សកម្មភាពរបស់លោក Pham Binh Minh ឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសវៀតណាមនៅប្រទេសឡាវ
កប.អនឡាញ - ក្នុងឱកាសចូលរួមកិច្ចប្រជុំរដ្ឋមន្ត្រីការបរទេសមេគង្គ - ឡានឆាង លើកទី ៥ និងកិច្ចប្រជុំពិសេសរដ្ឋមន្រ្តីការបរទេសអាស៊ាន - ចិនស្តីពីកិច្ចសហប្រតិបត្តិការក្នុងការទប់ទល់នឹងមេរោគផ្លូវដង្ហើមដែលបណ្តាលមកពីវីរុសកូរ៉ូណាប្រភេទថ្មី (Covid-19) នៅប្រទេសឡាវ នារសៀលថ្ងៃទី ១៩ ខែកុម្ភៈ នៅទីក្រុងវៀងចន្ទន៍ លោក Pham Binh Minh ឧបនាយករដ្ឋមន្ដ្រី និងជារដ្ឋមន្រ្តីក្រសួងការបរទេសវៀតណាម បានជួបទ្វេភាគីជាមួយលោក Wang Yi រដ្ឋមន្រ្តីក្រសួងការបរទេសចិន និងលោក Saleumsay Kommasith រដ្ឋមន្រ្តីក្រសួងការបរទេសឡាវ។
នៅក្នុងជំនួបទ្វេភាគីជាមួយលោករដ្ឋមន្រ្តីក្រសួងការបរទេសចិន លោកឧបនាយករដ្ឋមន្រ្តី Pham Binh Minh បានចែករំលែកនូវការលំបាក់ដែលបណ្តាលមកពីការរីករាលដាលនៃជំងឺ Covid-19 និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ចិនក្នុងការសហការជាមួយបណ្ដាប្រទេសដើម្បីទប់ស្កាត់ការរីករាលដាលមេរោគកូរ៉ូណាប្រភេទថ្មី។
    |
 |
|
លោក Pham Binh Minh ឧបនាយករដ្ឋមន្ដ្រីនិងជារដ្ឋមន្រ្តីក្រសួងការបរទេសវៀតណាម បានជួបទ្វេភាគីជាមួយលោក Wang Yi រដ្ឋមន្រ្តីក្រសួងការបរទេសចិន (រូបថត៖ baochinhphu.vn) |
អំពីទំនាក់ទំនងទ្វេភាគី លោកឧបនាយករដ្ឋមន្រ្តីបានស្នើឱ្យភាគីចិនបន្តបង្កលក្ខណៈងាយស្រួលសម្រាប់ការនាំចូលទំនិញវៀតណាម ជាពិសេសកសិផលចូលមកទីផ្សារចិន។ ទាក់ទិននឹងបញ្ហាសមុទ្រ លោកឧបនាយករដ្ឋមន្ត្រី Pham Binh Minh បានបង្ហាញពីគោលជំហររបស់វៀតណាមចំពោះបញ្ហាសមុទ្រ ដោយចាត់ទុកថា ភាគីទាំងពីរគួរតែខិតខំប្រឹងប្រែងក្នុងការស្វែងរកដំណោះស្រាយសមស្របចំពោះបញ្ហានេះ បន្តអនុវត្ដយន្តការដែលមានស្រាប់។ លោកបញ្ជាក់ថា វៀតណាមនឹងបន្តសហការជាមួយចិន និងបណ្តាប្រទេសផ្សេងៗក្នុងការស្វែងរកវិធានការដើម្បីរក្សាសន្តិភាពសន្តិសុខ និងស្ថិរភាពនៅសមុទ្រខាងកើត និងបង្កលក្ខណៈងាយស្រួលសម្រាប់កិច្ចចរចារស្ដីពីក្រមប្រតិបត្តិនៅសមុទ្រខាងកើត (COC) ទទួលបានលទ្ធផលជាក់ស្តែងនាពេលឆាប់ៗនេះស្របតាមច្បាប់អន្តរជាតិ។
រីឯលោក Wang Yi បានថ្លែងអំណរគុណវៀតណាមចំពោះការចែករំលែកនិងការជួយឧបត្ថម្ភរបស់ចិនក្នុងការបង្ការ និងទប់ស្កាត់ជំងឺរាតត្បាត ព្រមទាំងវាយតម្លៃខ្ពស់ចំពោះលទ្ធផលនៃការបង្ការ និងទប់ស្កាត់ជំងឺរាតត្បាតនៅវៀតណាម។ លោក Wang Yi បានសង្កត់ធ្ងន់ថា ចិននឹងបង្កើនការនាំចូលផលិតផលរបស់វៀតណាមនិងដោះស្រាយរាល់បញ្ហានៅសេសសល់ក្នុងគម្រោងសហប្រតិបត្ដិការរវាងប្រទេសទាំងពីរ។
*នៅក្នុងជំនួបជាមួយលោក Saleumsay Kommasith រដ្ឋមន្ត្រីក្រសួងការបរទេសឡាវ លោក Pham Binh Minh ឧបនាយករដ្ឋមន្ត្រីនិងជារដ្ឋមន្រ្តីក្រសួងការបរទេសវៀតណាម បានវាយតម្លៃខ្ពស់ចំពោះតួនាទីជាម្ចាស់ផ្ទះឡាវ។
|
|
 |
|
លោក Pham Binh Minh ឧបនាយករដ្ឋមន្ត្រីនិងជារដ្ឋមន្រ្តីក្រសួងការបរទេសវៀតណាមនិងលោក Saleumsay Kommasith រដ្ឋមន្ត្រីក្រសួងការបរទេសឡាវ (រូបថត៖ baochinhphu.vn) |
រដ្ឋមន្រ្តីទាំងពីរបានឯកភាពជំរុញការអនុវត្តកិច្ចព្រមព្រៀងដែលសម្រេចបានដោយថ្នាក់ដឹកនាំជាន់ខ្ពស់និងលទ្ធផលនៃសម័យប្រជុំលើកទី ៤២ នៃគណៈកម្មាធិការអន្តររដ្ឋាភិបាលវៀតណាម - ឡាវ កាលពី ខែមករា កន្លងមក។ ក្នុងនោះលើកកម្ពស់ប្រសិទ្ធភាពនៃកិច្ចសហប្រតិបត្តិការសេដ្ឋកិច្ច ពាណិជ្ជកម្ម វិនិយោគ អប់រំ និងបណ្តុះបណ្តាលការដឹកជញ្ជូន ទេសចរណ៍ ឃោសនា ... រក្សាការផ្លាស់ប្តូរគណៈប្រតិភូគ្រប់លំដាប់ថ្នាក់និងរួមគ្នារៀបចំព្រឹត្តិការណ៍សំខាន់ៗនៃប្រទេសទាំងពីរ។
រដ្ឋមន្រ្តីទាំងពីរបានឯកភាពបន្តសហការយ៉ាងជិតស្និទ្ធលើវេទិកាតំបន់ និងអន្តរជាតិ ជាពិសេសនៅពេលដែលវៀតណាមបានទទួលតួនាទីជាប្រធានអាស៊ាននិងសមាជិកមិនអចិន្ត្រៃយ៍របស់អង្គការសហប្រជាជាតិក្នុងឆ្នាំ ២០២០ ខណៈដែលប្រទេសឡាវគឺជាប្រទេសម្ចាស់ផ្ទះនៃយន្តការអនុតំបន់មេគង្គសំខាន់ៗជាច្រើនដូចជា CLV, CLMV, ACMECS និងជាប្រទេសសម្របសម្រួលសម្រាប់ទំនាក់ទំនងអាស៊ាន - អាមេរិក៕
បកប្រែដោយ Thanh Cong