នាយករដ្ឋមន្រ្តីវៀតណាម លោក Nguyen Xuan Phuc ផ្តល់បទសម្ភាសន៍ជាមួយសារព័ត៌មានបរទេសស្ដីពីការប្រយុទ្ធប្រឆាំងនឹងជំងឺរាតត្បាត Covid-19 នៅវៀតណាម
កប.អនឡាញ - នាថ្ងៃទី២១ ឧសភា នៅទីក្រុងហាណូយ នាយករដ្ឋមន្រ្តីវៀតណាម លោក Nguyen Xuan Phuc បានអញ្ជើញផ្តល់បទសម្ភាសន៍ជាមួយទីភ្នាក់ងារសារព័ត៌មានបរទេសប្រចាំវៀតណាមដូចជា Bloomberg (អាមេរិក) TASS (រុស្ស៊ី) NHK និងកាសែត Akahata (ជប៉ុន) ស្ដីពីការប្រយុទ្ធប្រឆាំងនឹងជំងឺរាតត្បាត Covid-19 នៅវៀតណាម
លោកនាយករដ្ឋមន្រ្តី Nguyen Xuan Phuc បានអះអាងថា ភាពជោគជ័យរបស់វៀតណាមគឺអាស្រ័យទៅលើការប្រុងប្រយ័ត្នចំពោះជំងឺរាតត្បាតតាំងពីដំបូង ដោយបានចាត់វិធានការយ៉ាងម៉ឹងម៉ាត់ យកប្រជាជនជាមជ្ឈភាព និងទទួលបានការគាំទ្រយ៉ាងខ្លាំងពីប្រជាជន។ លោកនាយករដ្ឋមន្ត្រីបានសង្កត់ធ្ងន់ថា ទស្សនៈឥតងាករេរបស់ បក្ស រដ្ឋ និងរដ្ឋាភិបាលវៀតណាមគឺរក្សាភាពម្ចាស់ការ មិនធ្វេសប្រហែស ដោយ“ប្រយុទ្ធប្រឆាំងជំងឺរាតត្បាតដូចជាការប្រយុទ្ធប្រឆាំងនឹងសត្រូវ” ដែលបានកៀរគរគ្រប់កម្លាំងទាំងអស់ និងមានការចូលរួមពីប្រព័ន្ធនយោបាយ និងសហគមន៍សង្គមទាំងមូល ព្រមទាំងផ្ដល់អាទិភាពលើការបង្ការជំងឺ ដែលទប់ស្កាត់ការឆ្លងជំងឺពីខាងក្រៅ កំណត់តំបន់ផ្ទុះជំងឺដើម្បីកំចាត់ ការព្យាបាលជំងឺប្រកបដោយប្រសិទ្ធភាព ហើយហ៊ានលះបង់ប្រយោជន៍សេដ្ឋកិច្ចដើម្បីការពារសុខភាព និងអាយុជីវិតរបស់ប្រជាជន។
    |
 |
|
លោកនាយករដ្ឋមន្រ្តី Nguyen Xuan Phuc |
លោកនាយករដ្ឋមន្ត្រីឲ្យដឹងថា ដោយប្រឈមមុខនឹងផលប៉ះពាល់នានាដែលបង្កឡើងដោយជំងឺរាតត្បាតនេះ រដ្ឋាភិបាលវៀតណាមបានអនុវត្តដំណោះស្រាយជាច្រើនដើម្បីដោះស្រាយការលំបាកក្នុងផលិតកម្ម ការធ្វើអាជិវកម្ម ជាពិសេសគឺយកចិត្តទុកដាក់ដល់ជីវភាពរស់នៅរបស់ប្រជាជន ធានាសុខុមាលភាពសង្គម។ អាស្រ័យហេតុនេះ រហូតមកទល់បច្ចុប្បន្ននេះ វៀតណាមគ្រប់គ្រងបានជំងឺរាតត្បាតនេះជាសារវ័ន្ត ព្រមទាំងរក្សាបានម៉ាក្រូសេដ្ឋកិច្ច និងប្ដេជ្ញាចិត្តសម្រេចបានកំណើន GDP ក្នុងឆ្នាំ២០២០គឺ ពី៤,៥ ដល់៥% ។
ចែករំលែកអំពីកិច្ចសហប្រតិបតិ្តការអន្តរជាតិរបស់វៀតណាមក្នុងការទប់ទល់នឹងជំងឺឆ្លង Covid-19 លោកនាយករដ្ឋមន្រ្តី Nguyen Xuan Phuc បានមានប្រសាសន៍ថា វៀតណាមមានសកម្មភាពជាក់ស្ដែងជាច្រើនដែលទទួលបានការវាយតម្លៃខ្ពស់ពីសហគមន៍អន្តរជាតិដូចជា ការប្រគល់ម៉ាស់សម្ភារៈបរិក្ខារពេទ្យ និងការចែករំលែកព័ត៌មានបទពិសោធន៍ក្នុងការបង្ការទប់ស្កាត់ជំងឺរាតត្បាតជាដើម៕
បកប្រែដោយ Duy Hoan