ការអភិវឌ្ឍទីក្រុង និងជនបទ គឺជាកិច្ចការយុទ្ធសាស្ត្រពីរដែលមិនអាចកាត់ផ្តាច់ចេញពីគ្នាបាន

នៅក្នុងកិច្ចប្រជុំនេះ ខ្លឹមសាររាល់របាយការណ៍បានបង្ហាញថា ក្នុងរយៈពេល៣ឆ្នាំអនុវត្តនូវសេចក្តីសម្រេចចិត្តលេខ ១៩ របស់គណៈកម្មាធិការមជ្ឈិមបក្ស និងសេចក្តីសម្រេចចិត្តលេខ ០៦ របស់ការិយាល័យនយោបាយ រាល់ស្ថាប័នគ្រប់កម្រិត និងគ្រប់ផ្នែកបានអនុវត្តយ៉ាងម៉ឺងម៉ាត់ និងស៊ីសង្វាក់គ្នាអំពីការអភិវឌ្ឍ “កសិកម្មអេកូឡូស៊ី ជនបទទំនើប កសិករស៊ីវិល័យ” ការផ្តោតលើការកសាងច្បាប់ ដោះស្រាយរាល់ការលំបាក និងឧបសគ្គ និងលើកកម្ពស់ធនធានសង្គមសម្រាប់កសិកម្ម កសិករ និងការអភិវឌ្ឍន៍ជនបទ។ល។

ការធ្វើផលិតកម្ម និងអាជីវកម្មក្នុងវិស័យកសិកម្មត្រូវបានរក្សាយ៉ាងល្អ បង្ហាញពីតួនាទីជាសសរស្តម្ភមួយនៃខឿនសេដ្ឋកិច្ច រួមចំណែកដល់ស្ថិរភាពម៉ាក្រូសេដ្ឋកិច្ច  តំបន់ជនបទមានការវិវឌ្ឍយ៉ាងច្បាស់ស្ទើរតែលើគ្រប់ទិដ្ឋភាព។ កសិករកំពុងដើរតួនាទីកាន់តែប្រសើរឡើង អនុវត្តយ៉ាងសកម្មការផ្លាស់ប្តូររចនាសម្ព័ន្ធផលិតកម្ម ការអនុវត្តវិទ្យាសាស្ត្រ និងបច្ចេកវិទ្យា ការផ្លាស់ប្តូរឌីជីថល ជីវភាពប្រជាជនកសិករខាងសម្ភារៈ និងខាងវិញ្ញាណត្រូវបានកែលម្អឥតឈប់ឈរ។

លោក To Lam អគ្គលេខាបក្សដឹកនាំសម័យប្រជុំជាមួយគណៈអចិន្ត្រៃយ៍ នៃគណៈកម្មាធិការបក្សរដ្ឋាភិបាល

មានអនុសាសន៍ក្នុងកិច្ចប្រជុំ លោក To Lam អគ្គលេខាបក្ស បានស្នើឱ្យគណៈកម្មាធិការបក្សរដ្ឋាភិបាលធ្វើជាអធិបតី និងសម្របសម្រួលជាមួយរាល់ស្ថាប័នពាក់ព័ន្ធ ដើម្បីវាយតម្លៃភ្លាមៗអំពីការអនុវត្តសេចក្តីសម្រេចចិត្តលេខ ១៩ របស់គណៈកម្មាធិការមជ្ឈិមបក្សស្តីពីកសិកម្ម កសិករ និងជនបទដល់ឆ្នាំ ២០៣០ ជាមួយនឹងចក្ខុវិស័យដល់ឆ្នាំ ២០៤៥ និងប្រគល់ភារកិច្ចឱ្យគណៈកម្មាធិការគោលនយោបាយ និងយុទ្ធសាស្ត្រមជ្ឈិមធ្វើជាអធិបតី និងសម្របសម្រួលជាមួយស្ថាប័ននានា រួមទាំងគណៈកម្មាធិការបក្សរដ្ឋាភិបាល ដើម្បីវាយតម្លៃការអនុវត្តសេចក្តីសម្រេចចិត្តលេខ ០៦ របស់ការិយាល័យនយោបាយស្តីពីការរៀបចំផែនការ ការសាងសង់ ការគ្រប់គ្រង និងការអភិវឌ្ឍប្រកបដោយចីរភាពនៃទីក្រុងវៀតណាមដល់ឆ្នាំ ២០៣០ ជាមួយនឹងចក្ខុវិស័យដល់ឆ្នាំ ២០៤៥។

លោកអគ្គលេខាបក្សបានសង្កត់ធ្ងន់ទៀតថា ចាំបាច់ត្រូវមានការវាយតម្លៃជាបឋមលើការអនុវត្តនូវរាល់ដំណោះស្រាយ ចង្អុលបង្ហាញពីដែនកំណត់ និងចំណុចខ្វះខាត បង្ហាញយ៉ាងច្បាស់ពីតម្រូវការអភិវឌ្ឍថ្មី និងលើកឡើងទស្សនៈណែនាំថ្មីៗ ស្រាវជ្រាវដោយយកចិត្តទុកដាក់ និងហ្មត់ចត់ដើម្បីចេញសេចក្តីសន្និដ្ឋានរបស់ការិយាល័យនយោបាយ។ តាមលោកអគ្គលេខាបក្ស បន្ទាប់ពីមហាសន្និបាតបក្សលើកទី ១៤ ខណៈនៅពេលដែលសេចក្តីសម្រេចចិត្តលេខ ១៩ និងសេចក្តីសម្រេចចិត្តលេខ ០៦ ត្រូវបានអនុវត្តអស់រយៈពេល ៥ ឆ្នាំហើយ ទើបអាចចេញសេចក្តីសម្រេចថ្មីឲ្យសមស្របទៅនឹងស្ថានភាពជាក់ស្តែង។ ទាំងនេះជាបញ្ហាយុទ្ធសាស្ត្រ ដ៏មានសារៈសំខាន់ ទាមទារការប្រមូលផ្តុំបញ្ញាខ្ពស់ កៀរគរការចូលរួមពីអ្នកជំនាញ និងអ្នកវិទ្យាសាស្ត្រ ហើយសំដៅលើបទពិសោធន៍អន្តរជាតិ ដើម្បីផ្តល់យោបល់លើការតំរង់ទិសអភិវឌ្ឍន៍ចំពោះទីក្រុង និងជនបទក្នុងប្រទេសយើងស្របតាមតម្រូវការនៃការអភិវឌ្ឍប្រទេសជាតិក្នុងយុគសម័យថ្មី។

បកប្រែដោយ Minh Trung