អំពាវនាវឱ្យមានសេចក្តីព្រាងនៃសេចក្តីសម្រេចចិត្តរបស់មហាសន្និបាតអង្គការសហប្រជាជាតិស្តីពីការរីករាលដាលនៃជំងឺ Covid-19
កប.អនឡាញ - ឆ្លើយតបនឹងការអំពាវនាវឲ្យមានការទប់ទល់នឹងជម្ងឺ Covid-19 ប្រទេសឥណ្ឌូនេស៊ី និងប្រទេសមួយចំនួនបានតាក់តែងសេចក្តីព្រាងនៃសេចក្តីសម្រេចចិត្តរបស់មហាសន្និបាតអង្គការសហប្រជាជាតិដែលអំពាវនាវឲ្យប្រទេសទាំងឡាយរួបរួមគ្នាក្នុងការប្រយុទ្ធប្រឆាំងនឹងជម្ងឺ Covid-19។
នាថ្ងៃទី២៨ ខែមីនា តំណាងប្រទេសឥណ្ឌូនេស៊ីប្រចាំនៅអង្គការសហប្រជាជាតិលោក Dian Triansyah Djani បានឲ្យដឹងថា សេចក្តីព្រាងនៃសេចក្តីសម្រេចចិត្តពោលខាងលើរបស់ប្រទេសឥណ្ឌូនេស៊ី ហ្កាណា Liechtenstein ន័រវែស សិង្ហបុរី និងស្វីស បានទទួលការគាំទ្រពីប្រទេសជាសមាជិកអង្គការសហប្រជាជាតិជិត១៥០ ប្រទេស។
សេចក្តីព្រាងនៃសេចក្តីសម្រេចចិត្តបានសង្កត់ធ្ងន់លើសារៈសំខាន់នៃពហុភាគីនិយម និងកិច្ចសហប្រតិបត្តិការអន្តរជាតិក្នុងបរិបទនៃការរីករាលដាលជំងឺ និងអំពាវនាវឲ្យពង្រីកកិច្ចសហប្រតិបត្តិការអន្តរជាតិដើម្បីទប់ទល់នឹងជំងឺរាតត្បាតដោយជោគជ័យ តាមរយៈការផ្លាស់ប្ដូរព័ត៌មានចំណេះដឹងក្នុងវិស័យវិទ្យាសាស្រ្ត និងបទពិសោធន៍ ក៏ដូចជាការអនុវត្តតាមការណែនាំរបស់អង្គការសុខភាពពិភពលោក (WHO)។ សេចក្តីព្រាងនៃសេចក្តីសម្រេចចិត្តគឺជាសំណើដំបូងបង្អស់ដែលដាក់ចេញដោយប្រទេសជាសមាជិកមហាសន្និបាតអង្គការសហប្រជាជាតិចាប់តាំងពីពេល WHO បានប្រកាសថា Covid-19 ជាជំងឺរាតត្បាតជាសកលនាថ្ងៃទី១០ ខែមីនាកន្លងមក៕
បកប្រែដោយ Thuy Anh