អបអរសាទរខួប ១០ ឆ្នាំ នៃការចុះហត្ថលេខាលើកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ

នៅក្នុងព្រឹត្តិការណ៍នេះ លោក Olivier Brochet ឯកអគ្គរដ្ឋទូតបារាំងប្រចាំប្រទេសវៀតណាម បានបញ្ជាក់ថា បន្ទាប់ពីចុះហត្ថលេខាអស់រយៈពេល ១០ ឆ្នាំ កិច្ចព្រមព្រៀងទីក្រុងប៉ារីសកំពុងបង្ហាញឱ្យឃើញពីប្រសិទ្ធភាព។ ជាក់ស្តែង​គឺថា នៅឆ្នាំ ២០១៥ ពិភពលោកកំពុងស្ថិតនៅលើគន្លងនៃការឡើងកំដៅជាមធ្យម ៤ អង្សាសេក្នុងមួយឆ្នាំ។ រហូតមកដល់បច្ចុប្បន្ន តួលេខនេះកំពុងថយចុះបន្តិចម្តងៗមកត្រឹម ២.៣-២.៥ អង្សាសេ ទោះបីជានៅតែខ្ពស់ជាងគោលដៅ ២ អង្សាសេក៏ដោយ វាគឺជាសញ្ញាវិជ្ជមានមួយដែលបង្ហាញថា យើងកំពុងខិតជិតដល់គោលដៅដែលបានកំណត់។

លោក Olivier Brochet ឯកអគ្គរដ្ឋទូតបារាំងប្រចាំប្រទេសវៀតណាម មានប្រសាសន៍នៅក្នុងព្រឹត្តិការណ៍នេះ

លើសពីនេះ ការផ្លាស់ប្តូរទៅជាគំរូសង្គម និងពិភពលោកមួយ​ដែលមានការបំភាយកាបូនទាបកំពុងបង្កើនល្បឿនយ៉ាងខ្លាំង។ លោក Olivier Brochet ឯកអគ្គរដ្ឋទូត បានសង្កត់ធ្ងន់ថា "ឆ្នាំនេះ ទឹកប្រាក់ចំនួន ២ ពាន់ពាន់លានដុល្លារត្រូវបានវិនិយោគលើការកាត់បន្ថយកាបូនទូទាំងពិភពលោក ដែលកើនឡើងទ្វេដង បើប្រៀប​ធៀប​នឹង​ការវិនិយោគលើឥន្ធនៈហ្វូស៊ីល"។ លោកក៏បានកត់សម្គាល់ថា ប្រសិទ្ធភាពនៃកិច្ចព្រមព្រៀងនេះក៏ស្ថិតនៅក្នុងភាពយុត្តិធម៌របស់វា ហើយនិង "ការមិនដាក់ប្រទេសអភិវឌ្ឍន៍ប្រឈមមុខនឹងប្រទេសកំពុងអភិវឌ្ឍន៍ផងដែរ"។

លោក Tang The Cuong ប្រធាននាយកដ្ឋានប្រែប្រួលអាកាសធាតុ ក្រសួងកសិកម្ម និងបរិស្ថាន មានប្រសាសន៍នៅក្នុងព្រឹត្តិការណ៍

ថ្លែងនៅក្នុងព្រឹត្តិការណ៍នេះ លោក Tang The Cuong ប្រធាននាយកដ្ឋានប្រែប្រួលអាកាសធាតុ ក្រសួងកសិកម្ម និងបរិស្ថានវៀតណាម​ បានមានប្រសាសន៍ថា បន្ទាប់ពីការអនុវត្តកិច្ចព្រមព្រៀងទីក្រុងប៉ារីសអស់រយៈពេល ១០ ឆ្នាំ ប្រទេសវៀតណាមសម្រេចបានលទ្ធផលដំបូងដ៏សំខាន់ក្នុងការអនុវត្តកិច្ចព្រមព្រៀងនេះ ដោយហេតុនេះបានចូលរួមបន្តិចម្តងៗនៅក្នុងឆាកអន្តរជាតិលើការកាត់បន្ថយការបំភាយឧស្ម័នផ្ទះកញ្ចក់ ទីផ្សារកាបូន និង​ការបង្កើនភាពប្រកួតប្រជែងនៃខឿន​សេដ្ឋកិច្ច ទន្ទឹមនឹងនោះ លើកកំពស់ភាពធន់ និងសមត្ថភាពឆ្លើយតបទៅនឹងការប្រែប្រួលអាកាសធាតុ។

ភ្ញៀវកិត្តិយសដែលចូលរួមក្នុងព្រឹត្តិការណ៍

ប្រតិភូទស្សនាការតាំងពិព័រណ៍រូបថត ដើម្បីរំលឹកខួប ១០ ឆ្នាំ នៃការចុះហត្ថលេខាលើកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ

ប្រទេសវៀតណាមបានផ្លាស់ប្តូរពីប្រទេសដែលមានអកម្មក្នុងការឆ្លើយតបទៅជាប្រទេសដែលមានភាពសកម្មក្នុងការឆ្លើយតប រួមទាំងមានភាពជាប់លាប់ចំពោះគោលដៅសម្រេចបាននូវការបំភាយឧស្ម័នសុទ្ធសូន្យនៅឆ្នាំ ២០៥០។ នេះគឺជាលទ្ធផលនៃការប្តេជ្ញាចិត្តខាងនយោបាយយ៉ាងខ្លាំងក្លា កិច្ចខិតខំប្រឹងប្រែងរួមគ្នានៃប្រព័ន្ធនយោបាយទាំងមូល និងការចូលរួមពីសង្គមទាំងមូល ជាពិសេសការគាំទ្រពីវិស័យធុរកិច្ច៕

បកប្រែដោយ Duy Hoan