រុស្ស៊ីចាត់ទុកវៀតណាមជាដៃគូដែលជឿទុកចិត្ត និងសំខាន់ៗនៅក្នុងតំបន់អាស៊ីប៉ាស៊ីហ្វិក

លោក To Lam អគ្គលេខាបក្ស ទទួលជួបលោក Sergei Shoigu លេខាធិការក្រុមប្រឹក្សាសន្តិសុខសហព័ន្ធរុស្ស៊ី (រូបថត៖ VNA)

លោក To Lam អគ្គលេខាបក្ស  បានវាយតម្លៃខ្ពស់ចំពោះខ្លឹមសារសហប្រតិបត្តិការជាក់ស្តែងដែលបានព្រមព្រៀងគ្នាដោយភាគីទាំងពីរ ជាពិសេសនៅក្នុងវិស័យប្រយុទ្ធប្រឆាំងនឹងឧក្រិដ្ឋកម្មឆ្លងដែន ការប្រឆាំងភេរវកម្ម សន្តិសុខតាមអ៊ីនធឺណិត សន្តិសុខមិនមែនប្រពៃណី ការផ្លាស់ប្តូរព័ត៌មានយុទ្ធសាស្ត្រ និងការបណ្តុះបណ្តាលកម្មាភិបាល។ លោកអគ្គលេខាបក្សបានសង្កត់ធ្ងន់ថា វៀតណាមបានត្រៀមខ្លួនរួចជាស្រេចដើម្បីលើកកម្ពស់ និងដើរតួជាស្ពាន និងច្រកទ្វារសម្រាប់សហព័ន្ធរុស្ស៊ី ដើម្បីពង្រឹងកិច្ចសហប្រតិបត្តិការលើគ្រប់វិស័យជាមួយអាស៊ាន និងបណ្តាប្រទេសជាសមាជិក។

ចំណែកលោក Sergey Shoigu លេខាធិការក្រុមប្រឹក្សាសន្តិសុខនៃសហព័ន្ធរុស្ស៊ី បានបញ្ជាក់ថា រុស្ស៊ីចាត់ទុកវៀតណាមជាដៃគូជឿទុកចិត្ត និងសំខាន់ៗនៅក្នុងតំបន់អាស៊ីប៉ាស៊ីហ្វិក។ លោកក៏បានបញ្ជាក់ពីការត្រៀមខ្លួនរបស់រុស្ស៊ីក្នុងការគាំទ្រ ចែករំលែកបទពិសោធន៍ និងពង្រីកកម្មវិធីសហប្រតិបត្តិការថ្មីៗដែលសមស្របទៅនឹងលក្ខខណ្ឌរបស់ភាគីនីមួយៗ។

ទិដ្ឋភាពនៃជំនួប (រូបថត៖ VNA)

ភាគីទាំងពីរបានឯកភាពគ្នាពង្រីកកិច្ចសហប្រតិបត្តិការក្នុងវិស័យថាមពល ប្រេង និងឧស្ម័ន កសិកម្ម ការផលិតគ្រឿងចក្រ និងបច្ចេកវិទ្យាខ្ពស់ លើកកម្ពស់កម្មវិធីសហប្រតិបត្តិការវិទ្យាសាស្ត្រ ការផ្ទេរបច្ចេកវិទ្យា និងការស្រាវជ្រាវរួមគ្នា និងផ្តល់អាទិភាពដល់កិច្ចសហប្រតិបត្តិការក្នុងការអប់រំ និងបណ្តុះបណ្តាលធនធានមនុស្សដែលមានគុណភាពខ្ពស់។ ភាគីទាំងពីរនឹងបន្តលើកកម្ពស់ការផ្លាស់ប្តូរវប្បធម៌ និងសិល្បៈ ទេសចរណ៍ និងការផ្លាស់ប្តូរអ្នកប្រាជ្ញ និងនិស្សិត៕

បកប្រែដោយ Thanh Cong