ការទូតវៀតណាមរួមដំណើរក្នុងការជួយប្រជាជនកម្ពុជារស់រានមានជីវិតឡើងវិញ និងអភិវឌ្ឍន៍ប្រទេសជាតិ៖ ក្រឡេកមើលដំណើរការនៃរយៈពេល ៤០ ឆ្នាំកន្លងមក
កប.អនឡាញ - កាលពី ៤០ ឆ្នាំមុន កងទ័ព និងប្រជាជនកម្ពុជាបានរួមជាមួយកងទ័ពស្ម័គ្រចិត្តវៀតណាម វាយផ្តួលរំលំរបបខ្មែរក្រហម រំដោះប្រទេសជាតិឲ្យរួចផុតពីរបបប្រល័យពូជសាសន៍។ ជ័យជំនះថ្ងៃទី៧ ខែមករា ឆ្នាំ១៩៧៩ បានក្លាយទៅជាព្រឹត្តិការប្រវត្តិសាស្រដ៏សំខាន់មួយ ដែលបញ្ជាក់ពីស្មារតីសាមគ្គីអន្តរជាតិដ៏ឧត្តុង្គឧត្តម ការជួយឧបត្ថម្ភគាំទ្រដ៏ថ្លៃថ្នូ រវាងប្រទេសទាំងពីរ វៀតណាម និងកម្ពុជា។
ចាប់តាំងពីបណ្តាឆ្នាំដែលមិនអាចបំភ្លេចបាននោះ មកដល់សព្វថ្ងៃ វៀតណាមជានិច្ចកាលរួមដំណើរជាមួយកម្ពុជា ក្នុងការកសាង និងអភិវឌ្ឍន៍ប្រទេសជាតិ។ ក្នុងនោះ ក្រៅពីការប្រយុទ្ធយ៉ាងអង់អាចក្លាហាន និងការធ្វើពលីកម្មគ្រប់បែបយ៉ាងរបស់កងទ័ពស្ម័គ្រចិត្តវៀតណាម ផ្នែកការទូតវៀតណាមក៏បានរួមចំណែកដ៏សំខាន់ក្នុងការពូនជ្រុំទំនាក់ទំនងដ៏ជិតស្និទ្ធរវាងប្រទេសទាំងពីរ វៀតណាម - កម្ពុជាផងដែរ។
នៅឆ្នាំ ២០១៧ ក្នុងឱកាសបំពេញទស្សនកិច្ចនៅបណ្តាកន្លែងដំបូងនៅវៀតណាម ដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចាប់ផ្តើមដំណើរការឆ្ពោះទៅរកការសង្គ្រោះជាតិ ផ្តួលរំលំរបបប្រល័យពូជសាសន៍ខ្មែរក្រហម និងឆ្ពោះទៅរកអនាគតសម្រាប់ប្រទេសជាតិ សម្តេចតេជោ ហ៊ុន សែន បានអះអាងថា៖ “បើគ្មានការជួយឧបត្ថម្ភពីវៀតណាមទេ គឺពិតជាកម្ពុជាមិនមានថ្ងៃនេះបានឡើយ”។
|
|
ពិធីរំលឹកខួបអនុស្សាវរីយ៍លើកទី ៤០ នៃជ័យជំនះសង្គ្រាមការពារព្រំដែនភាគនិរតី ដែលវៀតណាម រួមជាមួយកងទ័ព និងប្រជាជនកម្ពុជាផ្តួលរំលំរបបប្រល័យពូជសាសន៍ ត្រូវបានប្រារព្ធឡើងយ៉ាងឱឡារឹក នៅរដ្ឋធានីហាណូយ (រូបថត៖ HNM) |
បន្ទាប់ពីថ្ងៃទី៧ ខែមករា ឆ្នាំ១៩៧៩ ថ្នាក់ដឹកនាំនៃក្រសួងការបរទេសវៀតណាមបានបើកវគ្គបណ្តុះបណ្តាលវិជ្ជាជីវៈ និងកិច្ចការបរទេស សម្រាប់អ្នកការទូតកម្ពុជា។
ក្នុងបណ្តាឆ្នាំដ៏លំបាកបំផុត ដែលបញ្ហាកម្ពុជា ជាប្រធានបទដ៏ក្តៅគគុកលើវេទិកាតំបន់ និងអន្តរជាតិ ជាពិសេសនៅអង្គការសហប្រជាជាតិ ផ្នែកការទូតវៀតណាមរួមជាមួយកម្ពុជាបានធ្វើការតស៊ូប្រឆាំងនឹងការឡោមព័ទ្ធ ព្រមទាំងសហការជាមួយគ្នាក្នុងការផ្សព្វផ្សាយព័ត៌មានជូនពិភពលោក ដើម្បីឲ្យគេមើលឃើញយ៉ាងច្បាស់ អំពីភាពព្រៃផ្សៃនៃរបបប្រល័យពូជសាសន៍ ប៉ុល ពត និងឧក្រិដ្ឋកម្មដែលពួកវាបង្កឡើងចំពោះប្រជាជនវៀតណាម និងប្រជាជនកម្ពុជា ព្រមទាំងបញ្ជាក់ពីស្មារតីដ៏បរិសុទ្ធរបស់វៀតណាម ក្នុងការអនុវត្តបុព្វហេតុអន្តរជាតិដ៏ឧត្តុង្គឧត្តមនៅកម្ពុជា និងជួយឲ្យមតិសាធារណៈនៅលើពិភពលោក មានការយល់ដឹងច្បាស់ពីយុត្តិធម៌ និងការពិត។
អស់រយៈពេលជាងមួយទសវត្សរ៍ ក្នុងបរិបទដែលពិភពលោក និងតំបន់មានការប្រែប្រួលយ៉ាងស្មុគស្មាញ តាមរយៈកិច្ចសហប្រតិបត្តិការ និងការទូតទាំងទ្វេភាគី ទាំងពហុភាគីរបស់ខ្លួន វៀតណាមនៅតែគាំទ្រកម្ពុជាពង្រឹង និងរក្សារដ្ឋាភិបាល និងកងទ័ព នៃសាធារណរដ្ឋប្រជាមានិតកម្ពុជាឲ្យបាននៅដ៏ដែល ដើម្បីទប់ស្កាត់ការវិលត្រឡប់មកនៃរបបប្រល័យពូជសាសន៍ និងលុបបំបាត់ចោលខ្មែរក្រហមឲ្យចេញពីអង្គការសហប្រជាជាតិ ព្រមទាំងខិតខំប្រឹងប្រែងស្វែងរកដំណោះស្រាយនយោបាយមួយសម្រាប់បញ្ហាកម្ពុជាផងដែរ។
ការតស៊ូដោយឥតឈប់ឈររបស់ វៀតណាម និងកម្ពុជា បាននាំមកនូវការចុះហត្ថលេខាលើកិច្ចព្រមព្រៀងទីក្រុងប៉ារីសស្តីពីកម្ពុជាឆ្នាំ១៩៩១ ដែលធានានូវឯករាជ្យ អធិបតេយ្យភាព និងបូរណភាពទឹកដីរបស់កម្ពុជា ព្រមទាំងភាគីនានាបានសន្យាគោរពអព្យាក្រឹតភាព និងការបង្រួបបង្រួមជាតិរបស់កម្ពុជា។
|
|
សកម្មភាពជាច្រើនត្រូវបានរៀបចំឡើងក្នុងឱកាសរំលឹកខួបអនុស្សាវរីយ៍លើកទី ៤០ នៃជ័យជំនះសង្គ្រាមការពារព្រំដែនភាគនិរតីវៀតណាម និងរួមជាមួយកងទ័ព និងប្រជាជនកម្ពុជាផ្តួលរំលំរបបប្រល័យពូជសាសន៍ (រូបថត៖ VGP) |
ក្រឡេកមើលប្រវត្តិសាស្រន៍ក្នុងអំឡុងពេល ៤០ ឆ្នាំកន្លងទៅនេះ តាំងពីពេលដែលប្រទេសកម្ពុជារងការបំផ្លិចបំផ្លាញយ៉ាងធ្ងន់ធ្ងរ ហើយដល់ការរស់ឡើងវិញពីបាតដៃទទេ បច្ចុប្បន្ននេះ ប្រទេសកម្ពុជាកំពុងអភិវឌ្ឍន៍យ៉ាងខ្លាំងក្លាលើគ្រប់វិស័យ ទាំងនយោបាយសេដ្ឋកិច្ច សង្គម ហើយតួនាទី និងឋានៈរបស់កម្ពុជាក៏បានលើកកំពស់ដោយឥតឈប់ឈរនៅក្នុងតំបន់ និងលើឆាកអន្តរជាតិផងដែរ។
ក្នុងដំណើរការនេះ វៀតណាមជានិច្ចកាលយកចិត្តទុកដាក់យ៉ាងខ្លាំង និងធ្វើអស់ពីកម្លាំងកាយចិត្តរបស់ខ្លួនក្នុងការពូនជ្រុំនូវទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ ព្រមទាំង ជំរុញកិច្ចសហប្រតិបត្តិការលើវិស័យមួយចំនួនដូចជា នយោបាយ សន្តិសុខ ការពារជាតិ និងកិច្ចការបរទេស លើកកំពស់ប្រសិទ្ធភាពនៃកិច្ចសហប្រតិបត្តិការលើវិស័យសេដ្ឋកិច្ច វប្បធម៌ សង្គម និងត្រៀមខ្លួនជាស្រេចចែករំលែកបទពិសោធន៍ និងសហការគ្នាលើវិស័យនានាដែលសមស្របតាមផលប្រយោជន៍ និងលទ្ធភាពរបស់ប្រទេសនិមួយៗ។
ដោយក្រឡេកមើលប្រវត្តិសាស្រក្នុងរយៈពេលកន្លងទៅនេះ យើងកាន់តែជឿជាក់ថា ទំនាក់ទំនងរវាងវៀតណាម និងកម្ពុជា នឹងត្រូវបានពង្រឹង និងពង្រីកឲ្យមានភាពរីកចម្រើនកាន់តែខ្លាំក្លាថែមទៀត ដោយឈរលើស្មារតី “ប្រទេសជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់វិស័យ ស្ថិតស្ថេយូរអង្វែង” ដើម្បីផលប្រយោជន៍របស់ប្រទេសទាំងពីរ ដើម្បីសន្តិភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងលើពិភពលោក៕
បកប្រែដោយ Huyen Trang