ទីក្រុងហូជីមិញត្រៀមខ្លួនដើម្បីក្លាយជាចំណុចតភ្ជាប់អាស៊ានជាមួយអ៊ីតាលី

ចំណុចលេចធ្លោនៃវេទិកានេះគឺការបញ្ជាក់ថា ទីក្រុងហូជីមិញបានត្រៀមខ្លួនជាចំណុចតភ្ជាប់អាស៊ានជាមួយអ៊ីតាលី។ លោក Nguyen Van Duoc ប្រធានគណៈកម្មាធិការប្រជាជនទីក្រុងហូជីមិញ បានអះអាងថា ទីក្រុងហូជីមិញមានសក្តានុពល និងលក្ខខណ្ឌគ្រប់គ្រាន់ដើម្បីក្លាយជាចំណុចតភ្ជាប់ជាយុទ្ធសាស្ត្រក្នុងកិច្ចសហប្រតិបត្តិការរវាងអ៊ីតាលី និងអាស៊ាន។ ក្នុងនាមជាមជ្ឈមណ្ឌលសេដ្ឋកិច្ច ហិរញ្ញវត្ថុ និងពាណិជ្ជកម្មធំជាងគេនៅក្នុងប្រទេស និងជាច្រកទ្វារសម្រាប់ពាណិជ្ជកម្មរបស់វៀតណាមជាមួយពិភពលោក ទីក្រុងហូជីមិញបានត្រៀមខ្លួនជាស្រេចសម្របសម្រួលជាមួយភ្នាក់ងារតំណាង អង្គការជំរុញ និងសហគមន៍ធុរកិច្ចអ៊ីតាលី ដើម្បីពង្រឹងការតភ្ជាប់ និងពង្រីកកិច្ចសហប្រតិបត្តិការសេដ្ឋកិច្ចជាមួយអាស៊ាន ដោយហេតុនោះជំរុញទំនាក់ទំនងភាពជាដៃគូយុទ្ធសាស្ត្រវៀតណាម-អ៊ីតាលីឲ្យកាន់តែស៊ីជម្រៅថែមទៀត។

ថ្នាក់ដឹកនាំទីក្រុងហូជីមិញ និងប្រតិភូ  ចូលរួមវេទិកាសន្ទនាជាន់ខ្ពស់ស្តីពីទំនាក់ទំនងសេដ្ឋកិច្ចអាស៊ាន-អ៊ីតាលីលើកទី៩ ឆ្នាំ២០២៥  (រូបថត៖ មន្ទីរការបរទេសទីក្រុងហូជីមិញ)

ទីក្រុងហូជីមិញមានគោលបំណងក្លាយជាទីក្រុងអរិយធម៌ ទំនើប ស្វាហាប់ និងសមាហរណកម្មនៅឆ្នាំ២០៣០ មានទីតាំងលេចធ្លោនៅអាស៊ីអាគ្នេយ៍ ស្ថិតក្នុងចំណោមទីក្រុងចំនួន១០០ ដែលគួរឲ្យរស់នៅលើពិភពលោក មានប្រព័ន្ធអេកូឡូស៊ីនវានុវត្តន៍ឈានមុខគេរបស់ពិភពលោក និងសម្រេចបានប្រាក់ចំណូលខ្ពស់។ នៅឆ្នាំ២០៤៥ ទីក្រុងនេះមានគោលបំណងក្លាយជាទីក្រុងធំអន្តរជាតិនៃអាស៊ីអាគ្នេយ៍ ស្ថិតក្នុងចំណោមទីក្រុងល្អបំផុតទាំង១០០ នៅលើពិភពលោក ក្លាយជាមជ្ឈមណ្ឌលសេដ្ឋកិច្ច ហិរញ្ញវត្ថុ ទេសចរណ៍ សេវាកម្ម អប់រំ និងសុខាភិបាលនៅអាស៊ី ជាគោលដៅសកលដ៏ទាក់ទាញ អភិវឌ្ឍសង្គម-វប្បធម៌ប្រកបដោយចីរភាព គុណភាពខ្ពស់ និងការធ្វើសមាហរណកម្មអន្តរជាតិយ៉ាងស៊ីជម្រៅ។

ក្នុងការពិភាក្សាជាមួយថ្នាក់ដឹកនាំទីក្រុងហូជីមិញ លោក Marco Della Seta ឯកអគ្គរដ្ឋទូតអ៊ីតាលីប្រចាំនៅវៀតណាម បានសម្តែងចំណាប់អារម្មណ៍ចំពោះការរីកចម្រើនយ៉ាងខ្លាំងក្លារបស់វៀតណាម រួមទាំងទីក្រុងហូជីមិញផងដែរ។ សហគ្រាសអ៊ីតាលីរាប់រយដែលវិនិយោគនៅក្នុងទីក្រុងនេះចង់បន្តពង្រីកសកម្មភាពវិនិយោគជាពិសេសនៅក្នុងវិស័យបច្ចេកវិទ្យាខ្ពស់ ការធ្វើបរិវត្តកម្មថាមពល ការប្រើប្រាស់ថាមពលបៃតង បច្ចេកវិទ្យាព័ត៌មាន មេកានិច។ល។ លោក Marco Della Seta បានមានប្រសាសន៍ថា សហគ្រាសអ៊ីតាលីមានប្រៀបខ្លាំងក្នុងការវិនិយោគបច្ចេកវិទ្យាខ្ពស់ និងវិស័យជាច្រើនទៀតដូចជា logistics និងការសាងសង់កប៉ាល់។ ទីក្រុងហូជីមិញកំពុងមានគោលបំណងក្លាយជាមជ្ឈមណ្ឌលហិរញ្ញវត្ថុដ៏សំខាន់មួយនៅក្នុងតំបន់ ហើយនេះក៏ជាតំបន់ដែលសហគ្រាសអ៊ីតាលីមានការចាប់អារម្មណ៍ជាពិសេសផងដែរ។

យោងតាមស្ថិតិ ប្រទេសអ៊ីតាលីបច្ចុប្បន្នគឺជាដៃគូពាណិជ្ជកម្មធំទីបីរបស់វៀតណាមនៅក្នុងសហភាពអឺរ៉ុប ដោយមានទំហំពាណិជ្ជកម្មទ្វេភាគីសម្រេចបានជាង ៤ ពាន់លានដុល្លារអាមេរិកក្នុងរយៈពេល ៦ ខែដំបូងនៃឆ្នាំ ២០២៥។ នៅទីក្រុងហូជីមិញ ប្រទេសអ៊ីតាលីជាប់ចំណាត់ថ្នាក់លេខ ២៤ ក្នុងចំណោមប្រទេស និងដែនដីចំនួន ១២៩ ដែលមានសកម្មភាពវិនិយោគដែលមានដើមទុនសរុបជិត ១៣៥ លានដុល្លារអាមេរិក។ វត្តមានរបស់ទីភ្នាក់ងារហិរញ្ញវត្ថុអ៊ីតាលីដូចជាទីភ្នាក់ងារឥណទាននាំចេញ SACE ទីភ្នាក់ងារឥណទានគាំទ្រសហគ្រាសអ៊ីតាលីនៅបរទេស SIMEST... បង្ហាញពីចំណាប់អារម្មណ៍របស់សហគមន៍ធុរកិច្ចអ៊ីតាលីនៅក្នុងទីផ្សារទីក្រុង ទន្ទឹមនឹងនោះបង្ហាញពីការប្តេជ្ញាចិត្តរបស់រដ្ឋាភិបាលអ៊ីតាលីក្នុងការជំរុញទំនាក់ទំនងសហប្រតិបត្តិការមិត្តភាពជាមួយវៀតណាម។

ដោយវាយតម្លៃសក្តានុពលរបស់ទីក្រុង លោក Le Hoai Trung រដ្ឋមន្ត្រីក្រសួងការបរទេសវៀតណាម បានសង្កត់ធ្ងន់ថា៖ ទីក្រុងហូជីមិញកំពុងបញ្ជាក់ពីតួនាទីរបស់ខ្លួនជាមជ្ឈមណ្ឌលហិរញ្ញវត្ថុ វិទ្យាសាស្ត្រ-បច្ចេកវិទ្យា និងនវានុវត្តន៍បន្តិចម្តងៗ។ ការពង្រីកលំហភូមិសាស្ត្រ និងរដ្ឋបាលរបស់ទីក្រុងបង្ហាញពីផ្នត់គំនិតអភិវឌ្ឍន៍ និងចក្ខុវិស័យនៃការរៀបចំរចនាសម្ព័ន្ធលំហសេដ្ឋកិច្ចឡើងវិញដើម្បីតភ្ជាប់ទំនាក់ទំនងប្រជាជន បច្ចេកវិទ្យា និងបញ្ញា។ នេះគឺជានិមិត្តរូបដ៏រស់រវើកនៃស្មារតីនៃកិច្ចសហប្រតិបត្តិការ សកម្មភាព និងនវានុវត្តន៍ - តម្លៃដែលវៀតណាមតែងតែរក្សា លើកកម្ពស់ និងផ្សព្វផ្សាយក្នុងទំនាក់ទំនងរបស់ខ្លួនជាមួយមិត្តភក្តិអន្តរជាតិ៕

បកប្រែដោយ Huyen Trang