រដ្ឋសភាវៀតណាមបន្តប្រកៀកស្មានឹង AIPA ដើម្បីធ្វើឲ្យចក្ខុវិស័យ និងសេចក្តីប្រាថ្នារបស់អាស៊ានក្លាយជាការពិត

“រដ្ឋសភាវៀតណាមបន្តប្រកៀកស្មាជាមួយ AIPA ដើម្បីធ្វើឱ្យចក្ខុវិស័យ និងសេចក្តីប្រាថ្នារបស់អាស៊ានក្លាយជាការពិត”។ នេះជាសារមួយដែលត្រូវបានលោក Tran Thanh Man ប្រធានរដ្ឋសភាវៀតណាមសង្កត់ធ្ងន់ក្នុងសុន្ទរកថារបស់ខ្លួននារសៀលថ្ងៃទី១៨ ខែកញ្ញា ក្នុងមហាសន្និបាតអន្តរសភាអាស៊ាន លើកទី៤៦ (AIPA) ដែលប្រព្រឹត្តទៅនៅទីក្រុង Kuala Lumpur ប្រទេសម៉ាឡេស៊ី។

លោក Tran Thanh Man ប្រធានរដ្ឋសភាវៀតណាម ថ្លែងសុន្ទរកថាក្នុងសម័យប្រជុំពេញអង្គលើកទី១ នៃមហាសន្និបាត AIPA លើកទី៤៦

ថ្លែងសុន្ទរកថាក្នុងសម័យប្រជុំនោះ លោក Tran Thanh Man ប្រធានរដ្ឋសភាវៀតណាម បានឲ្យដឹងថា ក្រោមប្រធានបទ “បរិយាប័ន្ន និងនិរន្តរភាព” សមាគមប្រជាជាតិអាស៊ីអាគ្នេយ៍ (អាស៊ាន) បាននិងកំពុងសម្រេចបានលទ្ធផលសំខាន់ និងរឹងមាំក្នុងការរក្សាសន្តិភាព ស្ថិរភាព និងលើកកម្ពស់វិបុលភាពក្នុងតំបន់។ ដោយ​សមស្របនឹងប្រធានបទរបស់​អាស៊ាននោះ ប្រធានបទ AIPA-46 គឺ "សភានៅជួរមុខសម្រាប់អាស៊ានមានកំណើនប្រកបដោយបរិយាប័ន្ន និងនិរន្តរភាព" បាន​បង្ហាញយ៉ាងច្បាស់ថា ស្ថាប័ននីតិប្បញ្ញត្តិកំពុងលើកកម្ពស់តួនាទីត្រួសត្រាយរបស់ខ្លួនក្នុងការកសាងអនាគតមួយ​ដែល​មាន​ឱកាសអភិវឌ្ឍន៍ និងវិបុលភាពសម្រាប់ប្រជាជនអាស៊ានទាំងអស់។

ទិដ្ឋភាពនៃកិច្ចប្រជុំ​

ក្នុងបរិបទនៃស្ថានការណ៍តំបន់ និងសកលលោកដែលកំពុងវិវឌ្ឍយ៉ាងឆាប់រហ័ស និងស្មុគស្មាញ ដើម្បីបន្តលើកកំពស់តួនាទីពិសេស និងភាពខ្លាំងនៃការទូតសភា លោក Tran Thanh Man ប្រធានរដ្ឋសភាវៀតណាម បានស្នើថា៖ “AIPA ត្រូវយកចិត្តទុកដាក់លើការជំរុញកិច្ចសហប្រតិបត្តិការក្នុងតំបន់ប្រកបដោយប្រសិទ្ធភាព។ AIPA ចាំបាច់ត្រូវបន្តនាំមុខគេក្នុងការកសាងយន្តការ គោលនយោបាយដើម្បីជម្រុញការប្តេជ្ញាចិត្ត និងកិច្ចព្រមព្រៀងក្នុងតំបន់ឱ្យបាន​អនុវត្តជាក់ស្តែង ជាពិសេសក្នុងការអភិវឌ្ឍវិទ្យាសាស្ត្រ និងបច្ចេកវិទ្យា នវានុវត្តន៍ និងការធ្វើបរិវត្តកម្មឌីជីថល”។

លោក Tran Thanh Man ប្រធានរដ្ឋសភាវៀតណាម បានអះអាងថា ក្នុងដំណើរការ​ថ្មីនេះ រដ្ឋសភាវៀតណាមនឹងបន្តប្រកៀកស្មាជាមួយ AIPA ដើម្បីប្រែក្លាយចក្ខុវិស័យ និងសេចក្តីប្រាថ្នារបស់អាស៊ានឲ្យក្លាយជាការពិត។ ទន្ទឹមនឹងនោះ វៀតណាមបានត្រៀមខ្លួនរួចជាស្រេចក្នុងការចែករំលែកបទពិសោធន៍ បង្កើនការសន្ទនា និងកិច្ចសហប្រតិបត្តិការគ្រប់កម្រិត ដើម្បីកសាងសហគមន៍អាស៊ានមួយប្រកបដោយបរិយាប័ន្ន និរន្តរភាព ខ្លួនទីពឹងខ្លួន និងយកប្រជាជនជាស្នូល៕

បកប្រែដោយ Duy Hoan