នារីជនជាតិ Dao ហ៊ានគិត ហ៊ានធ្វើ
កប.អនឡាញ - "ឧស្សាហ៍ព្យាយាម ហ៊ានគិត ហ៊ានធ្វើ ហើយទទួលបានជោគជ័យក្នុងការកសាងទម្រង់ចិញ្ចឹមសត្វ និងដាំដំណាំ ដើម្បីងើបឡើង ឈានទៅរកជីវភាពរស់នៅមានស្ថិរភាព បើកទិសដៅអភិវឌ្ឍសេដ្ឋកិច្ចប្រកបដោយចីរភាពសម្រាប់គ្រួសារ"។ អ្នកស្រុកជាច្រើនបាននិយាយបែបនេះអំពីអ្នកស្រី Trieu Thi Huong ជនជាតិ Dao នៅភូមិ Roong Thu ឃុំ Thuong An ស្រុក Ngan Son ខេត្ត Bac Kan។
ដើរតាមលោក Ly Quoc Van ប្រធានសមាគមកសិករឃុំ Thuong An យើងខ្ញុំបានទៅទស្សនាទម្រង់ដាំដំណាំ និងចិញ្ចឹមសត្វរបស់អ្នកស្រី Trieu Thi Huong។ ចំណាប់អារម្មណ៍ដំបូងសម្រាប់យើងខ្ញុំគឺថា ជម្រាលភ្នំនេះត្រូវបានដាំដោយស្មៅដំរីខៀវស្រងាត់ដោយអ្នកស្រី Huong ហើយក្រោលចិញ្ចឹមក្របីត្រូវបានសាងសង់ដោយមាំទាំសមហេតុផល។
ឆ្លៀតពេលយកស្មៅទៅឲ្យក្របីស៊ី អ្នកស្រី Huong បានចែករំលែកជាមួយយើងខ្ញុំអំពីហេតុផលដែលវិនិយោគលើការចិញ្ចឹមក្របីថា៖ “កាលពីមុន គ្រួសារខ្ញុំចិញ្ចឹមក្របីតាមវិធីចាស់។ ដោយសារគ្មានក្រោល គ្រួសារខ្ញុំចិញ្ចឹមក្របីច្រើនបំផុតតែ ៣ ក្បាល ដូចជាទម្រង់សន្សំសំចៃ នៅពេលចាំបាច់លក់វាទៅយកលុយចាយ។ បន្ទាប់ពីស្រាវជ្រាវអស់មួយរយៈពេល កាលពីដើមឆ្នាំ ២០២០ ខ្ញុំបានសម្រេចចិត្តអនុវត្តទម្រង់ចញ្ចឹមក្របីយកសាច់។ ជាមួយនឹងប្រាក់សន្សំបាន ខ្ញុំទិញក្របី ៣ ក្បាល។ ចិញ្ចឹមបានជិត ៥ ខែ ហើយលក់បានជាង ១០០ លានដុង។ ក្របីនីមួយៗចំណេញពី ៥ ទៅ ៦ លានដុង”។
|
|
អ្នកស្រី Trieu Thi Huong ចិញ្ចឹមថែទាំក្របី |
ការចិញ្ចឹមក្របីយកសាច់គឺសមស្របតាមលក្ខខណ្ឌគ្រួសារ នៅពេលដែលមានផ្ទៃដីធំអាចដាំស្មៅ និងចេកឲ្យវាស៊ីដើម្បីយកលាមកសត្វ បង្កបង្កើនផល ដាំដើមឈើហូបផ្លែ។ល។ ក្នុងឆ្នាំ ២០២១ ប្តីប្រពន្ធអ្នកស្រី Huong បានខ្ចីប្រាក់ ១០០ លានដុងពីធនាគារគោលនយោបាយសង្គម រួមជាមួយនឹងប្រាក់សន្សំសំចៃយកទៅសង់ក្រោលមាំទាំនៅលើផ្ទៃដីជាង ២០០០ ម៉ែត្រការ៉េ សម្រាប់ចិញ្ចឹមក្របី និងធ្វើទ្រុងមាន់។ បច្ចុប្បន្ននេះ គ្រួសារអ្នកស្រី Trieu Thi Huong កំពុងចិញ្ចឹមក្របីចំនួន ១៣ ក្បាល មាន់ជាង ១០០ ក្បាល និងដាំដើមឈើ ១ ហិចតា។
យោងតាមលោក Ly Quoc Van អ្នកស្រី Trieu Thi Huong គឺជាកសិករដ៏ក្លាហានហ៊ានគិត ហ៊ានធ្វើការអភិវឌ្ឍសេដ្ឋកិច្ច ដើម្បីរួចផុតពីភាពក្រីក្រ។ លោក Ly Quoc Van បានឲ្យដឹងថា “ទោះបីជួបការលំបាកជាច្រើនក៏ដោយ ក៏គ្រួសារអ្នកស្រី Huong បានខិតខំប្រឹងប្រែងពុះពារការលំបាក់ ដោយហេតុនេះ គាត់បានកសាងទម្រង់អភិវឌ្ឍសេដ្ឋកិច្ចគ្រួសារសមស្រប។ ស្មារតីក្លាហាន ហ៊ានគិត ហ៊ានធ្វើរបស់អ្នកស្រី Trieu Thi Huong ជាគំរូសម្រាប់ស្ត្រីជនជាតិភាគតិចក្នុងមូលដ្ឋានដើម្បីសិក្សា អភិវឌ្ឍសេដ្ឋកិច្ចគ្រួសារ កសាងជីវភាពរស់នៅប្រកបដោយស្ថិរភាព និងសម្បូរធូធារ”៕
បកប្រែដោយ Huyen Trang