លោក Pham Minh Chinh នាយករដ្ឋមន្ត្រីវៀតណាម ជួបពិភាក្សាការងារជាមួយលោក Li Qiang នាយករដ្ឋមន្ត្រីចិន

នៅក្នុងជំនួបនេះ លោកនាយករដ្ឋមន្ត្រី Pham Minh Chinh បានអះអាងថា ការអភិវឌ្ឍទំនាក់ទំនងជាមួយចិនគឺជាគោលនយោបាយដ៏ខ្ជាប់ខ្ជួន ជាតម្រូវការសត្យានុម័ត ជាជម្រើសយុទ្ធសាស្ត្រ និងជាអាទិភាពកំពូលក្នុងគោលនយោបាយកិច្ចការបរទេសរបស់វៀតណាម ហើយបានវាយតម្លៃខ្ពស់ចំពោះលទ្ធផល និងតួនាទីរបស់ចិនក្នុងជោគជ័យនៃកិច្ចប្រជុំ GMS លើកទី៨។

លោក Pham Minh Chinh នាយករដ្ឋមន្ត្រីវៀតណាម និងលោក Li Qiang នាយករដ្ឋមន្ត្រីចិន (រូបថត៖ vnanet.vn)

អំពីទិសដៅនៃកិច្ចសហប្រតិបត្តិការនាពេលខាងមុខ លោកនាយករដ្ឋមន្ត្រី Pham Minh Chinh បានស្នើឲ្យភាគីទាំងពីរបន្តអនុវត្តប្រកបដោយប្រសិទ្ធភាពនូវទស្សនៈរួមរវាងថ្នាក់ដឹកនាំកំពូលនៃបក្សទាំងពីរ និងប្រទេសទាំងពីរ រក្សាជំនួបប្រាស្រ័យថ្នាក់ជាន់ខ្ពស់ និងគ្រប់លំដាប់ថ្នាក់ ដើម្បីពិភាក្សាអំពីទំនាក់ទំនងទ្វេភាគី និងបញ្ហាដែលភាគីទាំងពីរមានការយកចិត្តទុកដាក់ដូចគ្នា។ លោកនាយករដ្ឋមន្ត្រី Pham Minh Chinh ក៏បានស្នើដែរថា ភាគីទាំងពីរខិតខំប្រឹងប្រែងពង្រឹងមូលដ្ឋានសង្គមនៃទំនាក់ទំនងទ្វេភាគី អនុវត្តឱ្យបានល្អនូវឆ្នាំផ្លាស់ប្តូរ វៀតណាម-ចិន នៅឆ្នាំ ២០២៥ ដោយចាត់ទុកថានេះជាឱកាសដើម្បីជំរុញការជួបប្រាស្រ័យរវាងប្រជាជននិងប្រជាជននៃប្រទេសទាំងពីរ និងឃោសនាអំពីចំណងមិត្តភាព។

ទិដ្ឋភាពនៃជំនួប (រូបថត៖ vnanet.vn)

រីឯខ្លួនវិញ លោក Li Qiang នាយករដ្ឋមន្ត្រីចិន បានអះអាងថា ចិននឹងបើកទីផ្សារបន្ថែមទៀតសម្រាប់ទំនិញប្រកបដោយគុណភាពខ្ពស់របស់វៀតណាម រួមទាំងកសិផល ព្រមទាំងឯកភាពបង្កើនការតភ្ជាប់ហេដ្ឋារចនាសម្ព័ន្ធគមនាគមន៍ ជំរុញកិច្ចសហប្រតិបត្តិការក្នុងការកសាង និងរក្សាខ្សែសង្វាក់ផ្គត់ផ្គង់ ខ្សែសង្វាក់ផលិតកម្ម ប្រកបដោយស្ថិរភាពក្នុងតំបន់ និងគាំទ្រវៀតណាមក្នុងការធ្វើជាម្ចាស់ផ្ទះនៃវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិកឆ្នាំ ២០២៧ (APEC ២០២៧)។

ក្នុងឱកាសនេះ ក្រោមសក្ខីភាពរបស់នាយករដ្ឋមន្រ្តីនៃប្រទេសទាំងពីរ ក្រសួងការបរទេសវៀតណាម និងចិនបានផ្លាស់ប្ដូរកំណត់ទូតស្តីពីការបង្កើតស្ថានអគ្គកុងស៊ុលវៀតណាមប្រចាំទីក្រុង Chongqing៕

បកប្រែដោយ Huyen Trang