម្បីតម្លៃនៃសន្តិភាព យុត្តិធម៌ និងការអភិវឌ្ឍ។

*នៅក្នុងលិខិតអបអរសាទរ លោក កៅ គឹមហួន អគ្គលេខាធិការអាស៊ាន បានវាយតម្លៃខ្ពស់ចំពោះតួនាទីដ៏សំខាន់ និងការរួមចំណែករបស់វៀតណាមចំពោះសន្តិភាព សន្តិសុខ និងវិបុលភាពនៅក្នុងតំបន់។ ដោយបង្ហាញទំនុកចិត្តថា “ក្រោមការដឹកនាំដ៏ឈ្លាសវៃរបស់លោកអគ្គលេខាបក្ស វៀតណាមនឹងបន្តរួមចំណែកយ៉ាងសំខាន់ដល់ដំណើរការកសាងសហគមន៍អាស៊ាន និងសមាហរណកម្ម ដោយហេតុនេះរួមគ្នាសម្រេចបាននូវសេចក្តីប្រាថ្នារួមដែលមានចែងក្នុង “ចក្ខុវិស័យអាស៊ាន ២០៤៥៖ អនាគតរួមរបស់យើង”។ អគ្គលេខាធិការអាស៊ានបានបញ្ជាក់ថា លេខាធិការដ្ឋានត្រៀមខ្លួនជាស្រេចដើម្បីគាំទ្រ និងជួយវៀតណាម ក៏ដូចជាប្រទេស​​ជាសមាជិកដទៃទៀតក្នុងការលើកកម្ពស់គោលដៅ និងសេចក្តីប្រាថ្នាដែលបានឯកភាពគ្នា។

*លោក Chem Widhya អគ្គលេខាធិការ នៃមហាសន្និបាតអន្តរសភាអាស៊ាន បានវាយតម្លៃខ្ពស់ចំពោះលទ្ធផលដ៏អស្ចារ្យនៃមហាសន្និបាត លើកទី១៤ រួមទាំងការបញ្ជាក់ជាថ្មីនូវគោលដៅអភិវឌ្ឍន៍ជាយុទ្ធសាស្ត្រ ដោយសង្កត់ធ្ងន់លើអាទិភាពនៃកំណែទម្រង់ច្បាប់និងស្ថាប័ន និងការផ្លាស់ប្តូរថ្មីក្នុងប្រតិបត្តិការសភា ក៏ដូចជាការតំរង់ទិសនៃការផ្លាស់ប្តូរសេដ្ឋកិច្ចសង្គមឆ្ពោះទៅរកនិរន្តរភាព និងជឿជាក់ថាលទ្ធផលទាំងនេះនឹងបង្កើតមូលដ្ឋានគ្រឹះរឹងមាំសម្រាប់វៀតណាមដើម្បីបន្តអភិវឌ្ឍបន្ថែមទៀត។

លោក Chem Widhya អគ្គលេខាធិការ បានសម្តែងទំនុកចិត្តថា “ក្រោមការដឹកនាំដ៏ឈ្លាសវៃរបស់ លោក To Lam អគ្គលេខាបក្សនោះ​ វៀតណាមនឹងបន្តពង្រីកសមិទ្ធផលនៃកិច្ចការផ្លាស់ប្តូរថ្មី ឆ្ពោះទៅរកការសម្រេចបាននូវចក្ខុវិស័យអភិវឌ្ឍន៍ឆ្នាំ២០៤៥ ខណៈពេលដែលបន្ត​ដើរតួនាទីយ៉ាងសំខាន់ និងសកម្ម ក្នុងការជម្រុញសន្តិភាព ស្ថិរភាព និងវិបុលភាពនៅក្នុងតំបន់។

លោកអគ្គលេខាធិការ AIPA បានសម្តែងក្តីសង្ឃឹមថា “លេខាធិការដ្ឋាន AIPA នឹងបន្តសហការយ៉ាងជិតស្និទ្ធជាមួយវៀតណាម ដើម្បីលើកកម្ពស់កិច្ចសហប្រតិបត្តិការសម្រាប់មិត្តភាព សាមគ្គីភាព និងការយល់ដឹងគ្នាទៅវិញទៅមក ក៏ដូចជាដើម្បីសម្រេចនូវសេចក្តីប្រាថ្នាដើម្បីអាស៊ានមួយដែលមានសន្តិភាព វិបុលភាព និងយកប្រជាជនជាស្នូល”៕

បកប្រែដោយ Duy Hoan