ពង្រីកកិច្ចសហប្រតិបត្តិការវៀតណាម-ស្វីសលើគ្រប់វិស័យទាំងអស់
កប.អនឡាញ - នារសៀលថ្ងៃទី១៣ ខែមេសា នៅទីស្នាក់ការរដ្ឋាភិបាល លោក Pham Minh Chinh នាយករដ្ឋមន្ត្រីវៀតណាម បានទទួលជួបលោក Thomas Gass ឯកអគ្គរដ្ឋទូតវិសាមញ្ញ និងពេញសមត្ថភាពនៃសហព័ន្ធស្វីសប្រចាំវៀតណាម ក្នុងឱកាសទទួលបេសកកម្មនៅវៀតណាម។
នៅក្នុងជំនួបនេះ លោក Pham Minh Chinh នាយករដ្ឋមន្ត្រីវៀតណាម បានអះអាងថា វៀតណាមអនុវត្តគោលនយោបាយការបរទេសឯករាជ្យ ស្វ័យភាព ពិពិធកម្ម និងពហុភាគីក្នុងទំនាក់ទំនងបរទេស ធ្វើសមាហរណកម្មអន្តរជាតិយ៉ាងសកម្ម ទូលំទូលាយ និងស៊ីជម្រៅ ជាមិត្ត ជាដៃគូដែលមានទំនុកចិត្ត និងជាសមាជិកសកម្ម និងមានទំនួលខុសត្រូវក្នុងសហគមន៍អន្តរជាតិ។ ក្នុងស្មារតីនេះ លោក Pham Minh Chinh នាយករដ្ឋមន្ត្រីវៀតណាម បានអះអាងថា វៀតណាមជានិច្ចកាលយកចិត្តទុកដាក់ចំពោះទំនាក់ទំនងមិត្តភាព និងកិច្ចសហប្រតិបត្តិការជាមួយស្វីស។ លោកបានសម្តែងនូវជំនឿថា ក្នុងអាណត្តិរបស់ខ្លួន លោកឯកអគ្គរដ្ឋទូតនឹងបន្តរួមចំណែកយ៉ាងសកម្មក្នុងការអភិវឌ្ឍន៍ទំនាក់ទំនងទ្វេភាគី ដោយឈរលើមូលដ្ឋាននៃកិច្ចសហប្រតិបត្តិការល្អនាពេលកន្លងមក។
|
|
លោក Pham Minh Chinh នាយករដ្ឋមន្ត្រីវៀតណាម ទទួលជួបលោក Thomas Gass ឯកអគ្គរដ្ឋទូតវិសាមញ្ញ និងពេញសមត្ថភាពនៃសហព័ន្ធស្វីសប្រចាំវៀតណាម (រូបថត៖ vnanet.vn) |
លោកនាយករដ្ឋមន្ត្រីវាយតម្លៃថា ទំនាក់ទំនងវៀតណាម-ស្វីសកំពុងអភិវឌ្ឍន៍យ៉ាងស៊ីជម្រៅ និងជាក់ស្តែងលើគ្រប់វិស័យ ជាពិសេសនយោបាយ-ការទូត ពាណិជ្ជកម្ម-វិនិយោគ កិច្ចសហប្រតិបត្តិការអភិវឌ្ឍន៍ ដែលបង្កើតកម្លាំងចលករពង្រីកកិច្ចសហប្រតិបត្តិការលើគ្រប់វិស័យ។
លោកនាយករដ្ឋមន្ត្រីបានស្នើប្រទេសស្វីសបង្កើតលក្ខខណ្ឌអំណោយផល និងគាំទ្រធុរកិច្ចស្វ៊ីសឲ្យចូលមកបណ្តាក់ទុនធ្វើអាជីវកម្មរយៈពេលវែងប្រកបដោយគុណភាពខ្ពស់នៅវៀតណាម ដោយផ្តោតលើវិស័យដែលស្វ៊ីសមានឧត្តមភាព ហើយវៀតណាមផ្តល់អាទិភាព ដូចជា៖ ការធ្វើបរិវត្តកម្មឌីជីថល ការធ្វើបរិវត្តកម្មបៃតង សេដ្ឋកិច្ចរង្វង់ ការឆ្លើយតបទៅនឹងការប្រែប្រួលអាកាសធាតុ កសិកម្មបច្ចេកវិទ្យាខ្ពស់ ធនាគារ-ហិរញ្ញវត្ថុ សុខាភិបាល។ លើសពីនេះ ភាគីទាំងពីរគួរតែបន្តជំរុញការចរចាលើកិច្ចព្រមព្រៀងពាណិជ្ជកម្មសេរីវៀតណាម-អឺរ៉ុប (EFTA) ដើម្បីពង្រឹងកិច្ចសហប្រតិបត្តិការវិនិយោគ-ពាណិជ្ជកម្មរវាងប្រទេសទាំងពីរនាពេលខាងមុខ។ លោក Pham Minh Chinh នាយករដ្ឋមន្ត្រីវៀតណាម ក៏បានស្នើឱ្យភាគីទាំងពីរពង្រីកកិច្ចសហប្រតិបត្តិការលើវិស័យវិទ្យាសាស្ត្រ-បច្ចេកវិទ្យា ការអប់រំ-បណ្តុះបណ្តាល និងការផ្លាស់ប្តូរប្រជាជន និងប្រជាជន ដោយហេតុនោះ រួមចំណែកជួយវៀតណាមក្នុងការលើកកំពស់គុណភាពធនធានមនុស្ស ក៏ដូចជាបង្កើនការយោគយល់គ្នារវាងប្រទេសទាំងពីរ។
|
|
លោក Pham Minh Chinh នាយករដ្ឋមន្ត្រីវៀតណាម ទទួលជួបលោក Thomas Gass ឯកអគ្គរដ្ឋទូតវិសាមញ្ញ និងពេញសមត្ថភាពនៃសហព័ន្ធស្វីសប្រចាំវៀតណាម (រូបថត៖ vnanet.vn) |
ក្នុងឱកាសនេះ លោក Pham Minh Chinh នាយករដ្ឋមន្ត្រីវៀតណាម បានថ្លែងអំណរគុណចំពោះរដ្ឋាភិបាល និងប្រជាជនស្វីស ដែលបានជួយឧបត្ថម្ភសម្ភារៈបរិក្ខារពេទ្យដល់ប្រទេសវៀតណាមក្នុងអំឡុងការរីករាលដាលនៃជំងឺ Covid-19។ លោកនាយករដ្ឋមន្ត្រីក៏បានសង្ឃឹមថា រដ្ឋាភិបាលស្វីសនឹងបន្តជួយឧបត្ថម្ភ និងបង្កើតលក្ខខណ្ឌអំណោយផលសម្រាប់សហគមន៍វៀតណាមក្នុងការរស់នៅ និងធ្វើការនៅប្រទេសស្វីស។
លោកឯកអគ្គរដ្ឋទូត Thomas Gass បានអះអាងថា វៀតណាមជាដៃគូសេដ្ឋកិច្ចកាន់តែសំខាន់ចំពោះស្វីស ហើយភាគីទាំងពីរនៅតែមានឱកាសជាច្រើនសម្រាប់កិច្ចសហប្រតិបត្តិការ។ ឈរលើមូលដ្ឋាននោះ ស្វីសមានបំណងជំរុញដំណើរការចរចានៃកិច្ចព្រមព្រៀងពាណិជ្ជកម្មសេរីវៀតណាម-EFTA។ ទន្ទឹមនឹងនោះ ពង្រឹងកិច្ចសហប្រតិបត្តិការទ្វេភាគីលើវិស័យវិទ្យាសាស្ត្រ-បច្ចេកវិទ្យា ការអប់រំ-បណ្តុះបណ្តាល ទេសចរណ៍ និងការផ្លាស់ប្តូររវាងប្រជាជន និងប្រជាជន។
ចំពោះកិច្ចសហប្រតិបត្តិការពហុភាគី លោក Pham Minh Chinh នាយករដ្ឋមន្ត្រី បានវាយតម្លៃខ្ពស់ និងស្នើឱ្យប្រទេសទាំងពីរបន្តកិច្ចសហប្រតិបត្តិការ និងគាំទ្រគ្នាទៅវិញទៅមកនៅវេទិកាពហុភាគី និងអង្គការអន្តរជាតិ ជាពិសេសនៅអង្គការសហប្រជាជាតិ។ លោកនាយករដ្ឋមន្ត្រីបានស្នើឱ្យស្វីសគាំទ្រគោលជំហរ និងការខិតខំប្រឹងប្រែងរបស់អាស៊ាន និងវៀតណាមលើការរក្សាសន្តិភាព ស្ថិរភាព ធានាសេរីភាព សន្តិសុខ និងសុវត្ថិភាពនៃការធ្វើនាវាចរណ៍ និងអាកាសចរណ៍នៅសមុទ្រនៅសមុទ្រខាងកើត ព្រមទាំងដោះស្រាយវិវាទដោយសន្តិវិធី ឈរលើមូលដ្ឋានច្បាប់អន្តរជាតិ រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២៕
បកប្រែដោយ Thanh Cong