លោក Bui Thanh Son រដ្ឋមន្ត្រីក្រសួងការបរទេសវៀតណាម ចូលរួមកិច្ចពិភាក្សាស្តីពីទំនាក់ទំនង វៀតណាម - អាមេរិកនៅវិទ្យាស្ថាន Brookings
កប.អនឡាញ - ក្នុងក្របខ័ណ្ឌនៃដំណើរទស្សនកិច្ចជាផ្លូវការនៅអាមេរិក និងធ្វើជាសហអធិបតីនៃកិច្ចសន្ទនាថ្នាក់រដ្ឋមន្ត្រីការបរទេសវៀតណាម-អាមេរិកលើកដំបូង នាថ្ងៃទី ២៦ មីនា នៅទីក្រុងវ៉ាស៊ីនតោន លោក Bui Thanh Son រដ្ឋមន្ត្រីក្រសួងការបរទេសវៀតណាម បានចូលរួមនិងថ្លែងសុន្ទរកថានៅកិច្ចពិភាក្សាស្តីពីទំនាក់ទំនងវៀតណាម - អាមេរិកនៅវិទ្យាស្ថាន Brookings។
ព្រឹត្តិការណ៍នេះមានការចូលរួមពីលោកស្រីបណ្ឌិត Suzanne Maloney អនុប្រធានវិទ្យាស្ថាន Brookings តំណាងនៃរដ្ឋាភិបាល រដ្ឋសភា អង្គទូត វិទ្យាស្ថានស្រាវជ្រាវ សាកលវិទ្យាល័យ និងប្រតិភូប្រមាណ ៥០០ នាក់ ដែលជាអ្នកជំនាញ និងអ្នកប្រាជ្ញ សហគមន៍ធុរកិច្ច និងទីភ្នាក់ងារសារព័ត៌មានមួយចំនួនទៀតនៅអាមេរិក។
|
|
លោក Bui Thanh Son រដ្ឋមន្ត្រីក្រសួងការបរទេសវៀតណាម (រូបថត៖ vnanet.vn) |
ក្នុងសុន្ទរកថាដែលបានថ្លែងក្នុងឱកាសនេះ លោករដ្ឋមន្ត្រី Bui Thanh Son បានអះអាងថា ស្របពេលបរិបទអន្តរជាតិប្រឈមនឹងបញ្ហាប្រឈមជាច្រើនដូចបច្ចុប្បន្ន វៀតណាមអនុវត្តដោយឥតងាករេនូវគោលនយោបាយកិច្ចការបរទេសឯករាជ្យ ខ្លួនទីពឹងខ្លួន សន្តិភាព មិត្តភាព កិច្ចសហប្រតិបត្តិការ និងអភិវឌ្ឍន៍។ ជាពិសេស លោករដ្ឋមន្ត្រីបានសង្កត់ធ្ងន់ថា វៀតណាមបន្តប្រកាន់ខ្ជាប់នូវការទូតដើមឫស្សីវៀតណាម ដើម្បីឆ្លើយតបនឹងបញ្ហាប្រឈម និងរក្សាបរិយាកាសកិច្ចការបរទេសអំណោយផលសម្រាប់ការអភិវឌ្ឍប្រទេសជាតិ។ ប្រការនេះត្រូវបានបង្ហាញយ៉ាងច្បាស់បំផុតតាមរយៈការដែលវៀតណាមមានទំនាក់ទំនងភាពជាដៃគូយុទ្ធសាស្ត្រ និងដៃគូយុទ្ធសាស្ត្រគ្រប់ជ្រុងជ្រោយជាមួយប្រទេសទាំង ៥ ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ អំពីទំនាក់ទំនងជាមួយអាមេរិក លោករដ្ឋមន្ត្រីបានអះអាងថា វៀតណាមជានិច្ចកាលចាត់ទុកអាមេរិកជាដៃគូមួយក្នុងចំណោមដៃគូដ៏សំខាន់បំផុតរបស់វៀតណាម។
នាពេលខាងមុខ ដើម្បីជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-អាមេរិក ឲ្យកាន់តែស៊ីជម្រៅថែមទៀត លោករដ្ឋមន្ត្រីបានចាត់ទុកថា ប្រទេសទាំងពីរត្រូវបង្កើនការផ្លាស់ប្តូរគណៈប្រតិភូជាន់ខ្ពស់និងគ្រប់ជាន់ថ្នាក់ ជំរុញទំនុកចិត្តផ្នែកនយោបាយ ជាពិសេសគោរពរបបនយោបាយរបស់គ្នាទៅវិញទៅមក បន្តចាត់ទុកកិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគជាស្នូល។ ភាគីទាំអពីរគួរតែជំរុញកិច្ចសហប្រតិបត្តិការលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ រួមទាំងប្រព័ន្ធអេកូឡូស៊ី semiconductor ផងដែរ៕
បកប្រែដោយ Huyen Trang