បង្កើតកម្លាំងចលករសម្រាប់កិច្ចសហប្រតិបត្តិការ ច្រើនវិស័យរវាងវៀតណាម និងកាហ្សាក់ស្ថាន

នាព្រឹកថ្ងៃទី ២១ សីហា បន្ទាប់ពីពិធីទទួលបដិសណ្ឋារកិច្ចជាផ្លូវការត្រូវបានប្រារព្ធឡើងយ៉ាងឱឡារិកនៅវិមានប្រធានារដ្ឋ លោក Vo Van Thuong បានជួបពិភាក្សាជាមួយលោក Kassym-Jomart Kemelevich Tokaev។

ទិដ្ឋភាពនៃកិច្ចពិភាក្សា

នៅក្នុងកិច្ចពិភាក្សានេះ មេដឹកនាំទាំងពីរបានអះអាងនូវសារៈសំខាន់នៃការជំរុញការផ្លាស់ប្តូរគណៈប្រតិភូគ្រប់ជាន់ថ្នាក់ ជាពិសេសថ្នាក់ជាន់ខ្ពស់ និងការអនុវត្តប្រកបដោយប្រសិទ្ធភាពនូវយន្តការសហប្រតិបត្តិការដែលមានស្រាប់ ក៏ដូចជារវាងក្រសួង ស្ថាប័ន និងមូលដ្ឋាន ដើម្បីបង្កើនការយល់ដឹង ទំនុកចិត្ត និងបង្កើតកម្លាំងចលករសម្រាប់កិច្ចសហប្រតិបត្តិការពហុភាគីរវាងប្រទេសទាំងពីរ។ ភាគីទាំងពីរបានឯកភាពបន្តសម្របសម្រួល និងគាំទ្រគ្នាទៅវិញទៅមកយ៉ាងជិតស្និទ្ធនៅវេទិកាពហុភាគី ជាពិសេសអង្គការសហប្រជាជាតិ កិច្ចប្រជុំកំពូលស្តីពីការសម្របសម្រួលសកម្មភាព និងវិធានការកសាងទំនុកចិត្តនៅអាស៊ី (CICA)...ព្រមទាំង អះអាងថា វៀតណាមត្រៀមខ្លួនជាស្ពានសម្រាប់កាហ្សាក់ស្ថានពង្រឹងកិច្ចសហប្រតិបត្តិការជាមួយបណ្តាប្រទេសក្នុងតំបន់អាស៊ីអាគ្នេយ៍ ហើយកាហ្សាក់ស្ថាននឹងក្លាយជាស្ពានសម្រាប់វៀតណាមពង្រឹងកិច្ចសហប្រតិបត្តិការជាមួយបណ្តាប្រទេសអាស៊ីកណ្តាល។

លោក Vo Van Thuong ប្រធានរដ្ឋវៀតណាម

មេដឹកនាំទាំងពីរបានឯកភាពពង្រីកកិច្ចសហប្រតិបត្តិការលើវិស័យសក្តានុពលដូចជា ការដឹកជញ្ជូន ការអប់រំ-បណ្តុះបណ្តាល វប្បធម៌ កីឡា ទេសចរណ៍ ហិរញ្ញវត្ថុ ធនាគារ និងបច្ចេកវិទ្យាខ្ពស់ ហើយនិងស្វាគមន៍ការបើកជើងហោះហើរត្រង់រវាងវៀតណាម និងកាហ្សាក់ស្ថានក្នុងខែតុលា ឆ្នាំ២០២២ ព្រមទាំងជឿជាក់ថា ការចុះហត្ថលេខាលើកិច្ចព្រមព្រៀងលើកលែងទិដ្ឋាការទ្វេភាគីសម្រាប់អ្នកកាន់លិខិតឆ្លងដែនធម្មតា និងអនុស្សរណៈយោគយល់គ្នាស្តីពីកិច្ចសហប្រតិបត្តិការលើវិស័យទេសចរណ៍ក្នុងឱកាសនេះនឹងរួមចំណែកលើកកម្ពស់កិច្ចសហប្រតិបត្តិការទេសចរណ៍ និងការផ្លាស់ប្តូររវាងប្រជាជននៃប្រទេសទាំងពីរ។

លោក Kassym-Jomart Kemelevich Tokaev ប្រធានាធិបតី នៃសាធារណរដ្ឋកាហ្សាក់ស្ថាន

ក្នុងឱកាសនេះ មេដឹកនាំទាំងពីរបានផ្លាស់ប្តូរយោបល់លើបញ្ហាអន្តរជាតិ និងតំបន់មួយចំនួនដែលមានការយកចិត្តទុកដាក់ដូចគ្នា និងចែករំលែកទស្សនៈស្តីពីការដោះស្រាយវិវាទក្នុងតំបន់ និងពិភពលោកដោយសន្តិវិធី ឈរលើមូលដ្ឋនៃច្បាប់អន្តរជាតិ។

បន្ទាប់ពីកិច្ចពិភាក្សា ថ្នាក់ដឹកនាំទាំងពីរបានធ្វើជាសាក្សីក្នុងពិធីចុះហត្ថលេខាលើឯកសារកិច្ចសហប្រតិបត្តិការមួយចំនួន រួមមាន៖ កិច្ចព្រមព្រៀងស្តីពីការផ្ទេរទណ្ឌិត កិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់លិខិតឆ្លងដែនធម្មតា ផែនការសកម្មភាពរួម ដើម្បីជំរុញកិច្ចសហប្រតិបត្តិការសេដ្ឋកិច្ច-ពាណិជ្ជកម្ម ដំណាក់កាល ២០២៣-២០២៥ អនុស្សរណៈនៃកិច្ចសហប្រតិបត្តិការក្នុងវិស័យទេសចរណ៍ អនុស្សរណៈនៃការយោគយល់គ្នារវាងទូរទស្សន៍វៀតណាម និងក្រុមហ៊ុន Agency Khabar ៕

បកប្រែដោយ Thanh Cong