វៀតណាម៖ កងទ័ពទាំងមូលបន្តជម្នះផលវិបាកនៃទឹកជំនន់ ហើយត្រៀមខ្លួនទប់ទល់ទៅនឹងខ្យល់ព្យុះលេខ ១៥

ក្រសួងការពារប្រទេស បានស្នើឱ្យអគ្គសេនាធិការដ្ឋាននៃកងទ័ពប្រជាជនវៀតណាមបញ្ជាឲ្យស្ថាប័ននិងអង្គភាពនានាឱ្យប្រមូលផ្តុំកងកម្លាំង មធ្យោបាយ​ និងមានវិធានការជាបន្ទាន់ដើម្បីជម្នះផលវិបាកនៃទឹកជំនន់និងការរអិលបាក់ដី។ ជួសជុលនិងសាងសង់ផ្ទះថ្មីសម្រាប់គ្រួសារដែលមានផ្ទះរងការខូចខាតយ៉ាងធ្ងន់ធ្ងរ ឬ ដួលរលំ។

អគ្គស្នងការដ្ឋាននយោបាយនៃកងទ័ពប្រជាជនវៀតណាមបញ្ជាឲ្យទីភ្នាក់ងារព័ត៌មាន និងកាសែតបង្កើនការឃោសនាអំពីសកម្មភាពរបស់កងទ័ពជួយប្រជាជន រីកសាយភាយរូបភាពកងទ័ពអ៊ំហូក្នុងការបំពេញភារកិច្ច។ ព្រមទាំងលើកសរសើរនិងផ្តល់រង្វាន់ដល់អង្គភាព និងបុគ្គលដែលមានស្នាដៃល្អក្នុងការបំពេញភារកិច្ចការពារទប់ទល់ស៊ីវិល។

អង្គភាពដែលឈរជើងនៅក្នុងតំបន់ត្រៀមខ្លួនប្រមូលផ្ដុំកងកម្លាំង និងមធ្យោបាយច្រើនបំផុត ដើម្បីចូលរួមក្នុងការសាងសង់ និងជួសជុលផ្ទះសម្រាប់ប្រជាជនដែលរងផលប៉ះពាល់ដោយទឹកជំនន់និងការបាក់ដី តាមការស្នើរបស់មូលដ្ឋាននិងការសម្របសម្រួល​ជាមួយបញ្ជាការយោធានៃខេត្តនានា។

កងទ័ពទាំងមូលបន្តជម្នះផលវិបាកនៃទឹកជំនន់ ហើយត្រៀមខ្លួនទប់ទល់ទៅនឹងខ្យល់ព្យុះលេខ ១៥

* នៅថ្ងៃទី ២៨ ខែវិច្ឆិកា ក្រសួងការពារប្រទេសបានចាត់បញ្ជូនកម្មាភិបាល យុទ្ធជន និងកងជីវពលជិត ២៣,៨០០ នាក់  និងមធ្យោបាយជិត ៥០០ គ្រឿង ដើម្បីចូលរួមជំនះផលវិបាកនៃទឹកជំនន់នៅខេត្ត Dak Lak, Gia Lai, Khanh Hoa និង Lam Dong។ អង្គភាពនានាបន្ដសម្អាត ជួសជុលនិងបាញ់ថ្នាំសម្លាប់មេរោគនៅសាលា ទីស្នាក់ការកណ្តាលអាជ្ញាធរ មណ្ឌលសុខភាព ផ្លូវ និងស្ដារប្រឡាយ ដឹកជញ្ជូននិងផ្ដល់ស្បៀងអាហារនិងសម្ភារៈចាំបាច់ ពិនិត្យសុខភាព និងចែកចាយថ្នាំពេទ្យដល់ប្រជាជន ដឹកជញ្ជូនសំរាម  ជួសជុលបណ្តាញទូរគមនាគមន៍សម្រាប់អតិថិជន។

* នៅថ្ងៃទី ២៨ ខែវិច្ឆិកា អគ្គសេនាធិការដ្ឋាននៃកងទ័ពប្រជាជនវៀតណាមបានចេញសារទូរលេខបន្ទាន់ផ្ញើទៅកាន់ស្ថាប័ននិងអង្គភាពនានាស្តីពីការទប់ទល់ទៅនឹងខ្យល់ព្យុះលេខ ១៥ (Koto) ដោយបន្តជម្នះផលវិបាកនៃទឹកជំនន់នៅក្នុងខេត្តភាគកណ្តាលនិងសម្ពាធទាបត្រូពិចនៅជិតសមុទ្រខាងកើត។

អាស្រ័យហេតុនេះ  អគ្គសេនាធិការដ្ឋានបានស្នើឱ្យអង្គភាពនានារក្សាយ៉ាងតឹងរ៉ឹងនូវរបបប្រចាំការ បន្តអនុវត្តតាមសារទូរលេខរបស់រដ្ឋាភិបាលនិងក្រសួងការពារប្រទេសស្តីពីការទប់ទល់ទៅនឹងខ្យល់ព្យុះលេខ ១៥ និងជម្នះផលវិបាកនៃទឹកជំនន់នៅក្នុងតំបន់ភាគកណ្តាលវៀតណាម។ អគ្គនាយកដ្ឋានភស្តុភារនិងបច្ចេកទេសត្រៀមរៀបចំយ៉ាងល្អនូវសេវាភស្តុភារ និងបច្ចេកទេស ដើម្បីបម្រើការទប់ទល់ទៅនឹងឧប្បត្តិហេតុ គ្រោះមហន្តរាយធម្មជាតិ និងការស្វែងរកនិងជួយសង្គ្រោះ។ យោធាភូមិភាគបានបញ្ជាអង្គភាពយោធានៃខេត្ត និងក្រុងនានាផ្ដល់យោបល់ជូនគណៈកម្មាធិការបក្ស និងអាជ្ញាធរមូលដ្ឋានបន្តស្វែងរកមនុស្សបាត់ខ្លួនជាបន្ទាន់។ ជួយប្រជាជនជួសជុលផ្ទះដែលរងការខូចខាត និងសាងសង់ផ្ទះថ្មីដើម្បីឲ្យប្រជាជនអាចទទួលផ្ទះថ្មីមុនបុណ្យចូលឆ្នាំប្រពៃណីជាតិឆ្នាំ ២០២៦៕

បកប្រែដោយ Pham Diep