កម្មវិធី COVAX នឹងជូនវ៉ាក់សាំង Pfizer និង Moderna ជាង ៩ លានដូសបន្ថែមទៀតដល់វៀតណាម
កប.អនឡាញ - នារសៀលថ្ងៃទី៣ ខែវិច្ឆិកា តាមម៉ោងមូលដ្ឋាន ក្នុងក្របខ័ណ្ឌនៃដំណើរទស្សនកិច្ចជាផ្លូវការនៅសាធារណរដ្ឋបារាំង នាយករដ្ឋមន្ត្រីវៀតណាម លោក Pham Minh Chinh បានទទួលជួបលោកស្រី Aurélia Nguyen នាយិកាប្រតិបត្តិយន្តការចែកចាយវ៉ាក់សាំងកូវីដ ១៩ របស់អង្គការសហប្រជាជាតិ COVAX។
លោក Pham Minh Chinh ថ្លែងអំណរគុណចំពោះកម្មវិធី COVAX បានសន្យាផ្ដល់វ៉ាក់សាំងឥតគិតថ្លៃដល់វៀតណាម។ លោកនាយករដ្ឋមន្ត្រីសង្កត់ធ្ងន់ថា ដោយមានការប្ដេជ្ញាចិត្តនិងកិច្ចខិតខំរបស់រដ្ឋាភិបាល ការជួយគាំទ្ររបស់មិត្តភក្តិអន្តរជាតិ រួមទាំងជំនួយដ៏សំខាន់របស់ COVAX និងប្រទេសនានាតាមរយៈកម្មវិធី COVAX ជាពិសេសគឺការរួមសុខរួមទុក្ខរបស់ប្រជាជន ជំងឺរាតត្បាតនៅវៀតណាមត្រូវបានគ្រប់គ្រង ហើយកំពុងស្ដារនិងជម្រុញការអភិវឌ្ឍសេដ្ឋកិច្ច សង្គម តភ្ជាប់ឡើងវិញនូវសកម្មភាពសេដ្ឋកិច្ច ទេសចរណ៍។ ប៉ុន្តែ លោកនាយករដ្ឋមន្ត្រីសង្កត់ធ្ងន់ថា វៀតណាមត្រូវការវ៉ាក់សាំងបន្ថែមទៀតដើម្បីចាក់វ៉ាក់សាំងជូនកុមារ និងការចាក់វ៉ាក់សាំងដូសទី៣។
|
|
លោក Pham Minh Chinh និងលោកស្រី Aurélia Nguyen (រូបថត៖ vnanet.vn) |
ក្នុងស្មារតីសាមគ្គីភាពអន្តរជាតិ និងចូលរួមចំណែកដោយមានទំនួលខុសត្រូវក្នុងកិច្ចខិតខំរួម ដើម្បីគ្រប់គ្រងបានជំងឺរាតត្បាត លោក Pham Minh Chinh បានប្រកាសថា រដ្ឋាភិបាលវៀតណាមប្ដេជ្ញាចិត្តជូនថវិកា ៥០ ម៉ឺនដុល្លារអាមេរិកដល់កម្មវិធី COVAX នាំមកនូវការវិភាគទានសរុបរបស់វៀតណាមចំពោះ COVAX ឡើងដល់ ១ លានដុល្លារអាមេរិក។
លោកស្រីនាយិកាប្រតិបត្តិកម្មវិធី COVAX បានឲ្យដឹងថា បន្ទាប់ពីកិច្ចសន្ទនាតាមទូរស័ព្ទជាមួយលោកនាយករដ្ឋមន្ត្រី នាថ្ងៃទី២០ ខែកញ្ញា កម្មវិធី COVAX បានជម្រុញការផ្តល់វ៉ាក់សាំងដល់វៀតណាម ពិសេស កម្មវិធី COVAX នឹងជូនវ៉ាក់សាំង Pfizer និង Moderna ជាង ៩ លានដូសបន្ថែមទៀតដល់វៀតណាម។ លោកស្រី Aurélia Nguyen បញ្ជាក់ថា កម្មវិធី COVAX នឹងបន្តរួមដំណើរជាមួយវៀតណាមក្នុងការប្រយុទ្ធប្រឆាំងនឹងជំងឺរាតត្បាតតាមរយៈការផ្ដល់វ៉ាក់សាំង ជួយឧបត្ថម្ភបច្ចេកទេសបម្រើការចាក់វ៉ាក់សាំងនិងការទទួលវ៉ាក់សាំង៕
បកប្រែដោយ Thuy Anh