ពិធីបុណ្យវប្បធម៌វៀតណាម ឆ្នាំ២០២៦ ត្រូវបានរៀបចំឡើងនៅទីក្រុងអូសាកា

ពិធីបុណ្យឆ្នាំនេះត្រូវបានរៀបចំក្នុងឱកាសទិវាវប្បធម៌នៃបណ្ដាជនជាតិវៀតណាម និងពិធីបុណ្យសែនខួបស្ដេច Hung តាមរយៈនោះលើកតម្កើងអត្តសញ្ញាណវប្បធម៌របស់ជនជាតិទាំង ៥៤ និងផ្សព្វផ្សាយស្មារតី "ផឹកទឹកនឹកដល់ប្រភពដើម" ក្នុងសហគមន៍វៀតណាមនៅបរទេស។

នៅក្នុងសុន្ទរកថាបើកពិធីបុណ្យ លោកស្រី Le Thuong ប្រធានសមាគមវៀតណាមនៅតំបន់ Kansai និងជាប្រធានគណៈកម្មាធិការរៀបចំ បានឲ្យដឹងថា វប្បធម៌គឺជាស្ពានមួយដែលជួយឲ្យប្រជាជាតិទាំងពីរយល់គ្នាទៅវិញទៅមកកាន់តែច្បាស់។ អាណិកជនវៀតណាមដែលរស់នៅ សិក្សា និងធ្វើការនៅប្រទេសជប៉ុន ចង់ផ្សព្វផ្សាយវប្បធម៌វៀតណាមដល់ប្រជាជនជប៉ុន និងមិត្តភក្តិអន្តរជាតិ។ ការទូតវប្បធម៌នឹងជួយតភ្ជាប់ប្រជាជាតិទាំងពីរឱ្យកាន់តែជិតស្និទ្ធ។

ស្តង់មួយចំនួននៅក្នុងពិធីបុណ្យ (រូបថត៖ vovworld.vn)

ពិធីបុណ្យនេះមានស្តង់ជាច្រើនជាមួយសកម្មភាពជាច្រើន ដូចជា ម្ហូបអាហារ សរសេរអក្សរផ្ចង់ និងការផ្សព្វផ្សាយវប្បធម៌នៃតំបន់ទាំងបីរបស់វៀតណាម។

លោក Ngo Ly Hung អាណិកជនវៀតណាមនៅទីក្រុង Kobe (ខេត្ត Hyogo) បានចែករំលែកថា “ខ្ញុំមកពីខេត្ត Phu Tho ហើយខ្ញុំចង់ផ្សព្វផ្សាយអត្តសញ្ញាណវប្បធម៌ ទេសចរណ៍ និងម្ហូបអាហាររបស់ Phu Tho ដល់សហគមន៍វៀតណាម និងជប៉ុន ដើម្បីឱ្យមនុស្សគ្រប់គ្នាអាចយល់អំពីស្រុកកំណើតរបស់ស្តេច Hung និងផ្សព្វផ្សាយលក្ខណៈដ៏ល្អប្រពៃនៃវប្បធម៌វៀតណាម”។

នៅក្នុងបរិយាកាសដ៏ឧឡារិកនៃពិធីបុណ្យនេះ សហគមន៍វៀតណាមនៅតំបន់ Kansai រួមជាមួយអាណិកជនវៀតណាម និងមិត្តអន្តរជាតិជាច្រើន បានអុជធូបគោរពវិញ្ញាណក្ខន្ធស្តេច Hung ដែលជាស្ថាបនិកនៃប្រទេសជាតិ។

ការរៀបចំពិធីបុណ្យសែនខួបស្ដេច Hung មិនត្រឹមតែមានសារៈសំខាន់ខាងវិញ្ញាណប៉ុណ្ណោះទេ ថែមទាំងបង្ហាញស្មារតីនៃ "ការផឹកទឹកនឹកដល់ប្រភពដើម" ដែលតែងតែត្រូវបានរក្សានៅក្នុងសហគមន៍វៀតណាមនៅបរទេស។ នេះក៏ជាឱកាសសម្រាប់យុវជនជំនាន់ក្រោយនៅបរទេស យល់កាន់តែច្បាស់អំពីប្រវត្តិសាស្ត្រ និងវប្បធម៌ជាតិ តាមនោះ លើកកម្ពស់សេចក្តីស្រឡាញ់ចំពោះមាតុភូមិ។

ការសម្តែងសិល្បៈក្នុងព្រឹត្តិការណ៍ (រូបថត៖ vovworld.vn)

ក្នុងក្របខ័ណ្ឌនៃពិធីបុណ្យនេះ ក៏បានប្រព្រឹត្តទៅការប្រឡងជុំទីមួយនៃការប្រឡង "ខ្ញុំស្រឡាញ់ភាសាកំណើតរបស់ខ្ញុំ" ក្នុងគោលបំណងលើកតម្កើងភាសាវៀតណាម និងបណ្តុះក្តីស្រឡាញ់ចំពោះភាសា និងវប្បធម៌ជាតិ។ ការប្រឡងនេះត្រូវបានធ្វើឡើងនៅប្រទេសជាច្រើន ហើយទាក់ទាញការចូលរួមពីអាណិកជនវៀតណាមជាច្រើន ជាពិសេសយុវជនជំនាន់ក្រោយ តាមរយៈនោះរួមចំណែកដល់ការផ្សព្វផ្សាយភាសា និងវប្បធម៌វៀតណាមនៅក្នុងសហគមន៍អន្តរជាតិ។

ពិធីបុណ្យវប្បធម៌វៀតណាមឆ្នាំ ២០២៦ នៅទីក្រុង Osaka បន្តបញ្ជាក់ពីតួនាទីជាស្ពានវប្បធម៌ រួមចំណែកដល់ការផ្សព្វផ្សាយរូបភាពនៃទឹកដីនិងមនុស្សវៀតណាម ព្រមទាំង បង្កើនការតភ្ជាប់សហគមន៍វៀតណាមនៅទូទាំងពិភពលោក និងជំរុញទំនាក់ទំនងមិត្តភាពរវាងវៀតណាម និងជប៉ុនឲ្យកាន់តែអភិវឌ្ឍ៕

បកប្រែដោយ Thuy Anh