នាយករដ្ឋមន្ត្រីកម្ពុជាទទួលជួបឯកអគ្គរដ្ឋទូតវៀតណាមអញ្ជើញចូលជួបសម្តែងការគួរសម និងជម្រាបលា

លោកឯកអគ្គរដ្ឋទូត Nguyen Huy Tang ចូលជួបសម្តែងការគួរសម និងជម្រាបលា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា

ថ្លែងមតិក្នុងជំនួបនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអបអរសាទរចំពោះលោកឯកអគ្គរដ្ឋទូត Nguyen Huy Tang ដែលបានបញ្ចប់ភារកិច្ចដោយជោគជ័យ និងបានវាយតម្លៃខ្ពស់ចំពោះការរួមវិភាគទានរបស់ឯកអគ្គរដ្ឋទូត ក៏ដូចជាស្ថានទូតវៀតណាមប្រចាំនៅកម្ពុជា ក្នុងការពង្រឹង និងពង្រីកទំនាក់ទំនងសហប្រតិបត្តិការលើគ្រប់វិស័យរវាងវៀតណាម និងកម្ពុជា។

សម្ដេចមហាបវរធិបតីបានសម្តែងនូវសេចក្តីរីករាយចំពោះការរីកចម្រើននៃទំនាក់ទំនងអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់ជ្រុងជ្រោយ និងយូរអង្វែងរវាងប្រទេសទាំងពីរក្នុងរយៈពេលកន្លងមក។ សម្តេចធិបតី ហ៊ុន ម៉ាណែត វាយតម្លៃខ្ពស់ចំពោះការដែលប្រទេសទាំងពីររក្សាជាប្រចាំនូវដំណើរទស្សនកិច្ច ការជួបប្រាស្រ័យរវាងថ្នាក់ដឹកនាំជាន់ខ្ពស់ និងយន្តការនៃកិច្ចប្រជុំរវាងនាយករដ្ឋមន្ត្រីនៃប្រទេសទាំងពីរ និងក្រសួង ស្ថាប័ននានា។

ទន្ទឹមនឹងនោះ ការរៀបចំជាប្រចាំយន្តការសហប្រតិបត្តិការផ្សេងទៀតបានរួមចំណែកលើកកំពស់ទំនុកចិត្តខាងនយោបាយ ដើម្បីផលប្រយោជន៍របស់ប្រជាជននៃប្រទេសនីមួយៗ ដើម្បីសន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។ សម្ដេចធិបតី ហ៊ុន ម៉ាណែត បានឯកភាពលើកកម្ពស់ប្រសិទ្ធភាពនៃកិច្ចសហប្រតិបត្តិការសេដ្ឋកិច្ច ពាណិជ្ជកម្ម វិនិយោគ និងទេសចរណ៍ រវាងប្រទេសទាំងពីរ បង្កើតសន្ទុះថ្មីសម្រាប់ពង្រឹងកិច្ចសហប្រតិបត្តិការលើវិស័យផ្សេងៗទៀត។

លោកឯកអគ្គរដ្ឋទូត Nguyen Huy Tang និងសមាជិកនៃគណៈប្រតិភូបានថតរូបទុកជាអនុស្សាវរីយ៍ជាមួយសម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា

លោកឯកអគ្គរដ្ឋទូត Nguyen Huy Tang បានថ្លែងអំណរគុណយ៉ាងស្មោះស្ម័គ្រចំពោះសម្ដេចធិបតី ហ៊ុន ម៉ាណែត និងថ្នាក់ដឹកនាំជាន់ខ្ពស់របស់កម្ពុជា ដែលតែងតែផ្តល់ការគាំទ្រ ជំនួយ និងបង្កើតលក្ខខណ្ឌអំណោយផលល្អបំផុតក្នុងអាណត្តិបេសកកម្មការទូតនៅកម្ពុជារបស់លោក។ លោកឯកអគ្គរដ្ឋទូតបានវាយតម្លៃខ្ពស់ចំពោះសមិទ្ធិផលដ៏អស្ចារ្យលើគ្រប់វិស័យដែលកម្ពុជាសម្រេចបាននាពេលថ្មីៗនេះ ក្រោមការដឹកនាំរបស់រាជរដ្ឋាភិបាល ដឹកនាំដោយសម្តេចធិបតី ហ៊ុន ម៉ាណែត ដែលរួមចំណែកលើកកំពស់តួនាទី និងកិត្យានុភាពរបស់កម្ពុជាលើឆាកអន្តរជាតិ។

លោកឯកអគ្គរដ្ឋទូត Nguyen Huy Tang បានមានប្រសាសន៍ថា ក្នុងរយៈពេល ៤៤ ឆ្នាំដែលបំពេញការងារយ៉ាងជិតស្និទ្ធជាមួយកម្ពុជា នាពេលខាងមុខ មិនថាលោកកាន់មុខតំណែងអ្វី ក៏ដោយក៏លោកនឹងបន្តពង្រឹងទំនាក់ទំនងសហប្រតិបត្តិការល្អ និងសាមគ្គីភាពរវាងវៀតណាម និងកម្ពុជា៕

បកប្រែដោយ Duy Hoan