កម្រិតជំនួយពីថវិកាមជ្ឈិម ដើម្បីអនុវត្តខ្លឹមសារមួយចំនួនក្នុងគម្រោងលេខ១
កប.អនឡាញ - មិត្តអ្នកអាន Tran Van Hung នៅឃុំ Tra Bui ស្រុក Bac Tra My ខេត្ត Quang Nam បានសួរថា៖ កម្រិតជំនួយពីថវិកាមជ្ឈិម ដើម្បីអនុវត្តខ្លឹមសារមួយចំនួន ក្នុងគម្រោងលេខ១ និងអនុគម្រោងលេខ១ និងគម្រោងលេខ៤ ក្នុងកម្មវិធីគោលដៅជាតិសម្រាប់ការអភិវឌ្ឍសេដ្ឋកិច្ចសង្គមតំបន់ជនជាតិភាគតិច និងតំបន់ភ្នំ ដំណាក់កាល ២០២១-២០៣០ ដំណាក់កាលទី១ ពីឆ្នាំ ២០២១ ដល់ឆ្នាំ ២០២៥ ត្រូវបានកំណត់យ៉ាងដូចម្តេច។
ចម្លើយ៖ បញ្ហាដែលអ្នកបានសួរត្រូវបានចែងនៅក្នុងប្រការទី៣ នៃសេចក្តីសម្រេចលេខ 04/2023/QD-TTg ចុះថ្ងៃទី ២៣ ខែកុម្ភៈ ឆ្នាំ ២០២៣ របស់នាយករដ្ឋមន្ត្រី ដូចតទៅ៖
១. ថវិកាមជ្ឈិមជំនួយជាអតិបរមាចំនួន ៤០ លានដុងក្នុងមួយគ្រួសារ ដើម្បីបង្កើតផ្ទៃដី កសាងហេដ្ឋារចនាសម្ព័ន្ធបច្ចេកទេសលំនៅដ្ឋាន ។
២. ថវិកាមជ្ឈិមជំនួយជាអតិបរមាចំនួន ៤០ លានដុងក្នុងមួយគ្រួសារ ដើម្បីសាងសង់ផ្ទះតាមទំនៀមទម្លាប់ក្នុងនៅមូលដ្ឋាន ធានាបាននូវភាពរឹងទាំងបី (គ្រឹះរឹង ជញ្ជាំងរឹង ដំបូលរឹង)។
៣. ថវិកាមជ្ឈិមជំនួយជាអតិបរមាចំនួន ២២.៥ លានដុងក្នុងមួយគ្រួសារ ដើម្បីអនុវត្តគម្រោងគាស់រាន ដាំដុះឡើងវិញ កែប្រែដី។
៤. ថវិកាមជ្ឈិមជំនួយជាមធ្យម ៣.០០០ លានដុង/គម្រោង ដើម្បីវិនិយោគក្នុងការកសាងសំណង់ទឹកប្រើប្រាស់រួម។
៥. ថវិកាមជ្ឈិមជំនួយជាមធ្យម ១.៦០០ លានដុង/គីឡូម៉ែត្រដើម្បីវិនិយោគលើការសាងសង់ផ្លូវ។
៦. ថវិកាមជ្ឈិមជំនួយជាមធ្យម ៤.៤០០ លានដុងលើផ្សារមួយដើម្បីវិនិយោគលើការសាងសង់ថ្មី និងជាមធ្យម ៨០០ លានដុងលើផ្សារមួយដើម្បីជួសជុល និងកែលម្អបណ្តាញទីផ្សារនៅតំបន់ជនជាតិភាគតិច និងតំបន់ភ្នំ៕
បកប្រែដោយ Duy Hoan