សកម្មភាពរបស់លោកអគ្គលេខាបក្ស To Lam នៅឥណ្ឌូនេស៊ី

* ក្នុងជំនួបជាមួយលោក Budiarsa Sastrawinata នាយកប្រតិបត្តិសាជីវកម្ម Ciputra លោកអគ្គលេខាបក្ស To Lam បានស្នើឱ្យសាជីវកម្មសម្របសម្រួលយ៉ាងជិតស្និទ្ធជាមួយគណៈកម្មាធិការប្រជាជនទីក្រុងហាណូយ និងស្ថាប័នពាក់ព័ន្ធដើម្បីអនុវត្តគម្រោង; ទន្ទឹមនឹងនោះ លោកអគ្គលេខាបក្ស To Lam លើកទឹកចិត្តសាជីវកម្មបន្តស្រាវជ្រាវ អនុវត្តគម្រោងថ្មីនៅវៀតណាម ជំរុញបន្ថែមទៀតនូវវិស័យដែលជាប្រៀបខ្លាំងក្នុងកិច្ចសហប្រតិបត្តិការវិនិយោគ ជួយវៀតណាមសម្រេចបាននូវគោលដៅកំណើនដែលបានកំណត់ ព្រមទាំងស្នើឲ្យសាជីវកម្ម ជំរុញកិច្ចសហប្រតិបត្តិការជាមួយដៃគូវៀតណាម រួមចំណែកធ្វើឱ្យប្រទេសទាំងពីរសម្រេចបាននូវគោលដៅអភិវឌ្ឍន៍ស្រដៀងគ្នាក្នុងឱកាសរំលឹកខួបលើកទី ១០០ នៃការបង្កើតប្រទេសទាំងពីរវៀតណាម និងឥណ្ឌូនេស៊ី។

លោកអគ្គលេខាបក្ស To Lam ទទួលជួបលោក Budiarsa Sastrawinata នាយកប្រតិបត្តិសាជីវកម្ម Ciputra (រូបថត៖ vnanet.vn)

ថ្នាក់ដឹកនាំសាជីវកម្ម Ciputra បានអះអាងថា នឹងបន្តសហប្រតិបត្តិការក្នុងការអភិវឌ្ឍគម្រោងអចលនទ្រព្យដូចជា គម្រោងលំនៅដ្ឋាន គម្រោងសាងសង់អគារការិយាល័យនៅទីក្រុងហាណូយ និងស្រាវជ្រាវលើវិស័យវិនិយោគថ្មីនៅវៀតណាម។

លោកអគ្គលេខាបក្ស To Lam ទទួលជួបលោក Patrick Walujo អគ្គនាយក និងជាប្រធានសាជីវកម្ម Gojek  (រូបថត៖ vnanet.vn)

* នៅក្នុងជំនួបជាមួយលោក Patrick Walujo អគ្គនាយក និងជាប្រធានសាជីវកម្ម Gojek និងលោក Garibaldi Thohir ប្រធានសាជីវកម្ម PT Alamtri Resources លោកអគ្គលេខាបក្ស To Lam បានលើកទឹកចិត្តសាជីវកម្ម Gojek យកចិត្តទុកដាក់វិនិយោគនៅវៀតណាមលើវិស័យដែលសាជីវកម្មមានឧត្តមភាព​​ខ្លាំង; ស្រាវជ្រាវសហប្រតិបត្តិការជាមួយស្ថាប័នហិរញ្ញវត្ថុរបស់វៀតណាមដើម្បីចែករំលែកបទពិសោធន៍ក្នុងការអភិវឌ្ឍហិរញ្ញវត្ថុឌីជីថល ធនាគារឌីជីថល និងមជ្ឈមណ្ឌលហិរញ្ញវត្ថុអន្តរជាតិនៅវៀតណាម។ ចំពោះ PT Alamtri Resources លោកអគ្គលេខាបក្ស To Lam ស្នើឱ្យសាជីវកម្មពង្រឹងកិច្ចសហប្រតិបត្តិការក្នុងសកម្មភាពរុករករ៉ែដែលមិនប៉ះពាល់ដល់បរិស្ថាន និងការផ្ទេរបច្ចេកវិទ្យារុករករ៉ែទំនើប និងសុវត្ថិភាព; អភិវឌ្ឍន៍ថាមពលកកើតឡើងវិញ បរិវត្តកម្មបៃតង បរិវត្តកម្មឌីជីថលនៅវៀតណាម; អភិវឌ្ឍប្រព័ន្ធភស្តុភារកំពង់ផែសមុទ្រ និងមជ្ឈមណ្ឌលភស្តុភារ; ពង្រីកកិច្ចសហប្រតិបត្តិការជាមួយសហគ្រាសវៀតណាមលើវិស័យអភិវឌ្ឍន៍ទីផ្សាររថយន្តអគ្គិសនី អាគុយអគ្គិសនី និងការកសាងហេដ្ឋារចនាសម្ព័ន្ធគមនាគមន៍ឆ្លាតវៃ។

លោកអគ្គលេខាបក្ស To Lam ទទួលជួបលោក Garibaldi Thohir ប្រធានសាជីវកម្ម PT Alamtri Resources (រូបថត៖ vnanet.vn)

ថ្នាក់ដឹកនាំនៃសាជីវកម្មទាំងពីរបានឲ្យដឹងថា ពួកគេនឹងមានផែនការវិលត្រឡប់មកទីផ្សារវៀតណាមវិញក្នុងពេលឆាប់ៗនេះ ហើយសង្ឃឹមថានឹងទទួលបានការគាំទ្រក្នុងដំណើរការនេះ។

* ក្នុងជំនួបជាមួយលោក Oey Alfred នាយកសាជីវកម្ម Sungai Budi លោកអគ្គលេខាបក្ស To Lam បានអះអាងថា វៀតណាមជានិច្ចកាលបង្កើតលក្ខខណ្ឌល្អបំផុតសម្រាប់សហគ្រាសបរទេស រួមទាំងឥណ្ឌូនេស៊ី មកវិនិយោគ និងធ្វើអាជីវកម្មប្រកបដោយស្ថិរភាព និងយូរអង្វែងនៅវៀតណាម។ នាបច្ចុប្បន្ន វៀតណាមកំពុងបង្កើនការទាក់ទាញវិនិយោគពីសហគ្រាសបរទេស ជំរុញការផ្លាស់ប្តូរពាណិជ្ជកម្មអំពីកសិផល និងកិច្ចសហប្រតិបត្តិការផ្ទេរបច្ចេកវិទ្យាកសិកម្ម រួមចំណែកជំរុញទំនាក់ទំនងសហប្រតិបត្តិការរវាងវៀតណាម និងឥណ្ឌូនេស៊ីឲ្យកាន់តែស៊ីជម្រៅថែមទៀត។

លោកអគ្គលេខាបក្ស To Lam ទទួលជួបលោក Oey Alfred នាយកសាជីវកម្ម Sungai Budi (រូបថត៖ vnanet.vn)

លោក Oey Alfred នាយកសាជីវកម្ម Sungai Budi បានឲ្យដឹងថា សាជីវកម្មមានសកម្មភាពសហប្រតិបត្តិការប្រកបដោយប្រសិទ្ធភាពជាមួយសាជីវកម្ម TTC AgriS លើការអនុវត្តវិទ្យាសាស្ត្រក្នុងការអភិវឌ្ឍវិស័យកសិកម្មបច្ចេកវិទ្យាខ្ពស់ និងខ្សែសង្វាក់តម្លៃកសិកម្មនៅក្នុងប្រទេសឥណ្ឌូនេស៊ី។ សាជីវកម្មមានបំណងចង់ពង្រឹងថែមទៀតនូវកិច្ចសហប្រតិបត្តិការជាមួយសហគ្រាសវៀតណាមលើវិស័យកសិកម្ម។

* ក្នុងជំនួបជាមួយលោក Anindya Bakrie ប្រធានសភាពាណិជ្ជកម្ម និងឧស្សាហកម្មឥណ្ឌូនេស៊ី (KADIN) លោកអគ្គលេខាបក្ស To Lam សង្ឃឹមថា KADIN និងសហភាពពាណិជ្ជកម្ម និងឧស្សាហកម្មវៀតណាម (VCCI) នឹងពង្រឹងកិច្ចសហប្រតិបត្តិការ ការផ្លាស់ប្តូរគណៈប្រតិភូ ផ្លាស់ប្តូរព័ត៌មាន គាំទ្រអង្គភាពអាជីវកម្មនៃប្រទេសទាំងពីរ ស្វែងរកកាលានុវត្តភាពសហប្រតិបត្តិការវិនិយោគ និងតភ្ជាប់សេដ្ឋកិច្ចនៃប្រទេសទាំងពីរឱ្យអភិវឌ្ឍយ៉ាងខ្លាំងក្លា។ លោកអគ្គលេខាបក្ស To Lam បានសង្កត់ធ្ងន់ថា វៀតណាមនឹងបន្តជំរុញកំណែទម្រង់រដ្ឋបាល បង្កើតលក្ខខណ្ឌអំណោយផលសម្រាប់អង្គភាពអាជីវកម្មវិនិយោគ និងសហប្រតិបត្តិការនៅវៀតណាម និងសន្យារួមដំណើរ និងគាំទ្រសកម្មភាពវិនិយោគ និងធ្វើអាជីវកម្មរបស់សហគ្រាសឥណ្ឌូនេស៊ី នាំមកនូវផលប្រយោជន៍កាន់តែច្រើនដល់ភាគីទាំងពីរ រួមចំណែកជំរុញទំនាក់ទំនងវៀតណាម-ឥណ្ឌូនេស៊ីឡើងកម្រិតកំពស់ថ្មីមួយ។

លោកអគ្គលេខាបក្ស To Lam ទទួលជួបលោក Anindya Bakrie ប្រធានសភាពាណិជ្ជកម្ម និងឧស្សាហកម្មឥណ្ឌូនេស៊ី (KADIN) (រូបថត៖ vnanet.vn)

លោកប្រធាន KADIN បានស្នើថា នាពេលខាងមុខ វៀតណាមជួយឧបត្ថម្ភសហគ្រាសសមាជិក KADIN ពង្រឹងកិច្ចសហប្រតិបត្តិការពាណិជ្ជកម្ម និងវិនិយោគ ជាពិសេសលើវិស័យបច្ចេកវិទ្យាខ្ពស់ សេដ្ឋកិច្ចបៃតង សេដ្ឋកិច្ចឌីជីថល សេដ្ឋកិច្ចសមុទ្រ និងឧស្សាហកម្ម semiconductor; ជំរុញកិច្ចសហប្រតិបត្តិការអាជីវកម្ម និងចុះហត្ថលេខាលើកិច្ចព្រមព្រៀងសហប្រតិបត្តិការរវាង KADIN និង VCCI។

* នារសៀលថ្ងៃដដែល លោកអគ្គលេខាបក្ស To Lam បានអញ្ជើញចូលរួមពិធីប្រកាសអំពីជើងហោះហើរត្រង់ពីទីក្រុងហូជីមិញទៅកាន់ទីក្រុង Denpasar កោះបាលី ចាប់ពីខែមិថុនា ឆ្នាំ២០២៥ ដែលរៀបចំដោយក្រុមហ៊ុនអាកាសចរណ៍ជាតិវៀតណាម (Vietnam Airlines)។ នេះគឺជាជើងហោះហើរទីពីររបស់ Vietnam Airlines ដែលតភ្ជាប់វៀតណាម និងឥណ្ឌូនេស៊ី ដែលនាំឱ្យចំនួនជើងហោះហើរសរុបរវាងប្រទេសទាំងពីរកើនឡើងដល់ ១៤ លើកក្នុងមួយសប្តាហ៍។

លោកអគ្គលេខាបក្ស To Lam ជាមួយកម្មាភិបាលស្ថានទូត ស្ថាប័នតំណាង និងសហគមន៍អាណិកជនវៀតណាមនៅឥណ្ឌូនេស៊ី (រូបថត៖ vnanet.vn)

* នារសៀលថ្ងៃទី៩ ខែមីនា លោកអគ្គលេខាបក្ស To Lam និងលោកជំទាវ រួមជាមួយគណៈប្រតិភូជាន់ខ្ពស់វៀតណាមបានអញ្ជើញទៅបំពេញទស្សនកិច្ចនៅស្ថានទូតវៀតណាមប្រចាំនៅឥណ្ឌូនេស៊ី និងជួបជាមួយកម្មាភិបាលស្ថាប័នតំណាង និងសហគមន៍អាណិកជនវៀតណាមនៅឥណ្ឌូនេស៊ី។ នៅក្នុងជំនួប លោកអគ្គលេខាបក្ស To Lam បានជម្រាបជូនប្រជាជនអំពីស្ថានភាពក្នុងស្រុក សមិទ្ធិផលនានាដែលប្រទេសសម្រេចបាន និងការខិតខំប្រឹងប្រែងផ្លាស់ថ្មី ដើម្បីជំរុញការអភិវឌ្ឍសេដ្ឋកិច្ចសង្គមរបស់ប្រទេស។ លោកអគ្គលេខាបក្ស To Lam បានអះអាងថា ក្រោមការដឹកនាំរបស់បក្ស ការប្តេជ្ញាចិត្តនៃប្រព័ន្ធនយោបាយទាំងមូល និងប្រជាជនគ្រប់ស្រទាប់វណ្ណៈ ក្នុងនោះមានប្រជាជនវៀតណាមចំនួន ៦ លាននាក់នៅក្រៅប្រទេស ក៏ដូចជាការគាំទ្ររបស់មិត្តអន្តរជាតិ វៀតណាមបាននិងកំពុងអភិវឌ្ឍតាមនិន្នាការវិជ្ជមាន សំដៅសម្រេចបាននូវគោលដៅកំណើនពីរខ្ទង់។ លោកអគ្គលេខាបក្ស To Lam បានអះអាងថា បក្ស រដ្ឋជានិច្ចកាលយកចិត្តទុកដាក់ចំពោះសហគមន៍អាណិកជនវៀតណាមនៅឯបរទេសនិយាយរួម និងសហគមន៍អាណិកជនវៀតណាមនៅឥណ្ឌូនេស៊ីនិយាយដោយឡែក ព្រមទាំងចាត់ទុកសហគមន៍ជាផ្នែកមួយដែលមិនអាចបំបែកបាន ជាធនធានដ៏សំខាន់របស់ប្រជាជាតិ។

* ក្នុងឱកាសនេះដែរ លោកអគ្គលេខាបក្ស To Lam បានមានជំនួបជាមួយតំណាងគណៈប្រតិភូវៀតណាមប្រចាំអាស៊ាន។

លោកអគ្គលេខាបក្ស To Lam និងលោកជំទាវ ចាប់ផ្តើមដំណើរទស្សនកិច្ចផ្លូវរដ្ឋនៅសាធារណរដ្ឋឥណ្ឌូនេស៊ី និងបំពេញទស្សនកិច្ចផ្លូវការនៅលេខាធិការដ្ឋានអាស៊ាន (រូបថត៖ vnanet.vn)

* គួររំលឹកដែរថា នារសៀលថ្ងៃទី៩ ខែមីនា លោកអគ្គលេខាបក្ស To Lam និងលោកជំទាវ រួមជាមួយគណៈប្រតិភូជាន់ខ្ពស់វៀតណាមបានអញ្ជើញមកដល់ទីក្រុងហ្សាកាតា ចាប់ផ្តើមដំណើរទស្សនកិច្ចផ្លូវរដ្ឋនៅសាធារណរដ្ឋឥណ្ឌូនេស៊ី និងបំពេញទស្សនកិច្ចផ្លូវការនៅលេខាធិការដ្ឋានអាស៊ាន តបតាមការអញ្ជើញរបស់លោក Prabowo Subianto ប្រធានាធិបតីឥណ្ឌូនេស៊ី ប្រធានគណបក្សចលនាឥណ្ឌូណេស៊ីមហិមា (Gerindra) និងលោក Kao Kim Hourn អគ្គលេខាធិការអាស៊ាន៕

បកប្រែដោយ Huyen Trang