ជំរុញកិច្ចសហប្រតិបត្តិការលើច្រើនវិស័យរវាងវៀតណាមនិងកូតឌីវ័រ
កប.អនឡាញ - នារសៀលថ្ងៃទី ១៩ មិថុនា នៅទីស្នាក់ការរដ្ឋាភិបាល នាយករដ្ឋមន្ត្រីវៀតណាមលោក Nguyen Xuan Phuc បានទទួលជួបសន្ទនាជាមួយរដ្ឋមន្ត្រីការបរទេសនៃសាធារណរដ្ឋកូតឌីវ័រ លោក Marcel Amon Tanoh។
នាយករដ្ឋមន្ត្រីវៀតណាមលោក Nguyen Xuan Phuc បានគូសបញ្ចាក់ថា វៀតណាមគាំទ្រការជំរុញទំនាក់ទំនងសហប្រតិបត្តិការរវាងប្រទេសទាំងពីរដែលក្នុងនោះមិនត្រឹមតែលើវិស័យសេដ្ឋកិច្ចប៉ុណ្ណោះទេ ថែមទាំងលើវិស័យការពារជាតិនិងសន្ដិសុខទៀតផង។ លោកនាយករដ្ឋមន្ត្រីវៀតណាមមានបំណងចង់ឲ្យសហគ្រាសនៃប្រទេសទាំងពីរជំរុញពាណិជ្ជកម្មនិងស្វែងរកឱកាសសហប្រតិបត្តិការពាណិជ្ជកម្ម។ ព្រមទាំងសង្ឃឹមថា ប្រទេសកូតឌីវ័រនឹងបង្កលក្ខណៈងាយស្រួលសម្រាប់បណ្ដាសហគ្រាសវៀតណាមក្នុងការធ្វើអាជីវកម្មនៅប្រទេសកូតឌីវ័រនិងជួយឲ្យទំនិញវៀតណាមចូលមកទីផ្សារកូតឌីវ័រ។
|
|
នាយករដ្ឋមន្ត្រីវៀតណាមលោក Nguyen Xuan Phuc ទទួលជួបសន្ទនាជាមួយរដ្ឋមន្ត្រីការបរទេសនៃសាធារណរដ្ឋកូតឌីវ័រ លោក Marcel Amon Tanoh (រូបថត៖ vnanet.vn) |
លោកនាយករដ្ឋមន្ត្រីវៀតណាម បានឲ្យដឹងរថា វៀតណាមត្រៀមខ្លួនចែករំលែកបទពិសោធន៏ គាំទ្រ និងជួយប្រទេសកូតឌីវ័រក្នុងវិស័យដាំស្រូវ។ លោកនាយករដ្ឋមន្ត្រីបានចាត់ទុកថា ប្រទេសវៀតណាមនិងប្រទេសកូតឌីវ័រគួរបង្កើនការផ្លាស់ប្តូរយោបល់និងកិច្ចសហប្រតិបត្តិការ ហើយបំពេញបន្ថែមភាពខ្លាំងលើគ្នាទៅវិញទៅមក។ ប្រទេសកូតឌីវ័រនឹងក្លាយទៅជាស្ពានតភ្ជាប់សម្រាប់ទំនិញវៀតណាមចូលមកទីផ្សារអាហ្វ្រិក និងផ្ទុយទៅវិញ ហើយប្រទេសវៀតណាមជាស្ពានតភ្ជាប់សម្រាប់ទំនិញរបស់ប្រទេសកូតឌីវ័រចូលមកទីផ្សារអាស៊ាន ក៏ដូចជាដៃគូសំខាន់ៗរបស់វៀតណាមដែរ។
ដើម្បីជំរុញកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ លោករដ្ឋមន្ត្រី Marcel Amon Tanoh បានស្នើឱ្យភាគីទាំងពីរចុះហត្ថលេខាលើកិច្ចព្រមព្រៀងស្ដីពីការការពារវិនិយោគនិងកិច្ចព្រមព្រៀងស្ដីពីការចៀសវាងការយកពន្ធត្រួតគ្នា។ នៅក្នុងដំណើរការទំនើបនីយកម្មខឿនសេដ្ឋកិច្ច ប្រទេសកូតឌីវ័រចង់អភិវឌ្ឍន៍ឧស្សាហកម្មកែច្នៃ ជាពិសេសលើវិស័យកែច្នៃគ្រាប់ស្វាយចន្ទី។ នេះគឺជាឱកាសសម្រាប់សហគ្រាសវៀតណាមចូលមកវិនិយោគនៅប្រទេសកូតឌីវ័រ។ ក្រៅទីនេះកូតឌីវ័រ ក៏មានបំណងចង់រៀនសូត្របទពិសោធន៏ពីវៀតណាមក្នុងការដាំដុះស្រូវនិងកែច្នៃអង្ករដែរ។ ជាមួយគ្នានោះភាគីទាំងពីរក៏បានព្រមព្រៀងគ្នាក្នុងការពង្រីកកិច្ចសហប្រតិបត្តិការលើវិស័យជាច្រើនដូចជាវិស័យការពារជាតិនិងសុខាភិបាលដែរ៕
បកប្រែដោយ Thanh Cong