វៀតណាមបញ្ជាក់ពីកិច្ចសន្យាក្នុងការរួមចំណែកយ៉ាងសកម្មក្នុងការជំរុញកិច្ចសហប្រតិបត្តិការមេគង្គ-កូរ៉េខាងត្បូង

កិច្ចប្រជុំនេះមានការចូលរួមពីប្រធាន SOM នៃប្រទេសសមាជិកមេគង្គ-កូរ៉េខាងត្បូងទាំងប្រាំមួយ និងតំណាងវិទ្យាស្ថានមេគង្គ ដែលជាអង្គការអន្តររដ្ឋាភិបាលដែលសម្របសម្រួលសកម្មភាពរបស់មូលនិធិមេគង្គ-កូរ៉េខាងត្បូង។

លោកស្រី Nguyen Minh Hang អនុរដ្ឋមន្ត្រីក្រសួងការបរទេសវៀតណាម មានប្រសាសន៍នៅក្នុងកិច្ចប្រជុំ (រូបថត៖ baoquocte.vn)

មានប្រសាសន៍នៅក្នុងកិច្ចប្រជុំ លោកស្រី Nguyen Minh Hang អនុរដ្ឋមន្ត្រីក្រសួងការបរទេសវៀតណាម បានសង្កត់ធ្ងន់លើតួនាទីសំខាន់របស់ MKC ក្នុងការបង្រួមគម្លាតអភិវឌ្ឍន៍ និងបង្កើនការធ្វើសមាហរណកម្មសេដ្ឋកិច្ចអនុតំបន់។ លោកស្រី Nguyen Minh Hang បានវាយតម្លៃថា យន្តការនៃកិច្ចសហប្រតិបត្តិការ MKC ជាយន្តការសហប្រតិបត្តិការដ៏ស្វាហាប់ និងប្រកបដោយប្រសិទ្ធភាពបំផុតនៅក្នុងកិច្ចសហប្រតិបត្តិការអនុតំបន់មេគង្គ ដែលមានលក្ខណៈពិសេសចំនួនបី រួមទាំងការលើកកម្ពស់ការយល់ដឹងរបស់សហគមន៍តំបន់ និងអន្តរជាតិអំពីបញ្ហាប្រឈមនៃមហា​អនុ​តំបន់មេគង្គ លើកទឹកចិត្តតួនាទីយ៉ាងសកម្មរបស់វិស័យឯកជន តាមរយៈវេទិកាធុរកិច្ចប្រចាំឆ្នាំ និងប្រែចក្ខុវិស័យក្លាយទៅជាលទ្ធផលជាក់ស្តែងជាមួយមូលនិធិសហប្រតិបត្តិការមេគង្គ-កូរ៉េខាងត្បូង ជាមួយគម្រោងចំនួន ៦១ ដែលមានតម្លៃ ២៨ លានដុល្លារអាមេរិក។

ទិដ្ឋភាពនៃកិច្ចប្រជុំ (រូបថត៖ baoquocte.vn)

លោកស្រីអនុរដ្ឋមន្ត្រីបានស្នើថា នៅឆ្នាំ២០២៥ ប្រទេសមេគង្គទាំងឡាយផ្តោតលើការជំរុញទិសដៅសំខាន់ៗចំនួនបី។ ទីមួយគឺត្រូវបន្ត និងរៀបចំកិច្ចប្រជុំកំពូលមេគង្គ-កូរ៉េខាងត្បូង ដើម្បីបញ្ជាក់ពីកិច្ចសន្យាថ្នាក់ជាន់ខ្ពស់។ ទីពីរគឺត្រូវបង្កើត និងអនុម័តលើផែនការសកម្មភាព MKC ដំណាក់កាលឆ្នាំ ២០២៦ - ២០៣០ ដោយពិចារណាលើអាទិភាពជំរុញកិច្ចសហប្រតិបត្តិការដែលស្របតាមនិន្នាការអភិវឌ្ឍន៍ក្នុងតំបន់ និងនៅលើពិភពលោក ដូចជាបរិវត្តកម្មឌីជីថល និងនវានុវត្តន៍។ ទីបីគឺ ត្រូវបង្កើនប្រសិទ្ធភាពប្រតិបត្តិការរបស់មូលនិធិ MKCF និងមជ្ឈមណ្ឌលស្ដីពីធនធានទឹក ជីវចម្រុះ និងការការពារព្រៃឈើ តាមរយៈសកម្មភាពច្នៃប្រឌិតដែលនាំមកនូវអត្ថប្រយោជន៍ជាក់ស្តែងដល់ប្រជាជននៃប្រទេសមេគង្គ និងកូរ៉េខាងត្បូង៕

បកប្រែដោយ Huyen Trang