កិច្ចប្រជុំមន្ដ្រីជាន់ខ្ពស់អាស៊ាន
កប.អនឡាញ- កាលពីថ្ងៃទី ៣១ កក្កដា បណ្ដាមន្ត្រីជាន់ខ្ពស់អាស៊ាន (SOM) បានជួបប្រជុំគ្នានៅប្រទេសសិង្ហបុរីដើម្បីត្រៀមរៀបចំកិច្ចប្រជុំថ្នាក់រដ្ឋមន្ត្រីការបរទេសអាស៊ានលើកទី ៥១ (AMM-51) និងកិច្ចប្រជុំពាក់ព័ន្ធដែលនឹងប្រព្រឹត្តទៅពីថ្ងៃទី ១ ដល់ថ្ងៃទី ៤ ខែសីហា ឆ្នាំ២០១៨។ លោក Nguyen Quoc Dung អនុរដ្ឋមន្ត្រីការបរទេសវៀតណាម ប្រធាន SOM ASEAN បានដឹកនាំគណៈប្រតិភូវៀតណាមទៅចូលរួមកិច្ចប្រជុំនេះ។
ក្នុងកិច្ចប្រជុំនោះ បណ្ដាប្រទេសបានពិនិត្យឡើងវិញ និងបញ្ចប់ការត្រៀមរៀបចំកិច្ចប្រជុំ AMM-51 ក៏ដូចជាកិច្ចប្រជុំពាក់ព័ន្ធនានា (រួមមានកិច្ចប្រជុំថ្នាក់រដ្ឋមន្ត្រីអាស៊ានជាមួយដៃគូសន្ទនាចំនួន ១០; កិច្ចប្រជុំថ្នាក់រដ្ឋមន្ត្រីការបរទេសអាស៊ានបូក ៣; កិច្ចប្រជុំកំពូលអាស៊ីខាងកើត (EAS) និងកិច្ចប្រជុំអាស៊ាន - វេទិកាតំបន់អាស៊ាន (ARF)។
    |
 |
|
ទីដ្ឋភាពនៃកិច្ចប្រជុំ (រូបថត៖ vov.vn) |
នៅក្នុងកិច្ចប្រជុំនេះ វៀតណាមបានអះអាងថា នឹងធ្វើការយ៉ាងជិតស្និទ្ធជាមួយបណ្តាប្រទេសជាសមាជិក ដើម្បីរួមចំណែកដល់ភាពជោគជ័យនៃ AMM-51 និងកិច្ចប្រជុំពាក់ព័ន្ធនានា។
ក្នុងតួនាទីជាប្រទេសសម្របសម្រួលនូវទំនាក់ទំនងសន្ទនាអាស៊ាន - ឥណ្ឌា វៀតណាមបានពិភាក្សាជាមួយបណ្តាប្រទេសអាស៊ាន និងបានឯកភាពគ្នាលើខ្លឹមសារនៃការរៀបចំកិច្ចប្រជុំថ្នាក់រដ្ឋមន្ត្រីការបរទេសអាស៊ាន - ឥណ្ឌា (PMC) ដែលនឹងប្រព្រឹត្ដទៅនាថ្ងៃទី ៣ សីហា ឆ្នាំ២០១៨។ យោងតាមផែនការផ្លាស់វេនគ្នា វៀតណាមនឹងផ្ទេរតួនាទីជាប្រទេសសម្របសម្រួលនូវទំនាក់ទំនងសន្ទនាអាស៊ាន- ឥណ្ឌាទៅឲ្យប្រទេសថៃ ហើយវៀតណាមទទួលតួនាទីសម្របសម្រួលនូវទំនាក់ទំនងសន្ទនាអាស៊ាន - ជប៉ុន ពីខែសីហាឆ្នាំ ២០១៨ តទៅ៕
បកប្រែដោយ Pham Diep