ប្រទេសនានាស្វាគមន៍វឌ្ឍនភាពបន្ទាប់ពីកិច្ចប្រជុំនៅទីក្រុងហ្សឺណែវស្តីពីអ៊ុយក្រែន

ប្រធានាធិបតីទួរគីបានសង្កត់ធ្ងន់លើការត្រៀមខ្លួនរបស់លោកក្នុងការផ្តល់ជំនួយទាក់ទងនឹងអ៊ុយក្រែន និងបង្កើតវេទិកាចរចានៅទីក្រុងអ៊ីស្តង់ប៊ុល។ នៅថ្ងៃដដែលនោះ ថ្លែងនៅក្នុងសន្និសីទមួយនៅប្រទេសស៊ុយអែត ប្រធានសភាអ៊ុយក្រែនលោក Ruslan Stefanchuk បានគូសបញ្ជាក់ពី "ខ្សែបន្ទាត់ក្រហម" របស់ទីក្រុងគៀវក្នុងបញ្ហាកសាងសន្តិភាព។ លក្ខខណ្ឌរួមមានការមិនទទួលស្គាល់ការផ្លាស់ប្តូរទឹកដី ការមិនកំណត់កងកម្លាំងប្រដាប់អាវុធ និងការបញ្ជាក់ថា ការចូលរួមជាមួយសហភាពអឺរ៉ុប (EU) និងអង្គការសន្ធិសញ្ញាអាត្លង់ទិកខាងជើង (NATO) ត្រូវតែជាផ្នែកមួយនៃការធានាសន្តិសុខ។ លោកបានវាយតម្លៃថា លក្ខខណ្ឌនៅក្នុងសំណើរបស់សហរដ្ឋអាមេរិកមិនទាន់បំពេញតាមតម្រូវការទាំងនេះទេ។

គណៈប្រតិភូសហរដ្ឋអាមេរិក និងអ៊ុយក្រែន ក្នុងការចរចានៅទីក្រុងហ្សឺណែវ ប្រទេសស្វីស នៅថ្ងៃទី២៣ ខែវិច្ឆិកា ឆ្នាំ២០២៥ (រូបថត៖ Reuters)

ពីអឺរ៉ុប មេដឹកនាំ និងមន្ត្រីសហភាពអឺរ៉ុបជាច្រើនបានកត់សម្គាល់ពីវឌ្ឍនភាពពីកិច្ចប្រជុំសហរដ្ឋអាមេរិក-អ៊ុយក្រែននៅទីក្រុងហ្សឺណែវកាលពីចុងសប្តាហ៍មុន។ រដ្ឋមន្ត្រីការបរទេសបារាំងលោក Jean-Noel Barrot បានពិពណ៌នាអំពីការពិភាក្សាថា "មានលក្ខណៈស្ថាបនា និងមានប្រយោជន៍"។ ថ្នាក់ដឹកនាំនៃគណៈកម្មការអឺរ៉ុប (EC) និងក្រុមប្រឹក្សាអឺរ៉ុបក៏បានសង្កត់ធ្ងន់លើ “សន្ទុះថ្មី” និង “មូលដ្ឋានរឹងមាំមួយដើម្បីបន្តឆ្ពោះទៅមុខ”ទោះបីជាបញ្ហាជាច្រើននៅតែមិនទាន់ដោះស្រាយក៏ដោយ។ នៅប្រទេសអង់ហ្គោឡា នៅខាងក្រៅកិច្ចប្រជុំកំពូលសហភាពអឺរ៉ុប-សហភាពអាហ្វ្រិក ប្រធានក្រុមប្រឹក្សាអឺរ៉ុប លោក Antonio Costa បានស្វាគមន៍ “វឌ្ឍនភាពគួរឱ្យកត់សម្គាល់” នៅទីក្រុងហ្សឺណែវ។ ក្នុងពេលជាមួយគ្នានោះ សារព័ត៌មាន Bloomberg បានរាយការណ៍កាលពីម្សិលមិញថា សហរដ្ឋអាមេរិកកំពុងប្រឆាំងនឹងការរៀបចំកិច្ចពិភាក្សាត្រីភាគីជាមួយតំណាងអឺរ៉ុប និងទីក្រុងគៀវ ដែលជាផ្នែកមួយនៃដំណើរការដោះស្រាយបញ្ហាអ៊ុយក្រែន។ មុននោះ CBS បានឲ្យដឹងថា ប្រធានាធិបតីអ៊ុយក្រែន លោក Volodymyr Zelensky អាចធ្វើដំណើរទៅកាន់ទីក្រុងវ៉ាស៊ីនតោននៅសប្តាហ៍ក្រោយ ដើម្បីជួបជាមួយប្រធានាធិបតីសហរដ្ឋអាមេរិក លោក Donald Trump សំដៅឈានដល់កិច្ចព្រមព្រៀងលើផែនការដោះស្រាយជម្លោះនៅក្នុងប្រទេសអឺរ៉ុបខាងកើតនេះ៕

តាម vovworld.vn