លោក To Lam អគ្គលេខាបក្ស ទទួលជួបប្រធានព្រឹទ្ធសភារដ្ឋសភានៃសាធារណរដ្ឋឆែក

នៅរសៀលថ្ងៃទី ២១ ខែវិច្ឆិកា នៅទីស្នាក់ការមជ្ឈិមបក្ស លោក To Lam  អគ្គលេខាបក្ស បានទទួលជួប លោក Milos Vystrcil ប្រធានព្រឹទ្ធសភារដ្ឋសភានៃសាធារណរដ្ឋឆែក  ដែលកំពុងបំពេញទស្សនកិច្ចជាផ្លូវការនៅប្រទេសវៀតណាម តបតាមការអញ្ជើញរបស់ លោក Tran Thanh Man ប្រធានរដ្ឋសភាវៀតណាម។

លោក To Lam អគ្គលេខាបក្ស ទទួលជួបប្រធានព្រឹទ្ធសភារដ្ឋសភានៃសាធារណរដ្ឋឆែក

ដោយបញ្ជាក់ថាប្រទេសទាំងពីរមានភាពស្រដៀងគ្នា និងផលប្រយោជន៍ទៅវិញទៅមកជាច្រើន លោក To Lam អគ្គលេខាបក្ស បានស្នើឱ្យភាគីទាំងពីរបង្កើនការផ្លាស់ប្តូរគណៈប្រតិភូគ្រប់កម្រិត និងរវាងបណ្តាញបក្ស រដ្ឋ រដ្ឋសភា កិច្ចសហប្រតិបត្តិការតាមមូលដ្ឋាន និងការផ្លាស់ប្តូរប្រជាជន សម្របសម្រួលនិងគាំទ្រគ្នាទៅវិញទៅមកនៅក្នុងអង្គការអន្តរជាតិ និងវេទិកាពហុភាគី លើកកម្ពស់កិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្ម វិនិយោគ ការពារជាតិ-សន្តិសុខ វិទ្យាសាស្ត្រ-បច្ចេកវិទ្យា អប់រំ-បណ្តុះបណ្តាល វប្បធម៌ និងទេសចរណ៍ និងពង្រីកកិច្ចសហប្រតិបត្តិការក្នុងវិស័យថ្មីៗ ដូចជាថាមពលស្អាត ថាមពលកកើតឡើងវិញ ការធ្វើបរិវត្តកម្ម​ឌីជីថល ដើម្បី «ពង្រីកសក្តានុពល» នៃកិច្ចសហប្រតិបត្តិការទ្វេភាគី។

ទិដ្ឋភាពនៃជំនួប

ប្រធានព្រឹទ្ធសភារដ្ឋសភានៃសាធារណរដ្ឋឆែក បានសម្តែងការឯកភាពខ្ពស់ចំពោះទិសដៅសហប្រតិបត្តិការដែលបានលើកឡើងដោយលោកអគ្គលេខាបក្ស ហើយ​បញ្ជាក់ថា រូប​លោកផ្ទាល់ និងព្រឹទ្ធសភារដ្ឋសភានៃសាធារណរដ្ឋឆែក នឹងខិតខំប្រឹងប្រែងសម្របសម្រួលជាមួយរដ្ឋសភាវៀតណាម និង​គាំទ្ររដ្ឋាភិបាល ក្រសួង ស្ថាប័ន មូលដ្ឋាននានា ដើម្បីជម្រុញទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក ដោយផ្អែកលើការគោរពគ្នាទៅវិញទៅមក។ ក្នុងស្មារតីនោះ ព្រឹទ្ធសភារដ្ឋសភាឆែក​ត្រៀមខ្លួនរួចជាស្រេចដើម្បីជំរុញឱ្យប្រទេសជាសមាជិកសហភាពអឺរ៉ុប (EU) ដែលនៅសេសសល់ឱ្យផ្តល់សច្ចាប័នលើកិច្ចព្រមព្រៀងគាំរពារវិនិយោគ EU-វៀតណាម (EVIPA) ក្នុងពេលឆាប់ៗនេះ៕

បកប្រែដោយ Duy Hoan