លោក Pham Minh Chinh នាយករដ្ឋមន្ត្រីវៀតណាម ទទួលជួបជាមួយអគ្គនាយកក្រុមហ៊ុន Zarubezhneft នៃប្រទេសរុស្ស៊ី

នាថ្ងៃទី២៧ ខែវិច្ឆិកា នៅទីស្នាក់ការរដ្ឋាភិបាល លោក Pham Minh Chinh នាយករដ្ឋមន្ត្រីវៀតណាម បានទទួលជួបជាមួយលោក Sergei Kudryashov អគ្គនាយកក្រុមហ៊ុន Zarubezhneft ប្រទេសរុស្ស៊ី ដែលកំពុងបំពេញទស្សនកិច្ចការងារនៅប្រទេសវៀតណាម។

លោក Pham Minh Chinh នាយករដ្ឋមន្ត្រីវៀតណាម ទទួលជួបជាមួយលោក Sergei Kudryashov អគ្គនាយកក្រុមហ៊ុន Zarubezhneft (ប្រទេសរុស្ស៊ី)

នៅក្នុងជំនួប លោកនាយករដ្ឋមន្ត្រីបានវាយតម្លៃខ្ពស់ចំពោះកិច្ចសហប្រតិបត្តិការប្រពៃណី និងគួរឱ្យទុកចិត្តរវាងក្រុមហ៊ុនប្រេង និងឧស្ម័នជាតិវៀតណាម (សម្ព័ន្ធក្រុមហ៊ុន PVN) និងក្រុមហ៊ុន Zarubezhneft។ លោកនាយករដ្ឋមន្ត្រីបានមានប្រសាសន៍ថា គម្រោងរួមគ្នារវាង PVN និង Zarubezhneft មិនត្រឹមតែនាំមកនូវប្រសិទ្ធភាពសេដ្ឋកិច្ចប៉ុណ្ណោះទេ ថែមទាំងរួមចំណែកដល់ការពង្រឹងទំនុកចិត្តជាយុទ្ធសាស្ត្រ បង្កើនសន្តិសុខថាមពល បណ្តុះបណ្តាលធនធានមនុស្ស និងកែលម្អសមត្ថភាពបច្ចេកវិទ្យាសម្រាប់ប្រទេសវៀតណាមផងដែរ។

ទិដ្ឋភាពនៃជំនួប

នៅពេលខាងមុខ លោកនាយករដ្ឋមន្ត្រីបានស្នើឱ្យក្រុមហ៊ុន Zarubezhneft បន្តយកចិត្តទុកដាក់ និងបង្កើតលក្ខខណ្ឌអំណោយផលសម្រាប់ប្រតិបត្តិការរបស់ក្រុមហ៊ុន Rusvietpetro នៅក្នុងប្រទេសរុស្ស៊ី ដោយអាចពង្រីកតំបន់ប្រតិបត្តិការរបស់ខ្លួន ទទួលវាលបណ្តូងប្រេង និងឧស្ម័នថ្មី និងវាលបណ្តូងប្រេង និងឧស្ម័នមានសក្តានុពលនៅជិតតំបន់ Nhenhetxky បង្កើនប្រសិទ្ធភាពរបស់ក្រុមហ៊ុន Vietsovpetro ធានាទិន្នផលសមស្រប  វិនិយោគលើការរុករកនៅក្នុងតំបន់មានសក្តានុពលថ្មីៗ។ ជាមួយគ្នានេះ លើកកម្ពស់កិច្ចសហប្រតិបត្តិការលើឧស្ម័នរាវ LNG ខ្សែសង្វាក់ផ្គត់ផ្គង់ LNG ឃ្លាំងកំពង់ផែ LNG ការផ្ទេរបច្ចេកវិទ្យាខួងជ្រៅ ខួងពិបាក; ពិចារណាលើកិច្ចសហប្រតិបត្តិការក្នុងវិស័យថាមពលកកើតឡើងវិញ អ៊ីដ្រូសែន សម្ភារៈថ្មី; កិច្ចសហប្រតិបត្តិការក្នុងការបណ្តុះបណ្តាលធនធានមនុស្សដែលមានគុណភាពខ្ពស់សម្រាប់ប្រទេសវៀតណាម៕

បកប្រែដោយ Thanh Cong