លោក Luong Cuong ប្រធានរដ្ឋវៀតណាម ទទួលជួប លោក Chris Coons សមាជិកព្រឹទ្ធសភាអាមេរិក

លោក Luong Cuong ប្រធានរដ្ឋវៀតណាម និងលោក Chris Coons សមាជិកព្រឹទ្ធសភាអាមេរិក

នៅក្នុងជំនួបនេះ លោកប្រធានរដ្ឋវៀតណាមបានស្នើឱ្យភាគីទាំងពីរបន្តបង្កើនទំនាក់ទំនង និងផ្លាស់ប្តូរគណៈប្រតិភូគ្រប់ជាន់ថ្នាក់ ជំរុញកិច្ចសហប្រតិបត្តិការពាណិជ្ជកម្ម និងវិនិយោគ ដោយចាត់ទុកថានេះជាសសរស្តម្ភដ៏សំខាន់មួយ ហើយនិងសន្ទនារួមគ្នាដើម្បីដោះស្រាយភាពខុសគ្នាដែលនៅសេសសល់។ ដោយវាយតម្លៃខ្ពស់ចំពោះឧត្តមភាពរបស់រដ្ឋ Delaware ក្នុងវិស័យជីវបច្ចេកវិទ្យា កសិកម្មបច្ចេកវិទ្យាខ្ពស់ ថាមពលកកើតឡើងវិញ និងឱសថ នោះ លោកប្រធានរដ្ឋវៀតណាម​ បានស្នើឱ្យ លោក Chris Coons សមាជិកព្រឹទ្ធសភា ជំរុញកិច្ចសហប្រតិបត្តិការទ្វេភាគីរវាងប្រទេសទាំងពីរក៏ដូចជារវាងរដ្ឋ Delaware និងមូលដ្ឋាននានានៃប្រទេសវៀតណាមក្នុងវិស័យទាំងនេះ។

លោក Luong Cuong ប្រធានរដ្ឋវៀតណាម ទទួលជួប លោក Chris Coons សមាជិកព្រឹទ្ធសភាអាមេរិក

រីឯខ្លួនវិញ លោក Chris Coons បានអះអាងថា វៀតណាមគឺជាដៃគូឈានមុខគេមួយរបស់សហរដ្ឋអាមេរិកនៅក្នុងតំបន់។ លោកបានអបអរសាទរវៀតណាមចំពោះសមិទ្ធិផលគួរឱ្យកត់សម្គាល់ក្នុងការអភិវឌ្ឍសេដ្ឋកិច្ចសង្គមនាពេលថ្មីៗនេះ ហើយបានសម្តែងនូវសេចក្តីរីករាយចំពោះវឌ្ឍនភាព ក្នុងការអនុវត្តភាពជាដៃគូយុទ្ធសាស្ត្រលើគ្រប់ជ្រុងជ្រោយវៀតណាម - អាមេរិក រួមទាំងការបង្កើនការផ្លាស់ប្តូរ និងទំនាក់ទំនងរវាងស្ថាប័ននីតិប្បញ្ញត្តិនៃប្រទេសទាំងពីរ។

គណៈប្រតិភូវៀតណាមអញ្ជើញចូលរួមជំនួប

ភាគីទាំងពីរក៏បានពិភាក្សាអំពីបញ្ហាតំបន់ និងអន្តរជាតិដែលមានការយកចិត្តទុកដាក់គ្នាទៅវិញទៅមក។ លោកប្រធានរដ្ឋវៀតណាមបានសង្កត់ធ្ងន់លើសារៈសំខាន់អំពីការដែលសហរដ្ឋអាមេរិកបន្តយកចិត្តទុកដាក់ចំពោះតួនាទីមជ្ឈភាពរបស់អាស៊ាន និងបង្កើនកិច្ចសហប្រតិបត្តិការលើបញ្ហាពិភពលោកដូចជាការប្រែប្រួលអាកាសធាតុ សន្តិសុខសមុទ្រ ការអភិវឌ្ឍប្រកបដោយចីរភាព។ល។

លោកប្រធានរដ្ឋវៀតណាមបានស្នើឱ្យសហរដ្ឋអាមេរិកបន្តពង្រឹងកិច្ចសហប្រតិបត្តិការជាមួយអាស៊ាន លើកកម្ពស់តួនាទីមជ្ឈភាពរបស់អាស៊ាន និងសម្របសម្រួលនៅវេទិកាពហុភាគី ដើម្បីរួមចំណែកដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់។ លោក Chris Coons ក៏បានសង្កត់ធ្ងន់លើសារៈសំខាន់នៃការរក្សាកិច្ចសន្ទនា និងកិច្ចសហប្រតិបត្តិការជាមួយអាស៊ាន ដើម្បីធានាបាននូវសន្តិភាព ស្ថិរភាព និងការអភិវឌ្ឍប្រកបដោយចីរភាពនៅក្នុងតំបន់៕

បកប្រែដោយ Duy Hoan