រួចផុតពីភាពក្រីក្រពីគំរូធ្វើពហុវប្បកម្ម
កប.អនឡាញ - ដោយមានគោលដៅជួយបងប្អូនជនជាតិភាគតិច Thai កាត់បន្ថយភាពក្រីក្រ នាពេលកន្លងមក ប៉ុស្ដិ៍ការពារព្រំដែន Ngoc Lam (បញ្ជាការដ្ឋានកងទ័ពការពារព្រំដែនខេត្ត Nghe An) បានសហការជាមួយសមាគមកសិករនៃឃុំ Ngoc Lam ស្រុក Thanh Chuong ខេត្ត Nghe An ភាគកណ្ដាលវៀតណាម អនុវត្ដគំរូធ្វើពហុវប្បកម្មប្រកបដោយជោគជ័យ។
|
|
កម្មាភិបាលនៃប៉ុស្ដិ៍ការពារព្រំដែនណែនាំបច្ចេកទេសដាំដើមបន្លែដល់គ្រួសារលោកស្រី Vi Thi Da |
នៅឆ្នាំ ២០១៩ ក្រុមគ្រួសាររបស់លោកស្រី Vi Thi Da ត្រូវបានប៉ុស្ដិ៍ការពារព្រំដែន Ngoc Lam ជ្រើសរើសដើម្បីកសាងគំរូធ្វើពហុវប្បកម្ម តាមរយៈការដាំដើមត្របែកចំនួន ៤៥ ដើម ប៉ោម ៤៥ ដើម ខ្នុរ ២០ ដើម និងបន្លែជាច្រើនប្រភេទទៀត។ លើសពីនេះ ប៉ុស្ដិ៍ការពារព្រំដែនក៏បានជួយគាំទ្រក្រុមគ្រួសារលោកស្រី Vi Thi Da នូវពូជសត្វជ្រូកចំនួន ៣ ក្បាលដែលបង្កាត់ពូជដោយអង្គភាព ព្រមទាំងអង្គភាពបានចាត់បញ្ជូនលោកវរសេនីយ៍ត្រី Nguyen Trung Kien ប្រធានក្រុមចលនាមហាជនទៅជួយផ្នែកបច្ចេកទេស ថែទាំដើមឈើ និងកូនពូជផងដែរ។
លោកវរសេនីយ៍ត្រី Nguyen Trung Kien បានឲ្យដឹងថា៖ “គ្រួសាររបស់លោកស្រី Vi Thi Da មិនស្គាល់នូវគំរូធ្វើពហុវប្បកម្មទេ ប៉ុន្តែមានការជួយគាំទ្រ និងណែនាំពីកម្មាភិបាលនៃប៉ុស្ដិ៍ការពារព្រំដែន និងសមាគមកសិករហើយនោះ គ្រួសាររបស់លោកស្រី Vi Thi Da បានស្គាល់គំរូផលិតកម្មថ្មី។ ដោយសារអនុវត្តបច្ចេកទេស និងការថែទាំយ៉ងត្រឹមត្រូវនោះ បន្ទាប់ពីមួយឆ្នាំ គំរូធ្វើពហុវប្បកម្មរបស់គ្រួសារលោកស្រីបាននាំមកនូវប្រាក់ចំណូលជាង ៥០ លានដុង។ នេះជាទឹកប្រាក់មិនតិចសម្រាប់គ្រួសារជនជាតិភាគតិចទេ។
លោក Luong Thanh Tuyen ប្រធានសមាគមកសិករនៅឃុំ Ngoc Lam បានឲ្យដឹងថា៖ “គំរូធ្វើពហុវប្បកម្មគឺជាគំរូដំបូងបង្អស់ដែលមានការសហការរវាងប៉ុស្ដិ៍ការពារព្រំដែន និងសមាគមកសិករក្នុងគោលបំណងជួយគ្រួសារនានាដែលមានជីវភាពរស់នៅជួបការលំបាកក្នុងការអភិវឌ្ឍសេដ្ឋកិច្ច និងកាត់បន្ថយភាពក្រីក្រ។ ដើម្បីកសាងគំរូនេះទទួលបានជោគជ័យ យើងខ្ញុំត្រូវធ្វើផែនការ និងមានវិធីសាស្ដ្រជួយគាំទ្រយ៉ាងជាក់ស្ដែង។
ក្រោយរយៈពេលជាងមួយឆ្នាំ រហូតមកដល់ពេលនេះ គំរូនេះបាននាំមកនូវប្រសិទ្ធភាព ដោយហេតុនេះជួយប្រជាជនក្នុងការផលិត និងកាត់បន្ថយភាពក្រីក្រ។ នាពេលខាងមុខនេះ យើងខ្ញុំនឹងបន្តផ្សព្វផ្សាយនូវគំរូនេះដើម្បីគ្រួសារនៅតំបន់នេះអាចទទួលបានវិធីសាស្រ្តផលិតកម្មថ្មី”៕
បកប្រែដោយ Pham Diep