លើកតម្កើងកសិករវៀតណាមឆ្នើម និងលើកសរសើរសហករណ៍លេចធ្លោនៅទូទាំងប្រទេស
កប.អនឡាញ - នាល្ងាចថ្ងៃទី ១៤ ខែតុលា នៅទីក្រុងហាណូយ គណៈកម្មាធិសមាគមកសិករមជ្ឈិមវៀតណាម គណៈឃោសនាអប់រំមជ្ឈិមបក្ស ក្រសួងកសិកម្ម និងអភិវឌ្ឍន៍ជនបទ និងក្រសួងឧស្សាហកម្ម និងពាណិជ្ជកម្មបានសហការគ្នារៀបចំពិធីលើកតម្កើង និងប្រគល់រង្វាន់កសិករវៀតណាមឆ្នើម និងលើកសរសើរសហករណ៍លេចធ្លោទូទាំងប្រទេសក្នុងឆ្នាំ ២០២៤។
អញ្ជើញចូលរួមមានលោក Tran Thanh Manប្រធានរដ្ឋសភាវៀតណាម និងថ្នាក់ដឹកនាំបក្ស រដ្ឋ រួមទាំងតំណាងស្ថាប័ន ក្រសួង មូលដ្ឋាន អ្នកជំនាញ អ្នកវិទ្យាសាស្ដ្រ អាជីវកម្ម សមាគមកសិករខេត្ដនានានៅទូទាំងប្រទេស។
អញ្ជើញថ្លែងក្នុងពិធី លោក Tran Thanh Man ប្រធានរដ្ឋសភាវៀតណាម បានអះអាងថា៖ ការលើកតម្កើង និងប្រគល់កិត្ដិនាមកសិករវៀតណាមឆ្នើម និងលើកសរសើរសហករណ៍លេចធ្លោឆ្នាំ ២០២៤ មានការផ្លាស់ថ្មី និងច្នៃប្រឌិតជាច្រើនក្នុងស្មារតីប្រកាន់យកប្រជាកសិករជាមជ្ឈភាព។ សមាគមកសិករវៀតណាមបានរីកចម្រើនឥតឈប់ឈរ រួមចំណែកយ៉ាងសកម្មក្នុងការអភិវឌ្ឍប្រទេសជាតិ។ កសិកម្មបានរីកចម្រើនយ៉ាងឆាប់រហ័ស ក្លាយជាសសរស្តម្ភមួយនៃខឿនសេដ្ឋកិច្ច រួមចំណែកទប់ស្កាត់អតិផរណា រក្សាស្ថិរភាពម៉ាក្រូសេដ្ឋកិច្ច ធានាសន្តិសុខសង្គម និងគាំទ្រលើវិស័យឧស្សាហកម្ម ពាណិជ្ជកម្ម និងសេវាកម្មអភិវឌ្ឍន៍។
|
|
លោកប្រធានរដ្ឋសភា Tran Thanh Man ប្រគល់កិត្ដិនាមកសិករវៀតណាមឆ្នើមឆ្នាំ២០២៤ |
លោកប្រធានរដ្ឋសភា ឲ្យដឹងថា សមាគមកសិករគ្រប់លំដាប់ថ្នាក់ត្រូវបន្តផ្សព្វផ្សាយព័ត៌មាន ឃោសនាឲ្យបានទូលំទូលាយនូវគោលការណ៍ណែនាំ គោលនយោបាយ និងច្បាប់របស់រដ្ឋក្នុងវិស័យកសិកម្ម កសិករ និងជនបទ។ បន្តគាំទ្រ លើកទឹកចិត្ត បង្កើតលក្ខខណ្ឌអំណោយផលជូនសហគ្រាស និងសហករណ៍កសិកម្ម ដើម្បីទទួលបានជោគជ័យជាច្រើនថែមទៀត និងដើរតួនាទីជាស្នូលក្នុងការចូលរួមអភិវឌ្ឍន៍សេដ្ឋកិច្ចសង្គមនៅតាមតំបន់ជនបទនៅទូទាំងប្រទេស ជាពិសេសនៅតំបន់ភ្នំ និងតំបន់ដែលមានជនជាតិភាគតិច។
លោកប្រធានរដ្ឋសភាវៀតណាម បានស្នើឲ្យគណៈកម្មាធិការបក្ស អាជ្ញាធរ រណសិរ្សមាតុភូមិ និងអង្គការនយោបាយសង្គមគ្រប់លំដាប់ថ្នាក់បន្តយកចិត្តទុកដាក់ និងមានដំណោះស្រាយជាក់ស្តែង និងមានប្រសិទ្ធភាពសម្រាប់ការអភិវឌ្ឍកសិកម្ម កសាងជនបទថ្មី បង្កើតលក្ខខណ្ឌអំណោយផលបន្ថែមទៀតសម្រាប់សមាគមកសិករវៀតណាមគ្រប់លំដាប់ថ្នាក់ឲ្យប្រតិបត្ដិប្រកបដោយប្រសិទ្ធភាព៕
បកប្រែដោយ Pham Diep