លោក To Lam អគ្គលេខាបក្ស អញ្ជើញទៅសួរសុខទុក្ខ និងជូនពរឆ្នាំថ្មីដល់គណៈកម្មាធិការបក្ស អាជ្ញាធរ និងប្រជាជនខេត្ត Dak Lak

នៅក្នុងជំនួប លោក To Lam អគ្គលេខាបក្ស បានសង្កត់ធ្ងន់លើបញ្ហាសំខាន់ៗដែលត្រូវយកចិត្តទុកដាក់ និងអនុវត្តក្នុងរយៈពេលខាងមុខ។  លោកអំពាវនារឲ្យមានការផ្លាស់ថ្មីការគិតគូរអភិវឌ្ឍន៍ ពីការគ្រប់គ្រងតំបន់ ទៅការបង្កើតលំហអភិវឌ្ឍន៍យុទ្ធសាស្ត្រ៖ "គប្បីកសាងទម្រង់កំណើនថ្មី ដែលមានគោលបំណងសម្រាប់កំណើនយ៉ាងឆាប់រហ័ស ប៉ុន្តែមានគុណភាពខ្ពស់ ស៊ីជម្រៅ និងភាពធន់ ដោយផ្អែកលើការរៀបចំឡើងវិញនូវលំហូរអភិវឌ្ឍន៍។ ខេត្តត្រូវតែផ្លាស់ប្តូរទម្រង់ពីការពឹងផ្អែកលើការកេងប្រវ័ញ្ចធនធាន និងកសិកម្មពុំទាន់កែឆ្នៃ ទៅជាការធ្វើឱ្យប្រសើរឡើងនូវខ្សែសង្វាក់តម្លៃ ជាមួយនឹងឧស្សាហកម្មកែច្នៃស៊ីជម្រៅ ថាមពលកកើតឡើងវិញ សេដ្ឋកិច្ចសមុទ្រ ទេសចរណ៍ដែលមានគុណភាពខ្ពស់ និងសេដ្ឋកិច្ចឌីជីថលជាកម្លាំងចលករ"។

លោក To Lam អគ្គលេខាបក្ស មានប្រសាសន៍នៅក្នុងជំនួប (រូបថត៖ vnanet.vn)

លោក To Lam អគ្គលេខាបក្ស ក៏បានស្នើឱ្យខេត្ត Dak Lak ផ្តោតលើការធានាការពារជាតិ និងសន្តិសុខឱ្យរឹងមាំ រក្សាស្ថិរភាពនយោបាយ និងសង្គមក្នុងគ្រប់ស្ថានភាពទាំងអស់ ដោយចាត់ទុកនេះជាមូលដ្ឋានគ្រឹះដែលមិនអាចជំនួសបានសម្រាប់ការអភិវឌ្ឍប្រកបដោយចីរភាព និងជាពិសេសត្រូវបន្តកសាងក្បាលម៉ាស៊ីនអាជ្ញាធរដែលមានភាពសកម្ម មានវិន័យ ស្មោះត្រង់ និងទទួលខុសត្រូវដល់ទីបញ្ចប់ ស្របតាមស្មារតីនៃមហាសន្និបាតលើកទី ១៤ របស់បក្ស៕

បកប្រែដោយ Huyen Trang