លើកកំពស់តួនាទីនៃកិច្ចសហប្រតិបត្តិការពហុភាគីក្នុងការជំរុញការធ្វើបរិវត្តកម្មបៃតង

លោក Luong Cuong ប្រធានរដ្ឋវៀតណាម ទទួលជួបលោក Sonexay Siphandone នាយករដ្ឋមន្ត្រីឡាវ

លោក Luong Cuong ប្រធានរដ្ឋវៀតណាម ទទួលជួបលោក Sonexay Siphandone នាយករដ្ឋមន្ត្រីឡាវ

លោក Luong Cuong ប្រធានរដ្ឋវៀតណាម បានអបអរសាទរលោក Sonexay Siphandone នាយករដ្ឋមន្ត្រីឡាវ ចំពោះលទ្ធផលវិជ្ជមានដែលរដ្ឋាភិបាលឡាវសម្រេចបានលើគ្រប់វិស័យ  និងបានបង្ហាញទំនុកចិត្តថា ប្រទេសឡាវនឹងបន្តទទួលបានសមិទ្ធិផលថ្មីៗកាន់តែច្រើនថែមទៀត អនុវត្តប្រកបដោយជោគជ័យនូវគោលដៅនៃសេចក្តីសម្រេចចិត្តរបស់មហាសន្និបាតបក្សប្រជាជនបដិវត្តន៍ឡាវលើកទី១១ និងផែនការអភិវឌ្ឍន៍សេដ្ឋកិច្ចសង្គមរយៈពេលប្រាំឆ្នាំលើកទី៩ និងរៀបចំមហាសន្និបាតបក្សលើកទី១២ប្រកបដោយជោគជ័យ។ លោកប្រធានរដ្ឋអះអាងនូវគោលនយោបាយឥតងាករេរបស់បក្ស និងរដ្ឋវៀតណាម ដែលជានិច្ចកាលយកចិត្តទុកដាក់ និងផ្តល់អាទិភាពខ្ពស់បំផុតក្នុងការអភិវឌ្ឍទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យជាមួយឡាវ។ លោក Sonexay Siphandone នាយករដ្ឋមន្ត្រីឡាវ បានសម្តែងនូវសេចក្តីរីករាយដែលបានអញ្ជើញមកបំពេញទស្សនកិច្ចនៅវៀតណាម ដើម្បីចូលរួមកិច្ចប្រជុំកំពូល P4G លើកទី៤ និងវាយតម្លៃខ្ពស់ចំពោះការរៀបចំ និងគំនិតផ្តួចផ្តើមរបស់វៀតណាម។ លោក Sonexay Siphandone នាយករដ្ឋមន្ត្រីឡាវ ក៏បានចែករំលែកអំពីសកម្មភាពសំខាន់ៗរបស់ប្រទេសឡាវក្នុងឆ្នាំ ២០២៥ ផងដែរ។

ទិដ្ឋភាពនៃជំនួប

មេដឹកនាំទាំងពីរបានសម្តែងនូវក្តីរីករាយចំពោះលទ្ធផលដ៏សំខាន់នៃទំនាក់ទំនងទ្វេភាគីនាពេលថ្មីៗនេះ ព្រមទាំងបានសង្កត់ធ្ងន់លើសារៈសំខាន់នៃការសម្របសម្រួលយ៉ាងសកម្មដើម្បីរៀបចំសកម្មភាពរំលឹកខួប​អនុស្សាវរីយ៍សំខាន់ៗនៃប្រទេសទាំងពីរនាឆ្នាំ២០២៥នេះ អាស្រ័យលើនេះរួមចំណែកលើកកំពស់ការយល់ដឹងរបស់យុវជន ពូនជ្រំប្រពៃណី ជំរុញស្មារតីសាមគ្គីភាព ភាពស្និទ្ធស្នាល និងធ្វើឲ្យទំនាក់ទំនងវៀតណាម-ឡាវ កាន់តែអភិវឌ្ឍន៍យ៉ាងត្រចះត្រចង់។

* នាថ្ងៃដដែល នៅវិមានប្រធានរដ្ឋ លោក Luong Cuong ប្រធានរដ្ឋវៀតណាមបានទទួលជួបលោកស្រី Amina Mohammed អគ្គលេខាធិការរងអង្គការសហប្រជាជាតិ  ក្នុងឱកាសដែលលោកស្រីអញ្ជើញមកបំពេញទស្សនកិច្ចនៅវៀតណាម ដើម្បីចូលរួមកិច្ចប្រជុំកំពូល P4G លើកទី៤។

លោក Luong Cuong ប្រធានរដ្ឋវៀតណាម ទទួលជួបលោកស្រី Amina Mohammed អគ្គលេខាធិការរងអង្គការសហប្រជាជាតិ

ក្នុងឱកាសនេះ ភាគីទាំងពីរបានពិភាក្សាអំពីស្ថានភាពពិភពលោក តំបន់ និងបញ្ហាប្រឈមនានាចំពោះពហុភាគីនិយម ហើយបានឯកភាពពង្រឹងកិច្ចសហប្រតិបត្តិការ រួមគ្នាជំរុញកិច្ចសហប្រតិបត្តិការពហុភាគី និងតួនាទីរបស់អង្គការសហប្រជាជាតិក្នុងអភិបាលកិច្ចសកល រក្សានិងលើកកម្ពស់គោលការណ៍ និងតម្លៃជាមូលដ្ឋានរបស់អង្គការសហប្រជាជាតិនៅពេលបង្កើតឡើងក្នុងឆ្នាំ ១៩៤៥។ ភាគីទាំងពីរក៏បានពិភាក្សាផងដែរអំពីបញ្ហាតម្រង់ទិសទំនាក់ទំនងវៀតណាម - អង្គការសហប្រជាជាតិ កំណើនប្រកបដោយនិរន្តរភាព ការច្នៃប្រឌិត ការធ្វើបរិវត្តកម្មឌីជីថល ក៏ដូចជាការបង្កើនការចូលរួមរបស់យុវជន និងស្ត្រីនៅក្នុងដំណើរការទាំងនេះ។

* នាថ្ងៃទី ១៧ មេសា នៅវិមានប្រធានរដ្ឋ លោក Luong Cuong ប្រធានរដ្ឋវៀតណាម បានទទួលជួបលោកស្រី Soipan Tuya រដ្ឋមន្ត្រីក្រសួងការពារជាតិកេនយ៉ា ក្នុងឱកាសដែលអញ្ជើញមកបំពេញទស្សនកិច្ចនៅវៀតណាម ដើម្បីចូលរួមកិច្ចប្រជុំកំពូល P4G លើកទី៤។

លោក Luong Cuong ប្រធានរដ្ឋវៀតណាម ទទួលជួបលោក Soipan Tuya រដ្ឋមន្ត្រីក្រសួងការពារជាតិកេនយ៉ា

លោក Luong Cuong ប្រធានរដ្ឋវៀតណាម បានស្នើឲ្យ ភាគីទាំងពីរខិតខំប្រឹងប្រែងដើម្បីពង្រីកសក្ដានុពលក្នុងវិស័យដែលមានឧត្តមភាពដូចជាការវិនិយោគ ពាណិជ្ជកម្ម កសិកម្ម និងទេសចរណ៍។ ក្រសួងការពារជាតិទាំងពីរបន្តសិក្សាស្រាវជ្រាវ ជំរុញកិច្ចសហប្រតិបត្តិការក្នុងវិស័យឧស្សាហកម្មការពារជាតិ ភស្តុភារ ពេទ្យយោធា និងចែករំលែកបទពិសោធន៍ក្នុងការចូលរួមក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ។ លោក Luong Cuong ប្រធានរដ្ឋវៀតណាម បានស្នើឲ្យកេនយ៉ាដើរតួជាស្ពានតភ្ជាប់មួយ និងគាំទ្រវៀតណាមក្នុងការពង្រឹងទំនាក់ទំនងជាមួយសហភាពអាហ្វ្រិក (AU) និងអង្គការក្នុងតំបន់ដែលកេនយ៉ាជាសមាជិក។ លោក Luong Cuong ប្រធានរដ្ឋវៀតណាមក៏បានស្នើឲ្យភាគីទាំងពីរបង្កើនសំឡេងរបស់ប្រទេសកំពុងអភិវឌ្ឍ បន្តសម្របសម្រួល និងគាំទ្រគ្នាទៅវិញទៅមកក្នុងវេទិកាពហុភាគី។ ដោយសម្តែងការឯកភាពខ្ពស់ចំពោះសំណើរបស់លោក Luong Cuong ប្រធានរដ្ឋវៀតណាមនោះ លោកស្រី Soipan Tuya រដ្ឋមន្ត្រី បានឲ្យដឹងថា ប្រទេសកេនយ៉ាក៏មានបំណងចង់ដើរតួជាច្រកទ្វារដើម្បីជំរុញពាណិជ្ជកម្មទ្វេភាគីរវាងវៀតណាម និងតំបន់អាហ្វ្រិកខាងកើត។ នាពេលខាងមុខ លោកស្រី Soipan Tuya ស្នើឱ្យប្រទេសទាំងពីរពង្រឹង និងពង្រីកកិច្ចសហប្រតិបត្តិការក្នុងវិស័យការពារជាតិ សន្តិសុខ ធានាសន្តិសុខស្បៀងអាហារ កសាងលំនៅដ្ឋានសង្គម និងការថែទាំសុខភាព។

* នាថ្ងៃទី ១៧ មេសា នៅទីក្រុងហាណូយ លោក Pham Minh Chinh នាយករដ្ឋមន្ត្រី បានទទួលជួបជាមួយ លោកស្រី Amina Mohammed អគ្គលេខាធិការរងអង្គការសហប្រជាជាតិ។

លោក Pham Minh Chinh នាយករដ្ឋមន្ត្រី ទទួលជួបជាមួយ លោកស្រី Amina Mohammed អគ្គលេខាធិការរងអង្គការសហប្រជាជាតិ

លោក Pham Minh Chinh នាយករដ្ឋមន្ត្រី បានស្នើឱ្យអង្គការសហប្រជាជាតិ បន្តយកចិត្តទុកដាក់ និងគាំទ្រវៀតណាមក្នុងការអភិវឌ្ឍវិទ្យាសាស្ត្រនិងបច្ចេកវិទ្យា នវានុវត្តន៍ ការធ្វើបរិវត្តកម្មថាមពលប្រកបដោយយុត្តិធម៌ ការអភិវឌ្ឍសេដ្ឋកិច្ចបៃតង និងពន្លឿនការអនុវត្តគោលដៅអភិវឌ្ឍន៍ប្រកបដោយចីរភាព។ លោក Pham Minh Chinh នាយករដ្ឋមន្ត្រី អះអាងថា វៀតណាមជាសមាជិកមានការ​ទទួលខុសត្រូវរបស់អង្គការសហប្រជាជាតិ ព្រមទាំងស្នើឱ្យអង្គការសហប្រជាជាតិបន្តគាំទ្រតួនាទីមជ្ឈភាពរបស់អាស៊ានក្នុងរចនាសម្ព័ន្ធតំបន់ ហើយសង្កត់ធ្ងន់ថា វៀតណាមត្រៀមខ្លួនជាស្រេចដើម្បីដើរតួនាទីយ៉ាងសកម្មក្នុងការជំរុញភាគីនានាស្វែងរកដំណោះស្រាយសន្តិភាព ស្ថិរភាព និងវិបុលភាពក្នុងតំបន់អាស៊ីប៉ាស៊ីហ្វិក។

លោក Pham Minh Chinh នាយករដ្ឋមន្ត្រី ទទួលជួបជាមួយ លោកស្រី Amina Mohammed អគ្គលេខាធិការរងអង្គការសហប្រជាជាតិ

លោកស្រី Amina Mohammed បានវាយតម្លៃខ្ពស់ចំពោះតួនាទីដឹកនាំរបស់វៀតណាមក្នុងដំណើរការធ្វើបរិវត្តកម្មបៃតង ដែលបានបង្ហាញតាមរយៈភាពជោគជ័យនៃកិច្ចប្រជុំកំពូល P4G លើកទី៤។ លោកស្រីសម្តែងការចាប់អារម្មណ៍ចំពោះការអភិវឌ្ឍគួរឲ្យកត់សម្គាល់របស់វៀតណាម ក៏ដូចជាការចូលរួមយ៉ាងសកម្មរបស់វៀតណាមដែលមិនត្រឹមតែនៅក្នុងវេទិការបស់អង្គការសហប្រជាជាតិប៉ុណ្ណោះទេ ថែមទាំងក្នុងបេសកកម្មរក្សាសន្តិភាពរបស់អង្គការសហប្រជាជាតិផងដែរ។ លោកស្រីស្វាគមន៍ការអភិវឌ្ឍន៍ជាវិជ្ជមានក្នុងទំនាក់ទំនងវៀតណាម-អង្គការសហប្រជាជាតិ និងអះអាងថានឹងពិភាក្សាយ៉ាងសកម្មជាមួយដៃគូនានាដើម្បីអនុវត្តគម្រោងជាច្រើននៅវៀតណាមក្នុងពេលឆាប់ៗក្នុងក្របខ័ណ្ឌនៃភាពជាដៃគូធ្វើបរិវត្តកម្មថាមពលដោយយុត្តិធម៌ (JETP)៕

បកប្រែដោយ Duy Hoan