រួមចំណែកពង្រឹង និងពង្រីកទំនាក់ទំនងសាមគ្គីភាពពិសេសវៀតណាម-ឡាវ ឱ្យកាន់តែស៊ីជម្រៅថែមទៀត

នៅក្នុងជំនួប លោកអគ្គលេខាបក្ស To Lam បានស្វាគមន៍ និងវាយតម្លៃថាដំណើរទស្សនកិច្ចរបស់លោក Bounthong Chitmany បង្ហាញពីការគោរព និងការជឿទុកចិត្តជាយុទ្ធសាស្ត្ររវាងបក្សទាំងពីរ និងប្រទេសទាំងពីរ រួមចំណែកពង្រឹង និងពង្រីកទំនាក់ទំនងសាមគ្គីភាពពិសេស វៀតណាម-ឡាវ ឱ្យកាន់តែស៊ីជម្រៅថែមទៀត។

លោកអគ្គលេខាបក្ស To Lam ទទួលជួបលោក Bounthong Chitmany អនុប្រធានរដ្ឋឡាវ

លោកអគ្គលេខាបក្ស To Lam បានអះអាងថា វៀតណាមជានិច្ចកាលប្រកៀកស្មា និងគាំទ្របក្ស រដ្ឋ និងប្រជាជនឡាវក្នុងការអនុវត្តគោលដៅអភិវឌ្ឍន៍ប្រទេសជាតិ។ លោកអគ្គលេខាបក្ស To Lam ជឿជាក់ថា ក្រោមការដឹកនាំរបស់បក្សប្រជាជនបដិវត្តន៍ឡាវ ដែលមានលោក Thongloun Sisoulith ជាអគ្គលេខាបក្ស និងជាប្រធានរដ្ឋ ប្រទេសឡាវនឹងអនុវត្តដោយជោគជ័យនូវសេចក្តីសម្រេចចិត្តនៃមហាសន្និបាតលើកទី១១ របស់បក្ស និងកសាងប្រទេសឡាវប្រកបដោយវិបុលភាព។ លោកអគ្គលេខាបក្ស To Lam សង្ឃឹមថា ភាគីទាំងពីរនឹងបន្តពង្រឹងកិច្ចសហប្រតិបត្តិការសម្រាប់ការអភិវឌ្ឍទៅវិញទៅមក ដើម្បីផលប្រយោជន៍របស់ប្រជាជននៃប្រទេសទាំងពីរ រួមចំណែកដល់សន្តិភាព ស្ថិរភាព និងការអភិវឌ្ឍក្នុងតំបន់ និងនៅលើពិភពលោក។

លោក Bounthong Chitmany បានជម្រាបជូនលោកអគ្គលេខាបក្ស To Lam អំពីស្ថានភាពថ្មីៗនៅប្រទេសឡាវ។ លោកបានថ្លែងអំណរគុណយ៉ាងស្មោះស្ម័គ្រចំពោះបក្ស រដ្ឋ និងប្រជាជនវៀតណាមដែលតែងតែផ្តល់ការគាំទ្រ និងជំនួយដ៏ធំធេងដល់បក្ស រដ្ឋ និងប្រជាជនឡាវក្នុងបុព្វហេតុតស៊ូរំដោះជាតិកាលពីមុន ក៏ដូចជាក្នុងបុព្វហេតុកសាងប្រទេសនាពេលបច្ចុប្បន្ន។ លោក Bounthong Chitmany បានអះអាងថា បក្ស រដ្ឋ និងប្រជាជនឡាវនឹងខិតខំប្រឹងប្រែងអស់ពីសមត្ថភាពជាមួយវៀតណាម ដើម្បីរក្សា និងពូនជ្រំទំនាក់ទំនងសាមគ្គីភាពពិសេស វៀតណាម-ឡាវ ឲ្យកាន់តែរីកចម្រើនថែមទៀត។

លោកប្រធានរដ្ឋ Luong Cuong ទទួលជួបលោក Bounthong Chitmany អនុប្រធានរដ្ឋឡាវ

នាថ្ងៃដដែល នៅវិមានប្រធានរដ្ឋ (ទីក្រុងហាណូយ) លោក Luong Cuong ប្រធានរដ្ឋវៀតណាម បានទទួលជួបលោក Bounthong Chitmany អនុប្រធានរដ្ឋឡាវ។ លោកប្រធានរដ្ឋ Luong Cuong បានអះអាងថា វៀតណាមជានិច្ចកាលឲ្យតម្លៃ និងផ្តល់អាទិភាពខ្ពស់បំផុតចំពោះទំនាក់ទំនងសាមគ្គីភាពពិសេស វៀតណាម-ឡាវ ហើយត្រៀមខ្លួនជាស្រេចគាំទ្រ និងជួយឧបត្ថម្ភឡាវក្នុងបុព្វហេតុកសាង និងអភិវឌ្ឍន៍ប្រទេសជាតិ៕

បកប្រែដោយ Huyen Trang