ឡាវមានមោទនភាពចំពោះប្រទេសវៀតណាម ដែលជាបងប្អូនជិតស្និទ្ធ

យោងតាមលោកស្រី Khamphao Ernthavanh ដំណើរទស្សនកិច្ចរបស់លោក To Lam អគ្គលេខាបក្ស បង្ហាញពីការយកចិត្តទុកដាក់ពិសេសរបស់វៀតណាមចំពោះប្រទេសឡាវ។ ព្រឹត្តិការណ៍នេះបញ្ជាក់ថា នៅក្នុងគោលនយោបាយការបរទេសរបស់ខ្លួន វៀតណាមតែងតែផ្តល់អាទិភាពកំពូលដល់ទំនាក់ទំនងជាមួយឡាវ។ ការណ៍នេះមានអត្ថន័យដ៏សំខាន់នៅក្នុងបរិបទនៃការអភិវឌ្ឍដ៏ស្មុគស្មាញនៃស្ថានភាពតំបន់ និងពិភពលោក ដែលបង្ហាញពីការប្តេជ្ញាចិត្តរបស់បក្សទាំងពីរ និងរដ្ឋទាំងពីរក្នុងការរក្សា និងអភិវឌ្ឍទំនាក់ទំនងដ៏ល្អ ស្មោះត្រង់ និងកម្រមាន។ ដំណើរទស្សនកិច្ចនេះក៏នឹងបង្កើតកម្លាំងចលករថ្មីសម្រាប់កិច្ចសហប្រតិបត្តិការជាយុទ្ធសាស្ត្ររវាងប្រទេសទាំងពីរផងដែរ ដោយសារភាគីទាំងពីរនឹងពិនិត្យឡើងវិញ និងជម្រុញការអនុវត្តកិច្ចព្រមព្រៀងកម្រិតខ្ពស់ ដាក់ទិសដៅថ្មីនៃកិច្ចសហប្រតិបត្តិការស្របតាមលក្ខខណ្ឌជាក់ស្តែងរបស់ប្រទេសនីមួយៗ។

លោក To Lam  អគ្គលេខាបក្ស និងលោក Thongloun Sisoulith អគ្គលេខាបក្ស និងជាប្រធានរដ្ឋឡាវ (រូបថត៖ vnanet.vn)

លោកស្រី Khamphao Ernthavanh បានសង្កត់ធ្ងន់ថា “យើងរំពឹងថាដំណើរទស្សនកិច្ចលើកនេះរបស់លោក  To Lam អគ្គលេខាបក្ស នឹងបង្កើតកម្លាំងចលករ និងចក្ខុវិស័យថ្មីសម្រាប់ទំនាក់ទំនងទ្វេភាគី។ នេះជារយៈពេលដែលវៀតណាម និងឡាវកំពុងឆ្ពោះទៅរកគោលដៅអភិវឌ្ឍន៍សំខាន់ៗ។ យើងជឿជាក់ថា លទ្ធផលនៃដំណើរទស្សនកិច្ចនេះនឹងរួមចំណែកដល់ការពង្រឹងទំនុកចិត្តខាងនយោបាយ បើកទិសដៅថ្មីសម្រាប់កិច្ចសហប្រតិបត្តិការ បង្កើតលក្ខខណ្ឌអំណោយផលសម្រាប់ប្រទេសទាំងពីរអភិវឌ្ឍក្នុងសម័យកាលថ្មីដែលមានឱកាសជាច្រើនផង និងបញ្ហាប្រឈមជាច្រើនផងដែរ”។

លោកស្រី Khamphao Ernthavanh បានកត់សម្គាល់ថា ការដែលលោក Sonexay Siphandone នាយករដ្ឋមន្រ្តី និងលោក Pham Minh Chinh នាយករដ្ឋមន្រ្តី ធ្វើជាសហប្រធាននៃកិច្ចប្រជុំលើកទី៤៨ នៃគណៈកម្មាធិការអន្តររដ្ឋាភិបាលវៀតណាម-ឡាវ បង្ហាញពីការយកចិត្តទុកដាក់ជាពិសេសរបស់ថ្នាក់ដឹកនាំជាន់ខ្ពស់ចំពោះកិច្ចសហប្រតិបត្តិការទ្វេភាគី។ ក្នុងប៉ុន្មានឆ្នាំថ្មីៗនេះ កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងឡាវ និងវៀតណាម បានបន្តអភិវឌ្ឍយ៉ាងខ្លាំង ដោយសម្រេចបានលទ្ធផលគួរឲ្យចាប់អារម្មណ៍ជាច្រើន។ គម្រោងវិនិយោគជាយុទ្ធសាស្ត្រជាច្រើនរបស់វៀតណាមត្រូវបានអនុវត្តប្រកបដោយប្រសិទ្ធភាពនៅប្រទេសឡាវ ដែលរួមចំណែកជាក់ស្តែងដល់ការអភិវឌ្ឍសេដ្ឋកិច្ចសង្គមរបស់ប្រទេសឡាវ ដោយបង្កើតលក្ខខណ្ឌអំណោយផលសម្រាប់ជម្រុញពាណិជ្ជកម្មទ្វេភាគីប្រកបដោយចីរភាព។ លោកស្រី Khamphao Ernthavanh ជឿជាក់ថា “ដោយមានការប្តេជ្ញាចិត្តរបស់រដ្ឋាភិបាលទាំងពីរ និងភាពស្វាហាប់នៃសហគមន៍ធុរកិច្ច ខ្ញុំជឿជាក់ថា កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងឡាវ និងវៀតណាម នឹងបន្តអភិវឌ្ឍយ៉ាងខ្លាំង ទូលំទូលាយ និងស៊ីជម្រៅជាងមុននាពេលអនាគត ចូលរួមចំណែកយ៉ាងសំខាន់ក្នុងការពង្រឹងទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ”។

ថ្នាក់ដឹកនាំនៃបក្ស និងរដ្ឋវៀតណាម រួមជាមួយលោកស្រី Khamphao Ernthavanh និងប្រតិភូដែលចូលរួមពិធីលៀងសាយភោជន៍ដើម្បីអបអរសាទរខួបលើកទី ៥០ នៃទិវាបុណ្យឯករាជ្យជាតិឡាវ នៅស្ថានទូតឡាវប្រចាំទីក្រុងហាណូយ នៅថ្ងៃទី ២៦ ខែវិច្ឆិកា

ដំណើរទស្សនកិច្ចការងាររបស់លោក To Lam អគ្គលេខាបក្ស និងលោក Pham Minh Chinh នាយករដ្ឋមន្ត្រី បានប្រព្រឹត្តទៅក្នុងឱកាសដែលវៀតណាម និងឡាវអបអរសាទរខួបលើកទី ៥០ នៃទិវាបុណ្យឯករាជ្យជាតិឡាវ (ថ្ងៃទី ២ ខែធ្នូ ឆ្នាំ ១៩៧៥ / ថ្ងៃទី ២ ខែធ្នូ ឆ្នាំ ២០២៥)។ លោកស្រីឯកអគ្គរដ្ឋទូត បានសង្កត់ធ្ងន់ថា ក្នុងរយៈពេលកន្លះសតវត្សរ៍កន្លងមកនេះ ក្នុងដំណើរនៃការកសាង ការពារ និងអភិវឌ្ឍប្រទេសជាតិ ឡាវតែងតែទទួលបានការជួយគាំទ្រដ៏មានតម្លៃ ស្មោះស្ម័គ្រពីប្រទេសវៀតណាម។ នេះគឺជាការលើកទឹកចិត្តដ៏មានតម្លៃ ដែលរួមចំណែកដល់ការជួយប្រជាជនឡាវយកឈ្នះលើការលំបាក និងបញ្ហាប្រឈមជាច្រើន ហើយសម្រេចបាននូវសមិទ្ធផលសំខាន់ៗ។ លោកស្រីបញ្ជាក់ថា “វៀតណាមតែងតែផ្ដល់មនោសញ្ចេតនាពិសេស ស្មោះត្រង់ និងបរិសុទ្ធដល់ប្រទេសឡាវ។ នោះគឺជាទ្រព្យសម្បត្តិដ៏មានតម្លៃរបស់ប្រទេសឡាវ។ ក្នុងឱកាសដ៏សំខាន់នេះ ក្នុងនាមបក្ស រដ្ឋ និងប្រជាជនឡាវ ខ្ញុំសូមថ្លែងអំណរគុណយ៉ាងជ្រាលជ្រៅចំពោះបក្ស រដ្ឋ និងប្រជាជនវៀតណាម ហើយសូមបញ្ជាក់ថា ឡាវតែងតែចងចាំ និងគោរពចំពោះចំណងសាមគ្គីភាពពិសេសដែលប្រជាជននសប្រទេសទាំងពីរបានខិតខំប្រឹងប្រែងពូនជ្រំ។ ប្រទេសឡាវចង់បន្តសហការជាមួយវៀតណាមដើម្បីថែរក្សា ពង្រឹង និងអប់រំអំពីទំនាក់ទំនងដ៏ស្មោះត្រង់ និងកម្រមាននេះឲ្យមនុស្សជំនាន់ក្រោយ។ ខ្ញុំជឿជាក់ថា ដោយមានមូលដ្ឋានគ្រឹះប្រវត្តិសាស្ត្រ ការជឿទុកចិត្តខាងនយោបាយដ៏រឹងមាំ និងការប្តេជ្ញាចិត្តរបស់ថ្នាក់ដឹកនាំ និងប្រជាជននៃប្រទេសទាំងពីរ ទំនាក់ទំនងឡាវ-វៀតណាមនឹងចែងចាំងពន្លឺ និងរឹងមាំ ដោយបន្តធ្វើជាគំរូនៃមិត្តភាពអន្តរជាតិ”៕

បកប្រែដោយ Thuy Anh