ឡាវបញ្ចប់ការត្រៀមរៀបចំសម្រាប់កិច្ចប្រជុំរដ្ឋមន្ត្រីការបរទេសអាស៊ានលើកទី៥៧
កប.អនឡាញ - នាថ្ងៃទី ២៣ ខែកក្កដា នៅរដ្ឋធានីវៀងច័ន្ទ ប្រទេសឡាវ កិច្ចប្រជុំថ្នាក់មន្ត្រីជាន់ខ្ពស់អាស៊ាន (SOM) បានប្រព្រឹត្តទៅដើម្បីពិនិត្យ និងបញ្ចប់គ្រប់ទិដ្ឋភាពទាំងអស់នៃការរៀបចំសម្រាប់កិច្ចប្រជុំរដ្ឋមន្ត្រីការបរទេសអាស៊ានលើកទី ៥៧ (AMM) និងកិច្ចប្រជុំពាក់ព័ន្ធ។ លោក Do Hung Viet អនុរដ្ឋមន្ត្រីក្រសួងការបរទេស ប្រធាន SOM អាស៊ានរបស់វៀតណាម បានដឹកនាំគណៈប្រតិភូវៀតណាមចូលរួមកិច្ចប្រជុំនេះ។
ដោយសង្កត់ធ្ងន់ថា កិច្ចប្រជុំ AMM-57 និងកិច្ចប្រជុំពាក់ព័ន្ធគឺជាបណ្ដាសកម្មភាពសំខាន់បំផុតក្នុងឆ្នាំសម្រាប់រដ្ឋមន្ត្រីការបរទេសអាស៊ាន ប្រទេសទាំងឡាយបានវាយតម្លៃខ្ពស់ចំពោះការត្រៀមរៀបចំយ៉ាងយកចិត្តទុកដាក់លើគ្រប់វិស័យរបស់ប្រទេសឡាវដែលជាប្រធានអាស៊ាននៅឆ្នាំ២០២៤។ ប្រទេសទាំងឡាងបានបញ្ជាក់ពីការគាំទ្រ និងកិច្ចសហការយ៉ាងជិតស្និទ្ធក្នុងស្មារតីសាមគ្គីភាព និងកិច្ចសហប្រតិបត្តិការ រួមចំណែកដល់ជោគជ័យរួមនៃកិច្ចប្រជុំទាំងឡាយ។
    |
 |
|
ប្រតិភូចូលរួមកិច្ចប្រជុំមន្ត្រីជាន់ខ្ពស់អាស៊ាន (SOM) (រូបថត៖ ក្រសួងការបរទេស) |
ក្រោមប្រធានបទ “អាស៊ាន៖ ការពង្រឹងការតភ្ជាប់ និងភាពធន់” រដ្ឋមន្ត្រីការបរទេសអាស៊ាន និងដៃគូនានានឹងពិភាក្សាអំពីការអនុវត្តកិច្ចការសំខាន់ៗ និងអាទិភាពរបស់អាស៊ានក្នុងឆ្នាំ២០២៤ ដំណើរការកសាងសហគមន៍អាស៊ាន ពិនិត្យ និងតម្រង់ទិសសម្រាប់កិច្ចសហប្រតិបត្តិការរវាងអាស៊ានជាមួយដៃគូ ពិភាក្សាអំពីស្ថានភាពអន្តរជាតិនិងតំបន់។ កិច្ចប្រជុំនឹងអនុម័តលើឯកសារសំខាន់ៗជាច្រើនដែលជាមូលដ្ឋានសម្រាប់អនុវត្តកិច្ចសហប្រតិបត្តិការក្នុងអាស៊ាន និងរវាងអាស៊ានជាមួយដៃគូនាពេលខាងមុខ។
យោងតាមកម្មវិធី កិច្ចប្រជុំ AMM-57 និងកិច្ចប្រជុំពាក់ព័ន្ធនឹងប្រព្រឹត្តទៅចាប់ពីថ្ងៃទី ២៤ ដល់ថ្ងៃទី ២៧ ខែកក្កដា នៅមជ្ឈមណ្ឌលសន្និសិទជាតិនៃប្រទេសឡាវ រួមទាំងសកម្មភាពប្រហែល ២០ ក្នុងក្របខ័ណ្ឌអាស៊ាន អាស៊ាន+១ អាស៊ាន+៣ កិច្ចប្រជុំកំពូលអាស៊ីបូព៌ា (EAS) និងវេទិកាតំបន់អាស៊ាន (ARF)។
* នាថ្ងៃទី ២៣ ខែកក្កដា លោក Do Hung Viet អនុរដ្ឋមន្ត្រី និងប្រធាន SOM នៃបណ្តាប្រទេសអាស៊ានបានចូលរួមកិច្ចប្រជុំក្រុមប្រឹក្សាប្រតិបត្តិនៃសន្ធិសញ្ញាតំបន់គ្មានអាវុធនុយក្លេអ៊ែរអាស៊ីអាគ្នេយ៍ (SEANWFZ) ដើម្បីពិភាក្សាអំពីស្ថានភាពអនុវត្តផែនការសកម្មភាព SEANWFZ ដំណាក់កាល ២០២៣-២០២៧ និងលើកកម្ពស់ប្រសិទ្ធភាពនៃកិច្ចសហប្រតិបត្តិការនាពេលខាងមុខ៕
បកប្រែដោយ Thuy Anh